Yosi-a Shuî Htaî Pyâm É Hkyô Pé
34
Yosi-a gi, chyungxe zànwut shit zân má hkóhkâm dùt mù, Yerusalem wà mó má súm xe razàn ùp ri. 2 Yhang gi, haû Yhûmsîng Garaî é myòq hí má jo têng é hkyô kut mù, lòqyò lòqpai a jau ló byùq é za, yhâng é îchyí îwa Dawiq é hkyó pé má châng sô ri.3 Yhang ùp é shit zan zàn, yhang zorâm zo ru nghut ashî u, yhang gi, yhâng é îchyí îwa Dawiq é Garai Gasang lé ho hî bê nghut ri. Yhang ùp é raxe í zan zàn má, yhang gi, Yudaq mau eq Yerusalem wà mó má jòq é, myhang é hparà noq jowò pé, Ashera hparà zìng pé, kyûng tô é hparà lhô pé eq shup tô é hparà lhô pé lé huî sêng pyám bê nghut ri. 4 Yhang shuî-û é a-ô má Balaq hparà pê é hkungga gyàp pé lé hpyoq hpyi pyâm ri; yhang gi, haú pê é ahtoq má jòq é namngón jung nyhé hkungga gyàp pé lé ajàp azo dùt shoq zân hpyit pyám mù, Ashera hparà zìng pé, kyûng tô é hparà lhô pé eq shup tô é hparà lhô pé lé bàt hkyop pyám bê nghut ri. Yhang bàt hkyop é ajàp azo haú pé lé, yhángmòq lé hkungga nhông byi bâng é lùpdùng má ê hpyûn pyâm ri. 5 Yhang gi, hkyangjông pê é showui pé lé, yhángmòq é hkungga gyàp htoq pé má nyhê hkyô pyám luî, Yudaq mau eq Yerusalem wà mó lé lhoq sansêng pyám bê nghut ri. 6 Haû eq rajung za, yhang gi, Manase mau, Ehprim mau eq Sime-on mau mâ é wà pé mai Naphtali mau jé shoq le, awui ayàm mâ é byòq yeq bum é lé le châng wú lhîng mù, 7 Isira-elaq mau gón mâ é, hkungga gyàp pé eq Ashera hparà zìng pé lé hpyoq hpyi pyám luî, hparà lhô pé lé bàt mhun pyám mù, namngón hkungga gyàp pé bànshoq lé ajàp azo zân hpyit pyám bê nghut ri. Hau htâng, yhang gi, Yerusalem wà mó má taû ló bê nghut ri.
8 Yhang gi, yhang ùp é raxe shit zan zàn má, mîngdán eq noqkuq yhûm lé ban lhoq sanséng jáng, yhâng é Garai Gasang nghut é, haû Yhûmsîng Garaî é noqkuq yhûm lé saî saí râ matú, Azali-a é yhang zo Shahpan, wà zau Mase-a eq kâ xûm hpó Yo-ahaza é yhang zo Yo-a pé lé nhang kat ri.
9 Yhángmòq gi, hkyangjong mó Hiliki-a chyáng ê mù, hkum zúng bang nghut é Lewiq byu pê èq, Manase mau eq Ehprim mau mâ é byu pé eq nyi myìt gyó tô é Isira-elaq bànshoq bâng chyáng mai le, Yudaq mau eq Ben-yamin mau mâ é byu pé eq Yerusalem wà mó má nyi é bang bànshoq chyáng mai le, hkyui yù mù, Garai Gasâng é noqkuq yhûm má yu wàng bê nghut é ngùn lé, yhâng é lòq má àp byî akô nghut ri. 10 Hau htâng, yhángmòq gi, haû Yhûmsîng Garaî é noqkuq yhûm saî é múzó wú gôn é bang lé ngùn haû àp byi kô é nghut mù, haú bang gi, noqkuq yhûm haû saî saî é bang lé htòt byî akô nghut ri. 11 Hau htoq agó, yhángmòq gi, Yudaq hkóhkam pé hpyoq hkyô pyâm nhang é yhûm pé lé saî saí râ matú, kyûng yúng tô é lùqgòk pé eq sik pé lé wui yù sháng gàq ga, làksima pé eq yhûm saí bang lé le ngùn byî akô nghut ri.
12 Haû mú zui saí bang gi, jujúm myìt mai rago zui saî nyi akô. Múzó zui saí bang lé ùp é bang gi, Merari koq mai nyi gyó lo é Lewiq byù Yahat eq Obadi-a nhik, Kohat koq mai nyi gyó lo é Zehkariq eq Meshulam nhik nghut akô. Mùt é bàt é jung pé lé rago dàt mùt dàt bàt é bang bànshoq nghut é Lewiq byu pé gi, 13 mú zui bang lé wú gon mù, múzó a-myû myû zui saí bang lé mú tsing gâm byî é bang nghut akô. Lewiq byu pé ra-am gi, kâ xûm bang, laiká ká bang eq hkum zúng bang nghut bum akô nghut ri.
Târâ Laiká Bùk Myang Ho É Hkyô
14 Yhángmòq gi, haû Yhûmsîng Garaî é noqkuq yhûm má kat to bê é ngùn lé yu htoq é u, hkyangjong Hiliki-a gi, Mosheq dông byî tô é haû Yhûmsîng Garaî é târâ laiká bùk lé myang záng ri. 15 Haû mù, yhang gi, kâ xûm hpó Shahpan lé, “Ngò gi, haû Yhûmsîng Garaî é noqkuq yhûm má târâ laiká bùk lé myang ri.” ga taí mù, yhang lé târâ laiká bùk haû byî ri.
16 Haû jáng, Shahpan gi, hkóhkâm hpô chyáng laiká bùk haû yu ló mù, yhang lé, “Náng é zaugun wuì lé nàng hun tô é wò bànshoq, yhángmòq zui saî nyì bekô nghut ri. 17 Yhángmòq gi, haû Yhûmsîng Garaî é noqkuq yhûm mâ é ngùn lé yu htoq mù, mú zui bang lé wú gôn é bang eq mú zui bang lé, àp byi bekô nghut ri.” ga shit kyô akô. 18 Hau htoq agó, kâ xûm hpó Shahpan gi, haû hkóhkâm lé, “Hkyangjong Hiliki-a gi, ngo lé laiká rabùk byî ri.” ga hkyang shit mù, haû hkóhkâm hpô é hí má haú lé nghap kyô ri.
19 Hkóhkâm hpó gi, târâ laiká mâ é dang pé lé wó gyô é hkûn, yhâng é buhîng lé lâng cheq pyâm ri. 20 Haû mù, yhang gi, Hiliki-a, Shahpan é yhang zo Ahikam, Mihka é yhang zo Apdon, kâ xûm hpó Shahpan eq hkóhkam é duìnhâng zoshâng Asai-a pé lé hkunmó hkyô ri. Hkunmó haû gi, 21 “Shî myang yu é laiká bùk má kâ tô é eq séng luî, ngá é matú le, Isira-elaq mau eq Yudaq mau má nyi myìt gyó to bâng é matú le, haû Yhûmsîng Garai lé ê myî wú keq. Hkâsu mù gâ le, ngá-nhûng é hí mâ é îchyí îwâ pé gi, haû Yhûmsîng Garaî é dang lé a cháng kô é nghut mù, haû Yhûmsîng Garai gi, ngá-nhûng é ahtoq má nhikjum mó yo bê nghut ri. Yhángmòq gi, laiká bùk shî má kâ tô é bànshoq eq rajung za a kut kó nghut ri.” gâ é nghut ri.
22 Haû mù, Hiliki-a eq hkóhkâm nhang kat é bang gi, Hasira é yhang shu, Tokhat é yhang zo, mèbu zúng sû Shalum é yhûmsîng myhí, myìqhtoi myhí Hulada chyáng ê huî nyo akô; yhang gi, Yerusalem wà mó mâ é Wà Sik túm má nyi é sû nghut ri.
23 Haú hkûn, yhang gi, yhángmòq lé, “Isira-elaq é Garai Gasang, haû Yhûmsîng Garai taî le, Ngo lé lé hui râ matú núngmòq lé nhang kat é sû lé shî su nghû taí keq; 24 ‘Haû Yhûmsîng Garai taî le, “Ngò gi, Yudaq hkóhkam é hí má nghap bê nghut é, laiká bùk shî má kâ tô é nhinghkun bànshoq lé, shí jowò eq shî mâ é byu pê é ahtoq má myìt myo ûng wom hkyô jé nhâng râ nghut lhê. 25 Haî mù gâ le, yhángmòq gi, Ngo lé tô pyám kô mù, gótû hparà pê é matú namngón hkungga nyhê nhông byi luî, yhángmòq lòq èq saî é zè bànshoq èq Ngo lé nhikjum lhoqyo kô é nghut mù, Ngá é nhikjum yo hkyô lé gi, shí jowò má hut hkyó râ nghut mù, haû gi, jôm byùq râ a nghut.” gâ ri.’ nghû keq. 26 Haû Yhûmsîng Garai lé myi râ matú núngmòq lé nhang kat é Yudaq hkóhkâm lé shî su nghû taî kyo keq; ‘Núngmòq wó gyô é dang pé eq séng luî, Isira-elaq é Garai Gasang, haû Yhûmsîng Garai taî le, 27 “Shí jowò eq shí má nyi é bang lé taî htuqhtîng é dang lé nàng wó gyô é hkûn, náng é i-myìt hkâm zo luî, Garai Gasâng é hí má nàng i-myìt lhoqnyhum é yánmai le, náng gûng nàng i-myìt lhoqnyhûm luî, náng é mèbu lâng cheq pyám mù, Ngá é hí má wùt ngau é yánmai le, Ngò gi, nang lé gyo byi bê nghut lhê. Haû gi, Yhûmsîng Garai taî pyo é nghut ri. 28 Ahkuî, Ngò gi, nang lé, náng é îchyí îwâ pê chyáng ló bo zùp nyi byùq nhâng râ nghut mù, nàng gi, ngón za myhup yhûm pyâm é hui râ nghut lhê. Nàng gi, shí jowò eq shí má chyungxe dui nyì bâng é ahtoq má Ngò hkyô kat râ nghut é myìt myo ûng wom hkyô bànshoq lé myàng râ a nghut.” nghû keq.’ gâ ri.” ga taî ri.
Haû mù, yhángmòq gi, yhâng é dang lé hkóhkam chyáng wun ló byi bê nghut ri.
29 Haú hkûn, hkóhkâm hpó gi, Yudaq mau eq Yerusalem wà mó mâ é sûwún wuî bànshoq lé wùt tsîng yu ri. 30 Yhang gi, Yudaq mau mâ é byu pé, Yerusalem wà mó má nyi é bang, hkyangjông pé, Lewiq byu pé eq mingbyû wuì tiq zo ko zo bànshoq bang eq rahá, haû Yhûmsîng Garaî é noqkuq yhûm má dòq ê mù, yhángmòq gyô tô é má, haû Yhûmsîng Garaî é noqkuq yhûm má myang é dangshikaq laiká bùk mâ é dang bànshoq lé nghap kyô ri. 31 Hau htoq agó, hkóhkâm hpó gi, yhâng é zìng mó nàm má yàp to mù, haû Yhûmsîng Garaî é htâng châng nyì râ matú le, Yhâng é hkunmó pé, cháng ra târâ pé eq târâ wàng hkunmó pé lé, yhâng é i-myìt nhiklhum bànshoq eq i-myìt sô lhum gón èq châng nyì râ matú le, laiká bùk shî má kâ tô é dangshikaq mâ é dang pé lé jì-no gyo râ matú le, haû Yhûmsîng Garaî é hí má dangshikaq tô tô ri.
32 Haû mù, Yerusalem wà mó má nyi é eq Ben-yamin mau má nyi é yùq hkangmó lé, dangshikaq haû cháng râ matú dakâm nhang ri; Yerusalem wà byu pé gi, yhángmòq é îchyí îwâ pê é Garai Gasang nghut é, Garai Gasâng é dangshikaq eq rajung za haú hkyô lé kut akô nghut ri.
33 Yosi-a gi, Isira-elaq byu pé eq sêng é maumyî bànshoq mâ é achaq achyut é hparà lhô pé bànshoq lé huî sêng pyâm ri; yhang gi, Isira-elaq mau má nyi é byù bànshoq lé, yhángmòq é Garai Gasang nghut é, haû Yhûmsîng Garai lé dójaú nhang ri. Yhángmòq le, yhâng é i-pyàt má, yhángmòq é îchyí îwâ pê é Garai Gasang, haû Yhûmsîng Garaî htâng a cháng a kut kó nghut ri.