Yudaq Hkóhkâm Manase
33
Manase gi, chyungxe zànwut raxe í zân má hkóhkâm dùt mù, Yerusalem wà mó má ngó xe ngo zân ùp ri. 2 Yhang gi, Isira-elaq byu pê é hí mai haû Yhûmsîng Garaî èq hkat htoq pyám bê nghut é gótû a-myû wui é achaq achyut hkyô cháng luî, haû Yhûmsîng Garaî é myòq hí má agè ashop é hkyô kut ri. 3 Yhang gi, yhâng wa Hezeki-a hpyoq hpyi pyám bê nghut é myhang é hparà noq jowò pé lé dum saî saí mù, Balaq hparà pê é hkungga gyàp pé lé dum saî tsûng luî, Ashera hparà zìng pé lé saî shap mù, mauhkûng mâ é kyî pé bànshoq lé paî gòp noqkuq ri. 4 Yhang gi, haû Yhûmsîng Garai mai, “Yerusalem wà mó má Ngá é Myìng ahtum abyùq jòq nyì râ nghut lhê.” ga taî é, haû Yhûmsîng Garaî é noqkuq yhûm má gótû hkungga gyàp pé saî jàt tô ri. 5 Haû Yhûmsîng Garaî é noqkuq yhûm mâ é wânghkaû í lhum má le, mauhkûng mâ é kyî pé bànshoq é matú hkungga gyàp pé saî tô ri. 6 Hau htoq agó, yhang gi, Hinom Zo gâ é Langhkaû má yhang zô pé lé nyhê nhông byi luî, bùt hpyit é, mhántán lòklèq kut é, bùt wú é, sôbyô dàt ji é bang eq bùt hpyit bâng chyáng mai hpàqchyî yu ri. Yhang gi, haú dông mai Yhûmsîng Garaî é myòq hí má agè ashop é hkyô myo myo kut mù, Yhang lé nhikjum lhoqyô ri.7 Yhang gi, yhang saî é hparà lhô lé yù mù, Garai Gasâng é noqkuq yhûm má kat tô ri; nghut kôle, noqkuq yhûm haû eq séng luî, Garai Gasang gi, Dawiq eq yhang zo Sholumon lé, “Ngò gi, Isira-elaq a-myû up bànshoq mai hkyin htoq yu é noqkuq yhûm shî eq Yerusalem wà mó má Ngá é myìng lé ahtum abyùq tô to râ nghut lhê. 8 Mosheq dông Ngò mai yhángmòq lé hkunmó hkyô tô é târâ pé, târâ wàng hkunmó pé eq cháng ra târâ pé bànshoq lé, Isira-elaq byu pé rago châng nyi é za nghut jáng, Ngò gi, yhángmòq é îchyí îwâ pé lé byî tô é mau mai yhángmòq lé dum htòt htoq ló nhâng râ a nghut.” ga taî tô é nghut ri. 9 Nghut kôlhang, Manase gi, Yudaq byu pé eq Yerusalem wà mó má nyi é bang lé hkyô shuî nghoq mù, yhángmòq gi, haû Yhûmsîng Garaî èq Isira-elaq byu pê é hí má lhoqhtên pyám bê nghut é gótû byù myû wui htoq je riyhang agè ashop hkyô kut akô nghut ri.
10 Haû Yhûmsîng Garai gi, Manase eq yhâng é byu pé lé lhoqpun lhoqkyîng wú kôlhang, yhángmòq gi, a gyo kó nghut ri. 11 Haû mù, haû Yhûmsîng Garai gi, yhángmòq chyáng Asuri hkóhkam é gyèzaû pé lé lé htim nhâng mù, Manase lé shúm byû dông chyup yû luî, yhâng é nhô má gòknghe nghe byi mù, gyi kyum hut luî, Babelon wà mó shut shuî ló bekô nghut ri. 12 Manase gi, haû su myìt myo ûng wum huî nyi é mai, yhâng é Garai Gasang nghut é, haû Yhûmsîng Garai lé kyûdung luî, yhâng é îchyí îwâ pê é Garai Gasâng é hí má gyai yhang i-myìt lhoqnyhûm bê nghut ri. 13 Yhang kyûdûng é eq dûng tôngbán é kut jáng, haû Yhûmsîng Garai gi, yhang lé gyo byi luî, Yerusalem wà mó eq yhâng é mîngdán má yhang lé shuî taû lò bê nghut ri. Haû mù, haû Yhûmsîng Garai gi, Garai Gasang nghut é hkyô lé, Manase wó sé bê nghut ri.
14 Hau htâng, yhang gi, Gihon mâ é wuìbúm é buìwàng hkyam langhkaû mai, Ngozo Hkum hí jé shoq, Dawiq é Wà shinggan má wàhkûm wàm mù, Ohpela bùm lé le wam lhóm luî, gyai yhang myhâng shoq wam to bê nghut ri. Hau htoq agó, yhang gi, Yudaq mau mâ é gingtíng wà mó bànshoq má gyèzaû pé tsing nyhi tô ri.
15 Hau htâng, yhang gi, gótû a-myû wui é hparà pé lé le, haû Yhûmsîng Garaî é noqkuq yhûm má tô tô é hparà lhô lé le, noqkuq yhûm bùm htoq eq Yerusalem wà mó má, yhang saî tsung tô é hkungga gyàp pé bànshoq lé le, tsing hkyom pyám luî, wà shinggan má ê dú pyâm ri. 16 Hau htâng, yhang gi, haû Yhûmsîng Garaî é hkungga gyàp lé dum saî saí mù, hau é ahtoq má zùmhkaû hkungga pé eq jeju bun hkungga pé lé nhông byi luî, Isira-elaq é Garai Gasang, haû Yhûmsîng Garai lé dójaú râ matú, Yudaq mau bang lé taî tô ri. 17 Haû mingbyû wuì gi, myhang é hparà noq jowò pé má hkungga nhông byî nyì kôlhang, yhángmòq é Garai Gasang nghut é, haû Yhûmsîng Garai lé za nhông byî akô nghut ri.
18 Manase ùp é gótû hkyô pé, yhâng é Garai Gasang lé yhang kyûdûng é hkyô eq, Isira-elaq é Garai Gasang, haû Yhûmsîng Garaî é myìng mai yhang lé myìqhtoî pé taî é dang pé lé gi, Isira-elaq hkóhkam pê é mhô-myi shindâm laiká bùk má tsing kâ tô é nghut ri. 19 Yhang kyûdûng é hkyô eq yhang dûng tôngbán luî yhang lé Garai Gasang hkâsu kut byî é hkyô, yhâng é i-myìt a lhoqnyhûm shî é hkun lhê é, yhâng é yubàk mara pé, a jujúm é hkyô pé, myhang é hparà noq jowò pé saî to luî, Ashera zìng xuq tô é eq hparà lhô pé saî shap tô é jowò hkyô pé lé gi, myìqhtoî pê é laiká má tsing kâ tô é nghut ri. 20 Manase gi, yhâng é îchyí îwâ pé eq ló bo bánnô byùq bê nghut mù, yhâng é hkóhkâm wâng má myhup yhûm pyâm é huî ri. Yhang zo Amon gi, yhâng é hkóhkâm hkô má zùng bê nghut ri.
Yudaq Hkóhkâm Amon
21 Amon gi, chyungxe zànwut í xe í zân má hkóhkâm dùt mù, Yerusalem wà mó má í zân ùp ri. 22 Yhang gi, yhâng wa Manase kut é su, haû Yhûmsîng Garaî é myòq hí má agè ashop é hkyô kut ri. Yhang gi, Manase saî é hparà lhô pé bànshoq lé noqkuq mù, hkungga pé nhông byî ri. 23 Nghut kôlhang, Amon shí yùq gi, yhâng wa Manase su, haû Yhûmsîng Garaî é hí má i-myìt a lhoqnyhum é nghut mù, yubàk mara je riyhang lhoqmyô jàt yu ri.