Yerusalem Wà Mó Lé Senahkerip Tân Kyuq É Hkyô
32
Hezeki-a èq haú hkyô pé bànshoq lé gyai jujúm é myìt mai ban kut é htâng má, Asuri hkóhkâm Senahkerip gi, Yudaq mau má lé chyîn wàng mù, gingtíng wà mó pé lé lhom hkyùq to luî, haú pé lé ùp sing yù râ haq htung nyi ri. 2 Senahkerip lé jé mù, Yerusalem wà mó lé majan zan râ haq htung nyi é hkyô lé Hezeki-a myàng jáng, 3 yhang gi, haû wà shinggan mâ é wuìbúm pé lé xaû pyám râ matú, yhâng é zaugun wuì eq sârhe pé lé hpyê é hkûn, yhángmòq gi, yhang lé garúm bekô nghut ri. 4 Yhángmòq gi, byù myo myo lé shuî tsîng yù mù, “Asuri hkóhkam pé lé lo é hkûn, haî mù wuì agùn agó jòq é lé myàng nhâng râ lhú?” ga taí kôluî, wuìbúm bànshoq eq mau káng mai yui é wuìlàng zo lé xaû pyám bekô nghut ri. 5 Yhang gi, byòq byùq bê nghut é wàhkûm pé lé saî saî shi-kùt mù, haú pé má mâchya pé saî to luî, hau é shinggan má wàhkûm ralhum dum saí mù, Dawiq é Wà mâ é lhoqmyhang é jowò mâ é gyèdap lé lhoq gingtîng to luî, shâm lhâm eq gòlong pé myo myo saî tô ri.6 Yhang gi, mingbyû wuì lé wú gon râ matú gyèzaû pé lé wò byi mù, wàhkum hí mâ é lam é jowò má yhángmòq lé ji tsîng to luî, yhángmòq lé, 7 “Wum-o lhoqkíng luî, myìt wum lhoqhtan to keq. Asuri hkóhkâm hpó eq yhâng htâng châng é gyè hpúng mó é yánmai, hkâgyùq kó; myìt wum le hkâgyui kó; hkâsu mù gâ le, ngá-nhúng eq rahá nghut é wum-o a-tsam gi, yhâng é htoq gyaú é nghut lhê. 8 Yhâng chyáng gi, byu é lòqbú wum za nghut nyi ri; ngá-nhûng chyáng kúm gi, ngá-nhûng lé majan bo zân garúm é, ngá-nhûng é Garai Gasang nghut é, haû Yhûmsîng Garai rahá nghut nyi lhê.” ga wum byi dang taî ri. Haû mù, mingbyû wuì gi, Yudaq hkóhkâm Hezeki-a taî é dang yánmai, myìt wum wó lhoqkîng yù bekô nghut ri.
9 Hau htâng má, Asuri hkóhkâm Senahkerip gi, yhâng é gyè hpúng mó eq rahá Lahkisha wà lé lhom hkyùq to mù, yhâng é zaugun wuì lé Yerusalem wà mó mâ é Yudaq hkóhkâm Hezeki-a eq Yudaq byù bànshoq bâng chyáng nhang kat luî,
10 “Asuri hkóhkâm Senahkerip taî le, núngmòq gi, Yerusalem wà mó lé lhom hkyùq tô é hui shoq, haî lé wá lùmhkau nyi akô lhú? 11 ‘Ngá-nhûng é Garai Gasang nghut é, haû Yhûmsîng Garai gi, ngá-nhúng lé Asuri hkóhkam é lòq mai hkyi yù râ nghut lhê.’ ga Hezeki-a taî é gi, núngmòq lé hkyô shuî nghoq mù, zò-mut wuìshit nhâng luî, shuî shi byùq râ matú ru nghut lhê. 12 Hezeki-a shí yùq yhang, Yhûmsîng Garaî é myhang é jowò pé eq hkungga gyàp pé lé hpyoq hpyi pyám mù, Yudaq byu pé eq Yerusalem wà mó má nyi é bang lé, ‘Núngmòq gi, hkungga gyàp ralhûm é hí má za noqkuq mù, hau é htoq má za hkungga pé nhông byi ra râ nghut lhê.’ ga taî é a nghut lhí?
13 Ngò eq ngá é îchyí îwâ pé gi, gó-mau pé mâ é a-myû wuì bànshoq lé hkâsu kut pyám bê hkyô lé, núngmòq a sé kó lhú? Gótû byù myû wuì haú pê é hparà pé gi, yhángmòq é mau lé, ngá é lòq mai wó hkyi xe yu é nghut akô lhú? 14 Ngá é îchyí îwâ pé mai lhoqhtên pyám bê nghut é byù myû haú pê é hparà bànshoq mâ é hparà hkâ gi, yhâng é byu pé lé ngá chyáng mai wó hkyi yu wú é lhú? Haû nghut jáng, núngmòq é Garai Gasang gi, núngmòq lé ngá é lòq mai hkâsu kut wó hkyi yù râ lhú? 15 Haû mù, ahkuî, Hezeki-a lé hkâ-mhaú zô yù nhâng kó; haú hkyô mai, hkyô hkâshuî nghoq nhâng kó. Hká a-myû, hká mîngdán mâ é hparà gi, yhâng é byu pé lé, ngá é lòq mai le, ngá é îchyí îwâ pê é lòq mai le, a wó hkyi yu wú nghut é yánmai, yhang lé hkâjíng kó. Núngmòq é Garai Gasang gi, je riyhang núngmòq lé ngá é lòq mai wó hkyi yù râ a nghut.” ga danglù châng hun kat ri.
16 Senahkerip é zaugun wuì gi, haû Yhûmsîng Garai Gasang lé le, yhâng é duìnhâng zoshâng Hezeki-a lé le, htuqhtîng é dang taî jàt ashi kô nghut ri. 17 Hau htoq agó, hkóhkâm hpó gi, Isira-elaq byu pê é Garai Gasang, haû Yhûmsîng Garai lé rhoî jihkyoî gâ é laiká ká mù, “Gó-mau pé mâ é a-myû wui é hparà pé gi, yhángmòq é byu pé lé ngá é lòq mai a wó hkyi xe yù kô é su, Hezeki-a é Garai Gasang le, Yhâng é byu pé lé ngá é lòq mai wó hkyi xe yù râ a nghut.” ga Yhang lé htuqhtîng é dang taî akô nghut ri. 18 Haû mù, yhángmòq gi, Yerusalem wà mó lé zân ung yù râ ga, wàhkûm htoq má nyi tô é Yerusalem wà byu pé lé, kyuq nghâ mù, myìt wui myìt hke dùt nhâng râ matú, Hebre myíng dông haú lé taî garû akô nghut ri. 19 Yhángmòq gi, byu é lòq èq saî é, mingkan mâ é gótû byu pê é hparà pé eq séng luî taî kô é su, Yerusalem wà mó mâ é Garai Gasâng é hkyô eq séng luî taî bum akô nghut ri.
20 Haû mù, Hkóhkâm Hezeki-a eq Amozi é yhang zo myìqhtoi Esai-a gi, haú hkyô eq séng luî, mauhkûng shut wùt dûng ngau akô nghut ri. 21 Haû mù, haû Yhûmsîng Garai gi, maumang lagyo rayùq lé nhang kat é nghut luî, yhang gi, Asuri hkóhkam é gyèwap mâ é sârhe pé, gyèzaû pé eq zaugun wuì bànshoq lé sat pyâm ri. Haû mù, hkóhkâm hpó gi, hoq hpû é eq yhâng é mau shut taû ló bê nghut ri. Yhang gi, yhâng é hparà lé noq é yhûm má wang e é hkûn, yhâng é suisho nghut é yùqzô pé ra-am gi, yhang lé sham èq sat pyâm akô nghut ri.
22 Haû mù, haû Yhûmsîng Garai gi, Hezeki-a eq Yerusalem wà byu wuì lé, Asuri hkóhkâm Senahkerip é lòq mai le, gótû gyè pé bànshoq é lòq mai le, hkyi yù bê nghut mù, lhînghkyùq shut yhángmòq lé wú magûm byî ri. 23 Byù myo myo gi, haû Yhûmsîng Garaî é matú, Yerusalem wà mó má chyûnghuq yu lé bûm kômù, Yudaq hkóhkâm Hezeki-a lé le hpau dap é zè pé lé byî akô nghut ri. Haú hkûn mai, yhang gi, byù myû bànshoq bâng èq gyai yhang wàq toq é hui bê nghut ri.
Hezeki-a É Nghutbun Hkyô, Ûngmyuq Hkyô Eq Shi Byùq É Hkyô
24 Haú yòq haú bun má, Hezeki-a gi, shî nò no nyi é nghut mù, haû Yhûmsîng Garai lé kyûdûng ri; haû Yhûmsîng Garai le, yhang lé gyo byi mù, maúhpo alhô agàn shit byî ri. 25 Nghut kôlhang, Hezeki-a gi, i-myìt má nghutbûn é yánmai, yhang wó hkam yu é jeju lé, jeju a dàt bûn é nghut mù, haû Yhûmsîng Garaî é nhikmó-yo hkyô gi, yhâng chyáng le, Yudaq mau eq Yerusalem wà mó ahtoq má le, jé bê nghut ri. 26 Haû mù, Hezeki-a gi, yhang nghutbûn é myìt lé tô pyâm é nghut mù, Yerusalem wà byù wuì le myìt lhoqnyhum pyâm akô nghut ri. Haû mù, haû Yhûmsîng Garaî é nhikmó-yo hkyô gi, Hezeki-a é i-pyàt má, yhángmòq chyáng a jé lo nghut ri.
27 Hezeki-a gi, sùtzè eq xânghpoq nge wó hkyô myo myo wó é nghut mù, yhâng é ngùn, hîng, lungsêng pé, namngón jung pé, gòlong pé eq gù bo jung bànshoq hkong to râ matú, sùtzè yhûm pé saî ri. 28 Hau htoq agó, yhang gi, gùqzò muilhum, tsibyiq wing asik eq tsanlun xû pé kat to râ matú, chyî pé saí luî, no a-myû myû eq sau bainám hpúng pê é matú, hkup pé saî ri. 29 Garai Gasang gi, yhang lé sùtzè gyai wó nhang é nghut mù, yhang gi, wà pé xuq tô é nghut luî, sau bainám hpúng eq no myang pé myo myo wó bê nghut ri.
30 Hezeki-a shi yùq gi, Gihon mâ é ahtoq wuìbúm lé xaû pyám mù, Dawiq é Wà buìwàng hkyam ang ang mai pê hâng yù sû nghut ri. Yhang gi, kut e ló é hkyô hkangmó má wó ûngmyuq é sû nghut ri. 31 Nghut kôlhang, yhâng é mau má maúhpo alhô agàn dùt htoq é hkyô lé myî wú râ matú, Babelon zau wuî mai lagyô pé nhang kat kô é hkûn, Garai Gasang gi, yhang lé chyam wú râ matú le, yhâng é i-myìt má lúng é hkyô bànshoq lé wó sé râ matú le, yhang lé baú nyhi tô ri.
32 Hezeki-a ùp é gótû hkyô pé eq yhang jujúm é hkyô pé lé gi, Yudaq eq Isira-elaq hkóhkam pê é laiká bùk má, Amozi é yhang zo myìqhtoi Esai-a é shing-rán má kâ tô ri. 33 Hezeki-a gi, yhâng é îchyí îwâ pê chyáng ló bo bánnô byùq bê nghut mù, Dawiq é awùt ashîn pê é lùpdùng nghut é bùm má myhup yhûm pyâm é huî ri. Yudaq byu pé eq Yerusalem wà byu pé bànshoq bang gi, yhang shi byùq é hkûn, yhang lé gyai hkúngga hpautap akô nghut ri. Yhang zo Manase gi, yhâng é hkóhkâm hkô má zùng bê nghut ri.