31
Poî múzó haû ban kut é hkûn, zùp zîng tô é Isira-elaq byu pé gi, Yudaq wà pé shut htoq ê mù, chyoiyúng lùqzìng pé lé bàt hkyop pyám luî, Ashera hparà zìng pé lé zân lhêng pyâm akô; hau htoq agó, yhángmòq gi, Yudaq mau, Ben-yamin mau, Ehprim mau eq Manase mau bànshoq mâ é myhang é hparà noq jowò pé eq hkungga gyàp pé lé tsing lhoqhtên pyâm akô. Yhángmòq gi, haú pé bànshoq lé lhoqhtên pyám kô é htâng má, ó le ô é wà, ó le ô é yhûm yò shut taû ló bekô nghut ri.Dójaú É Má Àp Nhong É Zè Pé
2 Hau htâng, Hezeki-a gi, hkyangjông pé eq Lewiq byu pé, ó le ô é hpúng má âng é eq rajung za, wò âng é má cháng luî, haû Yhûmsîng Garai nyi é jowo é wâng hkum hkaû má, myi nyhé hkungga pé eq zùmhkaû hkungga pé lé nhông byi luî, múzó dójaú mù, jeju hkya-on luî, hkya-on kúngtôn mahkôn hkôn râ matú, yhángmòq lé san kut wò byî to bê nghut ri. 3 Hau htoq agó, hkóhkâm hpó gi, haû Yhûmsîng Garaî é târâ má kâ tô é eq rajung za, nàpkyó myínhtâng nhông râ myi nyhé hkungga pê é matú le, Bánno Buìnyì pé, Lhôxan Lhôsik buìnyì pé eq ding tô é poî pé má nhông râ myi nyhé hkungga pê é matú le, yhâng é sùtzè pé mai àp nhông byî ri. 4 Hau htâng, yhang gi, hkyangjông pé eq Lewiq byu pé mai haû Yhûmsîng Garaî é târâ lé rago wó châng nyì kó sháng gàq ga, yhángmòq lé byi âng é gàmbùm tsing byi râ matú, Yerusalem wà mó má nyi é shiwa byu pé lé hkunmó hkyô ri. 5 Isira-elaq byu pé gi, hkunmó haú lé wó gyo kô é hkûn yhang, sânghi myhîng é gùqzò muilhum, tsibyiq wing asik, tsanlun xû, byo-î eq yhángmòq é yò pé mai htoq é jung hkangmó lé, byí nau é myìt mai myo myo chôm byî akô; yhángmòq gi, jung hkangmó mâ é xê gàmbùm mâ é ragàmbùm lé gyai myo shoq yhang byî akô nghut ri. 6 Yudaq mau mâ é wà pé má nyi é Yudaq byu pé eq Isira-elaq byu pé le, yhángmòq é no hpúng pé eq sau bainám hpúng pé mâ é xê gàmbùm mâ é ragàmbùm lé le, yhángmòq é Garai Gasang nghut é, haû Yhûmsîng Garai lé àp nhong é chyoiyúng zê pé mâ é xê gàmbùm mâ é ragàmbùm lé le, yu lé kô é nghut mù, haú pé lé lé bum zang to bekô nghut ri. 7 Yhángmòq gi, lha-mó sum hkyap hkyap mai lé bûm byî hî kôluî, lha-mó nyhit hkyap hkyap má byî pân akô nghut ri. 8 Hezeki-a eq yhâng é zaugun wuì gi, chyûnghuq haû bum zang tô é lé, lé myâng kôjáng, haû Yhûmsîng Garai lé jeju hkya-on mù, Yhâng é Isira-elaq byu pé lé shimân byî akô nghut ri.
9 Hezeki-a gi, hkyangjông pé eq Lewiq byu pé lé, chyûnghuq bum zang tô é hkyô eq séng luî myî ri; 10 haú hkûn, Zadok yhûm i-kun mâ é hkyangjong agyì Azari-a gi, “Shiwa byu pé mai haû Yhûmsîng Garaî é noqkuq yhûm má chyûnghuq pé lé byî hi é hkûn mai, ngá-mòq lùq shoq myàng zô é htoq agó, gyai myo shoq myìt tô ashî nghut ri; haû Yhûmsîng Garai gi, Yhâng é byu pé lé shimân byi bê nghut mù, shî myhó yhang myìt tô ashî nghut ri.” ga tû taî ri.
11 Hezeki-a gi, haû Yhûmsîng Garaî é noqkuq yhûm má zè kat râ wàp pé hên râ matú hkunmó hkyô é nghut mù, yhángmòq gi, hen to bekô nghut ri. 12 Haû mù, yhángmòq gi, jujúm myìt mai chyûnghuq pé, xê gàmbùm mâ é ragàmbùm pé eq àp nhong tô é zè pé lé wàq kat bekô nghut ri. Lewiq byù Hkonani-a gi, haú pé lé wú gon sû nghut ri; yhang gu Shimi gi, yhâng é a-ô mâ é wú gon sû nghut ri. 13 Yehi-ela, Azazi-a, Nahat, Asahela, Yerimot, Yozabat, Eli-ela, Isimahki-a, Mahat eq Benai-a pé gi, Hkonani-a eq yhang gu Shimi lé htuqbáng é bang nghut akô. Haú bang bànshoq gi, Hkóhkâm Hezeki-a eq Garai Gasâng é noqkuq yhûm lé wú gon zau Azari-a mai wò byî tô é eq rajung za dójaú akô nghut ri.
14 Buìhtoq Hkyam Hkum zúng é Lewiq byù Imna é yhang zo Kore gi, Garai Gasâng é matú àp nhong é byi naû hkungga pé lé wú gon mù, haû Yhûmsîng Garai lé byî tô é chyûnghuq pé lé le, chyoiyúng zè pé lé le, tsing gàm byî ri. 15 Eden, Mini-amin, Yeshu-a, Shemai-a, Amari-a eq Shehkani-a pé gi, hkyangjông pê é wà pé má jujúm myìt mai yhang lé htuqbáng é bang nghut akô; yhángmòq gi, yhángmòq é hkyangjong hpúng pé má cháng luî, hkyangjong nghut é mangzo zoshâng wuì lé tsing gàm byî akô nghut ri.
16 Hau htoq agó, haû Yhûmsîng Garaî é noqkuq yhûm má wàng mù, yhángmòq é ahpúng hpúng má cháng luî, wò byî tô é eq rajung za, nyí wuî yhángmòq é wò pé lé wùn wàq râ nghut luî, byùxik labaû má lom é, chyungxe zànwut sum zân lai bê é yùqzo bànshoq lé le, yhángmòq tsing gàm byî akô nghut ri. 17 Yhángmòq gi, byùxik labaû má yhángmòq é yhûmhtu má cháng luî myìng lom é hkyangjông pé lé le gàm byî akô; haû eq rajung za, yhángmòq é byù hpúng pé eq yhángmòq é wò pé má cháng luî, Lewiq byu pé mâ é í xê zàn lai bê é bang lé le, yhángmòq gàm byî akô nghut ri. 18 Shiwa byù hpúng gón eq sêng é, yhángmòq é byùxik labaû má lom é, zoshâng wuì, yhûmsîng myhî pé eq yùqzo byìzô pé bànshoq bang lé le, yhángmòq tsing gàm byî akô nghut ri. Hkâsu mù gâ le, yhángmòq gi, yhûmsing gùng lhoq chyoiyúng yu é hkyô má jujúm akô nghut ri.
19 Wà zo pé má nghut nghut, gótû wà mó pé má nghut nghut nyì mù, Lewiq byu pê é byùxik labaû má lom é bang bànshoq lé le, Arun é awùt ashín mâ é yùqzô pé yùq hkangmó lé le, yhángmòq é gàmbùm tsing gàm byi râ matú, ahtoq má myìng kâ tô é bang lé wò byî tô ri. 20 Shí hkyô gi, Hezeki-a mai Yudaq mau gón má kut é hkyô nghut ri; yhang gi, yhâng é Garai Gasang nghut é, haû Yhûmsîng Garaî é hí má, ge é, jo têng é eq jujúm é múzó kut é nghut ri. 21 Yhang gi, Garai Gasâng é noqkuq yhûm má dójaú é mú wùn wàq é eq târâ pé hkunmó pé châng kut é hkyô haî má le, yhâng é Garai Gasang lé hô mù, i-myìt nhiklhum bànshoq èq zui saî é nghut luî, kô myhâng bê nghut ri.