Hezeki-a Lhoqlhai Poî Shuî Kut É Hkyô
30
Hezeki-a gi, Yerusalem wà mó mâ é haû Yhûmsîng Garaî é noqkuq yhûm má lé mù, Isira-elaq é Garai Gasang, haû Yhûmsîng Garaî é Lhoqlhai Poî chôm kut râ matú, Isira-elaq mau gón eq Yudaq mau gón má byù ê jî nhang é htoq agó, Ehprim mau eq Manase mau má le laiká hun kat ri. 2 Haû gi, hkóhkâm eq yhâng é zaugun wuì, Yerusalem wà mó má nyi é shiwa byù hpúng bànshoq mai, lha-mó í hkyap hkyap má Lhoqlhai Poî kut râ matú chôm myìt hpyit to kô é yánmai nghut ri. 3 Hkâsu mù gâ le, yhángmòq gi, yhûmsing gùng lé lhoq chyoiyúng yu é hkyangjông pé a lùq shî é htoq agó, Yerusalem wà mó má mingbyû wuì a zùp zing shi kó nghut é yánmai, yhâng é ahkyíng má Lhoqlhai Poî lé a wó kut kat kó nghut ri. 4 Haú dông hen lajâng é hkyô gi, hkóhkâm hpó eq shiwa byù hpúng é myòq hí má ge é hkyô nghut nyi ri. 5 Haû mù, yhángmòq gi, shiwa byu pé lé, Yerusalem wà mó má lé mù, Isira-elaq é Garai Gasang, haû Yhûmsîng Garaî é Lhoqlhai Poî kut râ matú, Berasheba mai Dan wà jé shoq, Isira-elaq ra-mau gón má laiká pyo kat râ dông chôm myìt hpyit yû bekô nghut ri. Hkâsu mù gâ le, târâ laiká má kâ tô é eq rajung za, poî haú lé byù myo myô èq a kut é gyai myáng byùq bê nghut ri.6 Hkóhkâm hkunmó hkyô é eq rajung za, laiká dé bang gi, hkóhkâm eq yhâng é zaugun wui chyáng mai laiká yu chûng mù, Isira-elaq mau eq Yudaq mau gón má e ló bekô nghut ri. Laiká má,
“Isira-elaq byu pé ê, Asuri hkóhkam pê chyáng mai wó hpang lùt luî, nyi myìt gyó to bang núngmòq chyáng, Abraham, Isak eq Isira-elaq pê é Garai Gasang, haû Yhûmsîng Garai lhing lò sháng gàq, núngmòq le, Yhâng chyáng lhing lò keq. 7 Núngmòq é îchyí îwâ pé eq núngmòq é gu-mang Isira-elaq byu pé su hkâkut kó; yhángmòq gi, núngmòq é îchyí îwâ pê é Garai Gasang, haû Yhûmsîng Garai lé a jujúm kô é nghut mù, núngmòq myang é eq rajung za, Yhang gi, yhángmòq lé htên byòq hkyô má àp pyâm é nghut ri. 8 Núngmòq é îchyí îwâ pé su myìt htân bang hkâkut kó; haû Yhûmsîng Garaî chyáng àp nhông keq. Yhang ahtum abyùq lhoq chyoiyúng tô é Yhâng é chyoiyúng jowò má, lé keq. Núngmòq chyáng mai Yhâng é nhikmó-yo hkyô lhing ló byùq sháng gàq, núngmòq é Garai Gasang nghut é, haû Yhûmsîng Garai lé dójaú keq. 9 Haû Yhûmsîng Garaî chyáng núngmòq lhing taû lò kô é nghut jáng, núngmòq é gu-mang Isira-elaq byu pé eq núngmòq é zodù wuì gi, yhángmòq lé chyup ló bâng èq shogyo nhikmyîn é hui mù, shí mau má dum wó taû lò kôrâ nghut lhê; hkâsu mù gâ le, núngmòq é Garai Gasang nghut é, haû Yhûmsîng Garai gi, jeju byî é eq shogyo nhikmyîn é Sû nghut ri. Núngmòq gi, Yhâng chyáng lhing lo é nghut jáng, Yhang gi, núngmòq chyáng mai myòqdong lhing byùq râ a nghut.” ga kâ tô é nghut ri.
10 Laiká dé bang gi, Zebulun mau jé shoq, Ehprim mau eq Manase mau mâ é wà pé má rawà htâng rawà ê jé akô nghut ri; nghut kôlhang, mingbyû wuì gi, yhángmòq lé rhoî dang lhom taí kô é htoq agó, wuìzuì lhom kut pyám byî akô nghut ri. 11 Nghut kôle, Asheri up, Manase up eq Zebulun up mâ é bang ra-am gi, yhûmsing i-myìt lé lhoqnyhum pyám kômù, Yerusalem wà mó má e akô nghut ri. 12 Hau htoq agó, haû Yhûmsîng Garaî é dang cháng mù, hkóhkâm eq yhâng é zaugun wui é hkunmó eq rajung za châng kut râ i-myìt rahkat za wó dùt râ matú, haû Yhûmsîng Garai gi, Yudaq mau mâ é byu pé lé shimân byî ri.
13 Lha-mó í hkyap hkyap má, shiwa byù hpúng mó gi, Múnchi a bo é Mùk Zo Poî kut râ matú Yerusalem wà mó má zùp zîng tô bum akô nghut ri. 14 Yhángmòq gi, toq mù, Yerusalem wà mó mâ é hkungga gyàp pé eq namngón jung nyhê é hkungga gyàp pé lé hkyom wàq yù kôluî, Kidron Langhkaû má ê dú pyâm akô nghut ri.
15 Yhángmòq gi, lha-mó í hkyap hkyap raxe myi nyí nyí má Lhoqlhai Poî sau zo lé sat akô. Hkyangjông pé eq Lewiq byu pé gi, hoq bun kômù, yhûmsing gùng lé lhoq chyoiyúng yû kôluî, haû Yhûmsîng Garaî é noqkuq yhûm má myi nyhé hkungga pé wàq wang akô nghut ri. 16 Haû mù, yhángmòq gi, Garai Gasâng é byù Mosheq é târâ má kâ tô é eq rajung za, yhûmsing é jowò yù mù, hkyangjông pé gi, Lewiq byu pê èq byî é sui lé yù luî, hkungga gyàp má tsik gyûn akô nghut ri. 17 Yhûmsing gùng lé a lhoq chyoiyúng yû shî é byù myo myo haû shiwa byù hpúng hkaû má bo tô ashî nghut mù, Lewiq byu pé gi, htûngli dông a sanséng mù, haû Yhûmsîng Garaî é matú yhûmsing é sau zô pé lé a wó lhoq chyoiyúng é bang bànshoq é matú, Lhoqlhai Poî sau zô pé lé sat nhông byi râ dùt kô é nghut ri. 18 Ehprim, Manase, Yisahka eq Zebulun mau pé mai lé é byù myo mî-myo gi, yhûmsing gùng lé a lhoq chyoiyúng yû shi kô é nghut kôlhang, târâ laiká má kâ tô é pé dông a châng é za, Lhoqlhai Poî zoshuq lé zô akô nghut ri. Nghut kôlhang, Hezeki-a gi, yhángmòq é matú, “Haû gè Sû nghut é Yhûmsîng Garai gi, 19 chyoiyúng jowò mâ é htûngli dông a sansêng é nghut kôle, yhángmòq é îchyí îwâ pê é Garai Gasang, haû Yhûmsîng Garai lé yhángmòq é i-myìt nhiklhum mai châng ho nyi é bang lé mara hkyut pyám byi sháng gàq ô.” ga kyûdung byî ri. 20 Haú hkûn, haû Yhûmsîng Garai gi, Hezeki-a é dang lé gyo byi mù, shiwa byu pé lé lhoqgê byî ri.
21 Yerusalem wà mó má lé zîng bum é Isira-elaq byu pé gi, nyhit nyí yhang, gabú byam chyu uchyang Múnchi a bo é Mùk Zo Poî kut akô; Lewiq byu pé eq hkyangjông pé gi, haû Yhûmsîng Garai lé àp nhong tô é mùt jung bàt jung pé lé lhoqmyhíng mù, nyí wuî haû Yhûmsîng Garai lé hkya-on kúngton akô nghut ri.
22 Hezeki-a gi, haû Yhûmsîng Garai lé dójaú é múzó má rago sê gyô é myìt bo é Lewiq byù bànshoq bang lé dang ngón nyo ri. Haû mù, yhángmòq gi, poî haû nyhit nyí yhang, yhángmòq é gàmbùm zoshuq zo kômù, zùmhkaû hkungga pé nhông byi kôluî, yhángmòq é îchyí îwâ pê é Garai Gasang, haû Yhûmsîng Garai lé hkya-on kúngton akô nghut ri.
23 Haû shiwa byù hpúng gón gi, nyhit nyí poî xoq kut râ matú chôm myìt hui kômù, gabú tung poî nyhit nyí xoq kut bekô nghut ri. 24 Yudaq hkóhkâm Hezeki-a gi, shiwa byù hpúng lé, nohtó rahkyîng eq sau bainám nyhit hkyîng hên byî ri; haû zaugun wuì gi, nohtó rahkyîng du eq sau bainám ra-mun hên byî akô nghut ri. Hkyangjông pé myo myo le, yhûmsing gùng yhûmsîng lhoq chyoiyúng yu akô nghut ri. 25 Hkyangjông pé, Lewiq byu pé eq Isira-elaq mau mai lé zùp zîng é bànshoq bang le mù, Isira-elaq mau eq Yudaq mau má lé bíng nyi é gó-mîng byu pé eq Yudaq byù hpúng gón gi, gabú byam chyû nyi bum akô nghut ri. 26 Haû mù, Yerusalem wà mó má gyai yhang gabú é hkyô htoq bê nghut ri; hkâsu mù gâ le, Isira-elaq é Hkóhkâm Dawiq é yhang zo Sholumon é pyàt mai haú hkûn jé shoq, haû sû é gabú hkyô a jòq wú lo nghut ri. 27 Hkyangjông pé eq Lewiq byu pé gi, toq luî, shiwa byu pé lé shimân byi kôjáng, Garai Gasang gi, yhángmòq é dang lé gyo byî ri; hkâsu mù gâ le, yhángmòq é kyûdung dang gi, Yhâng é chyoiyúng nyì jowò nghut é mauhkûng má jé hkyâng bê nghut ri.