Yudaq Hkóhkâm Hezeki-a
29
Hezeki-a gi, chyungxe zànwut í xe ngo zân má hkóhkâm dùt mù, Yerusalem wà mó má í xe gau zân ùp ri. Yhâng nu gi, Zehkariq é yhang zo byìzo Abiya ga sû nghut ri. 2 Hezeki-a gi, yhâng é îchyí îwa Dawiq su, haû Yhûmsîng Garaî é myòq hí má jo têng é hkyô kut ri.3 Yhang gi, yhang ùp é sânghî zàn sânghî lhôhkyap má, haû Yhûmsîng Garaî é noqkuq yhûm mâ é hkum pé lé hpóng mù, haú pé lé saî saî ri. 4 Yhang gi, hkyangjông pé eq Lewiq byu pé lé, buìhtoq hkyam mâ é lam é jowò má ji tsîng to mù, 5 “Lewiq byu pé ê, ngá dang gyo keq! Núngmòq gùng núngmòq le, núngmòq é îchyí îwâ pê é Garai Gasang, haû Yhûmsîng Garaî é yhûm lé le, lhoq chyoiyúng mù, chyoiyúng jowò shî mâ é agòt a-u é zè bànshoq lé huî sêng pyám keq. 6 Ngá-nhûng é îchyí îwâ pé jujúm myìt a bo kômù, ngá-nhûng é Garai Gasang nghut é, haû Yhûmsîng Garaî é myòq hí má agè ashop é hkyô kut kôluî, Yhang lé tô pyâm akô nghut ri. Yhángmòq gi, haû Yhûmsîng Garai nyi é jowò mai myòqdong lhing pyám kômù, Yhang lé nùnghtáng shut tô pyám bekô nghut ri. 7 Hau htoq agó, yhángmòq gi, laìshînhtâng mâ é hkum pé lé le myhî pyám mù, myi-kok pé lé sat pyám luî, chyoiyúng jowò má Isira-elaq é Garai Gasang lé namngón hkungga pé le a nyhé byi, myi nyhé hkungga pé le a nhông byi kut akô nghut ri. 8 Haû mù, haû Yhûmsîng Garai gi, Yudaq mau eq Yerusalem wà mó lé nhikjum yo bê nghut mù, núngmòq myang é eq rajung za, yhángmòq lé, gyùq chiq é, gyùq dan ngha byùq é eq lùmù gànsang pyâm é hui nhâng bê nghut ri. 9 Haû nghut é yánmai, ngá-nhûng é îchyí îwâ pé gi, sham èq sat hui mù, ngá-nhûng é yhûmsîng myhî pé eq ngá-nhûng é yùqzo byìzô pé gi, shúm zung é hui bekô nghut ri. 10 Ahkuî, Isira-elaq é Garai Gasang, haû Yhûmsîng Garaî é nhikmó-yo hkyô gi, ngá-nhûng chyáng mai lhing ló byùq sháng gàq nghû, ngò gi, Yhang eq dangshikaq tó nau nyi ri. 11 Ngá zô pé ê, myìt hkâ-nyhuî nyhâm nyì lo kó; haû Yhûmsîng Garai gi, núngmòq lé, Yhâng é hí má yàp mù, Yhâng é duìnhâng zoshâng wuì dùt luî, Yhâng é hí má dójaú mù, namngón jung nyhê nhông râ matú hkyin yu to bê nghut ri.” ga taî ri.
12 Haû mù, múzó wùn wàq hi é Lewiq byu pé gi, a-ô mâ é eq rajung za nghut ri.
Kohat koq mai, Amasai é yhang zo Mahat eq Azari-a é yhang zo Yo-ela;
Merari koq mai, Apdi é yhang zo Kisha eq Yehalelela é yhang zo Azari-a;
Gerishon koq mai, Zimma é yhang zo Yo-a eq Yo-a é yhang zo Eden;
13 Elizahpan é awùt ashín pé mai, Shimri eq Yi-ela;
Asap é awùt ashín pé mai, Zehkariq eq Matani-a;
14 Heman é awùt ashín pé mai, Yehi-ela eq Shimi;
Yeduhtun é awùt ashín pé mai, Shemai-a eq Uzi-ela nghut ri.
15 Yhángmòq gi, yhángmòq é Lewiq gu-mang wuì lé wùt tsîng yù mù, yhûmsing gùng lé ban lhoq chyoiyúng kôjáng, haû Yhûmsîng Garaî é dang má cháng luî, hkóhkâm hpó hkunmó hkyô é eq rajung za, haû Yhûmsîng Garaî é noqkuq yhûm lé lhoq sân-yúng râ matú wang ê bekô nghut ri. 16 Hkyangjông pé gi, haû Yhûmsîng Garaî é chyoiyúng jowò lé lhoq chyoiyúng râ matú ahkaû wàp pé má wàng mù, haû Yhûmsîng Garaî é noqkuq yhûm má myang é agòt a-u é zè bànshoq lé, haû Yhûmsîng Garaî é noqkuq yhum é wânghkaû má tsing wàq htoq tô akô; Lewiq byu pé gi, haú pé lé Kidron Langhkaû má ê hkyom wàq kat pyâm akô nghut ri. 17 Yhángmòq gi, yhûm haú lé lhoq chyoiyúng râ matú sânghî lhôhkyap lhôxân nyí má hî mù, lhôxan shit nyí nyí má haû Yhûmsîng Garaî é yhûm laìshînhtâng má jé akô; hau htâng shit nyí yhang haû Yhûmsîng Garaî é yhûm lé lhoqchyoi lhoqyúng mù, sânghî lhôhkyap raxe hkyuq nyí nyí má wó lhoqpán bekô nghut ri.
18 Haú hkûn, yhángmòq gi, Hkóhkâm Hezeki-a chyáng ê mù, “Ngá-mòq gi, haû Yhûmsîng Garaî é noqkuq yhûm gón, myi nyhé hkunggâ é hkungga gyàp eq hau é chûngzè pé, ting tô é mùk ke râ mùkgyàp eq hau é zèhkoq bànshoq lé lhoq chyoiyúng to bê nghut lhê. 19 Hau htoq agó, Hkóhkâm Ahaza é pyàt má yhang a jujúm mù, yu htòt pyâm é zèhkoq pé bànshoq lé le, saî lajang luî, lhoq chyoiyúng yû mù, haû Yhûmsîng Garaî é hkungga gyàp hí má tô to bê nghut lhê.” ga hkyang shit akô nghut ri.
20 Haû mù, Hkóhkâm Hezeki-a gi, htang nàpsûn noq le toq luî, wà zaugun wuì lé wùt tsîng yù mù, haû Yhûmsîng Garaî é noqkuq yhûm shut dòq e ri. 21 Yhángmòq gi, mîngdán é matú le, chyoiyúng jowò haû eq Yudaq maû é matú le, mara hkyut hkungga nhông byi râ ga, nohtó nyhit du, saulo nyhit du, saulo zo nyhit du eq bainám lo nyhit du she e akô; haû mù, hkóhkâm hpó gi, haû Yhûmsîng Garaî é hkungga gyàp htoq má haú pé lé nhông byi râ matú, Arun é awùt ashín hkyangjông pé lé hkunmó hkyô ri. 22 Haû mù, yhángmòq gi, nohtó pé lé tsing sat jáng, hkyangjông pé haú bang gi, sui lé yù mù, hkungga gyàp má tsik gyûn akô; hau htâng, saulo pé lé sat mù, sui lé hkungga gyàp má tsik gyûn akô; hau htâng, saulo zô pé lé sat mù, sui lé hkungga gyàp má tsik gyûn akô nghut ri. 23 Hau htâng, mara hkyut hkunggâ é matú, bainám lo pé lé, hkóhkâm eq shiwa byù hpúng hí má she htoq yû kôluî, haú pê é ahtoq má yhángmòq é lòq chôm kê akô nghut ri. 24 Hau htâng, hkyangjông pé gi, haú pé lé sat luî, Isira-elaq byù bànshoq bâng é hkô htaí hkungga kut râ matú, mara hkyut hkungga dông sui lé hkungga gyàp htoq má nhong akô nghut ri; hkâsu mù gâ le, hkóhkâm hpó mai, Isira-elaq byù bànshoq bâng é matú myi nyhé hkungga eq mara hkyut hkungga nhông byi râ matú hkunmó hkyô tô é yánmai nghut ri.
25 Hau htoq agó, yhang gi, haû Yhûmsîng Garai mai Yhâng é myìqhtoî pé lé hkunmó hkyô tô é eq rajung za, Dawiq eq yhâng é myìqhtoî nhik Gat eq Nahtan sang tô é dông, chapchéng, tíng pé eq tíng góng pé bàt é Lewiq byu pé lé, haû Yhûmsîng Garaî é noqkuq yhûm má nyhi tô ri. 26 Haû mù, Lewiq byu pé gi, Dawiq é mùt jung bàt jung chûng mù, hkyangjông pé gi, yhángmòq é tut pé chûng luî, yàp tô bum akô nghut ri.
27 Hezeki-a gi, hkungga gyàp má myi nyhé hkungga nhông râ matú hkunmó hkyô ri. Haû hkungga nhong hi ló é hkûn, shiwa byu pé gi, tut mùt bang eq Isira-elaq hkóhkâm Dawiq é mùt jung bàt jung chûng mù mùt myhíng bàt myhîng é bang eq rahá, haû Yhûmsîng Garai lé mahkôn hkon hi bum akô nghut ri. 28 Shiwa hpúng gón gi, mahkôn hkôn bang mahkôn hkon nyi é eq tut pé mùt nyi bùm kô é u, myi nyhé hkungga ban nhong é hkûn jé shoq, ngóm gòp noqkuq akô nghut ri.
29 Hkungga pé ban nhong é hkûn, hkóhkâm eq haú má jé nyi é yùq hkangmó gi, hkyîhput htuqlùq mù, noqkuq bum akô nghut ri. 30 Hkóhkâm Hezeki-a eq yhâng é zaugun wuì gi, Dawiq é dang dông le, myìqhtoi Asap é dang dông le, haû Yhûmsîng Garai lé hkya-on kúngtôn râ matú, Lewiq byu pé lé hkunmó hkyô ri. Haû mù, yhángmòq gi, gabú myìt mai mahkôn hkya-on luî, ngóm gòp noqkuq akô nghut ri.
31 Haû mù, Hezeki-a gi, “Ahkuî, núngmòq gùng núngmòq, haû Yhûmsîng Garai lé àp nhong to bekô nghut mù, haû Yhûmsîng Garaî é noqkuq yhûm má shigu hkungga pé eq jeju bun hkungga pé yu lé byi lo keq.” ga taî ri. Haû mù, shiwa byù hpúng gi, shigu hkungga pé eq jeju bun hkungga pé yu lé byi kômù, yu lé nau é myìt bò bang gi, myi nyhé hkungga pé lé yu lé akô nghut ri.
32 Shiwa byù hpúng yu lé é myi nyhé hkungga bànshoq gi, nohtó nyhit xê du, saulo rashô du eq saulo zo í shô du nghut ri; haú pé bànshoq gi, haû Yhûmsîng Garai lé myi nyhé hkungga nhông byi râ matú chyat nghut ri. 33 Lhoq chyoiyúng tô é shigu hkungga bànshoq gi, nohtó hkyuq shô du eq sau bainám sum hkyîng du nghut ri. 34 Hkyangjông pé gi, myi nyhé hkungga bànshoq é sho-kuq hí râ byù shau kô é nghut mù, yhángmòq é gu-mang Lewiq byu pé gi, yhángmòq é múzó ban zui saí shoq le, gótû hkyangjông pé wó lhoq chyoiyúng yû shoq le, yhángmòq lé garúm yu akô; hkâsu mù gâ le, Lewiq byu pé gi, yhûmsing gùng lé lhoq chyoiyúng yû râ matú, hkyangjông pê htoq je jujúm bum akô nghut ri. 35 Myi nyhé hkungga pé le, zùmhkaû hkungga pê é xû le, myi nyhé hkungga pé eq rahá nghut é shuq jung hkungga pé le, agùn agó yhang nghut ri.