Yudaq Hkóhkâm Ahaza
28
Ahaza gi, chyungxe zànwut í xê zàn má hkóhkâm dùt mù, Yerusalem wà mó má raxe hkyuq zân ùp ri. Yhang gi, yhâng é îchyí îwa Dawiq kut é su, haû Yhûmsîng Garaî é myòq hí má jo têng é hkyô a kut nghut ri. 2 Yhang gi, Isira-elaq hkóhkam pê é hkyô pé má cháng mù, Balaq hparà pé lé noq paí râ matú le, hparà lhô pé saî ri. 3 Hau htoq agó, yhang gi, haû Yhûmsîng Garaî èq Isira-elaq byu pê é hí mai hkat htoq pyâm é gótû a-myû wui é achaq achyut hkyô má cháng luî, Hinom Zo gâ é Langhkaû má hkungga pé nyhê nhông byi mù, yhang zô pé lé lháng myi nyhé hkungga pé dông nhông byî ri. 4 Yhang gi, myhang é hparà noq jowò pé má le, bùm nyuq pé má le, sikkoq hkyâm lam é sikgâm ô má lé, hkungga pé eq namngón hkungga pé nyhê nhông byî ri.5 Haû mù, yhâng é Garai Gasang nghut é, haû Yhûmsîng Garai gi, yhang lé, Aram hkóhkam é lòq má àp byî pyám bê nghut ri. Aram byu pé gi, yhang lé ûng mù, yhâng é byù myo myo lé shúm byû dông chyup yû luî, Damasikuq wà má shuî ló akô nghut ri.
Hau htoq agó, yhang gi, Isira-elaq hkóhkam é lòq má àp byî pyâm é le hui mù, Isira-elaq hkóhkâm gi, yhâng é mingbyû myo myo lé sat pyâm ri. 6 Yudaq byu pé gi, yhángmòq é îchyí îwâ pê é Garai Gasang, haû Yhûmsîng Garai lé tô pyám bekô nghut é yánmai, ra-nyí má za, Remali-a é yhang zo Peka gi, Yudaq mau má gyèzo rasên í mun lé sat pyám bê nghut ri. 7 Zihkri gâ é Ehprim byù sarhê hpó gi, hkóhkam é yhang zo Mase-a, hkóhkâm wâng lé wú gôn é zaugun Azirikam eq hkóhkam é a-ô mâ é sû Elakana lé sat pyâm ri. 8 Isira-elaq byu pé gi, Yudaq mau mâ é yhángmòq é gu-mang Isira-elaq byu pé mâ é, înu myhî pé eq yùqzo byìzô pé í sen lé shúm byû dông chyup yù mù, zè pé myo myo lú yu chûng luî, Samariq wà má taû ló bekô nghut ri.
9 Nghut kôlhang, haû má Odet gâ é haû Yhûmsîng Garaî é myìqhtoi rayùq nyi é nghut mù, yhang gi, Samariq wà má taû lo é gyè hpúng lé ê htoq hui mù, yhángmòq lé, “Núngmòq é îchyí îwâ pê é Garai Gasang, haû Yhûmsîng Garai gi, Yudaq byu pé lé nhikjum yô é yánmai, yhángmòq lé núngmòq é lòq má àp byî pyâm é nghut lhê; nghut kôlhang, núngmòq gi, mauhkûng lháng htung shoq yhángmòq lé shogyo myìt a bo é za sat kyop pyám bekô nghut ri. 10 Hau htoq agó, núngmòq gi, ahkuî le, Yudaq mau eq Yerusalem wà mó mâ é yùqgè myiwe wuì lé, núngmòq é jùn pé kut râ hen akô; nghut kôlhang, núngmòq le, núngmòq é Garai Gasang nghut é, haû Yhûmsîng Garai lé mara kut shut kô é a nghut kó lhí? 11 Haû mù, ngá é dang gyo keq! Núngmòq chyup lo é núngmòq é gu-mang Isira-elaq byu pé lé taû nhang kat keq; hkâsu mù gâ le, haû Yhûmsîng Garaî é nhikmó-yo hkyô gi, núngmòq chyáng jé râ nghut lhê.” ga taî ri.
12 Haû mù, Ehprim byu pé mâ é ushuq pé nghut é, Yehohanan é yhang zo Azari-a, Meshilemot é yhang zo Berehki-a, Shalum é yhang zo Yehiziki-a eq Hadilai é yhang zo Amasa pé gi, majan mai taû jé lo é bang lé lhom hkûm tâng mù, 13 “Núngmòq chyup lo é byù haú bang lé shî má ge shuî lò râ a nghut; haû nghut jáng, ngá-nhúng gi, haû Yhûmsîng Garaî é hí má mara bò râ nghut lhê. Ngá-nhúng wó to bê é mara má jàt yù nau nyi ashi kô lhú? Hkâsu mù gâ le, ngá-nhûng é mara gi, gyai kô tô bê nghut mù, Yhâng é nhikmó-yo hkyô gi, Isira-elaq byu pê htoq má jé to bê nghut ri.” ga taî akô nghut ri.
14 Haû mù, gyèzo haú bang gi, zaugun wuì eq shiwa byù hpúng gón é hí má, shúm byu pé eq wó lú lo é zè pé lé tô pyám bekô nghut ri. 15 Ahtoq má myìng bo é bang gi, shúm byû pé lé wùt yù mù, gùngchîn dùt to bang lé, wó lú lo é zè mai mèbu yu hut luî, yhángmòq lé, mèbu pé, hkyî-tsung pé, zoshuq pé eq bùt jung chi pé lajang byi mù, wum nyhôm é bang bànshoq lé loze má tsing ji nhang akô nghut ri. Haû mù, yhángmòq gi, yhángmòq é gu-mang Isira-elaq byu pé lé, Byùm gàm Wà nghut é Yerihko wà jé shoq dé kat kômù, Samariq wà shut dum taû ló bekô nghut ri.
16 Haú ahkyíng má, Hkóhkâm Ahaza gi, yhang lé lé garúm yû râ matú, Asuri hkóhkam pê chyáng byù nhang kat ri. 17 Hkâsu mù gâ le, Edom byu pé gi, Yudaq mau lé majan lé dum zan mù, byù myo myo lé shúm byû dông chyup shuî ló byùq é yánmai nghut ri. 18 Haú u, Hpilisiti byu pé gi, Yudaq mau mâ é bùmhkyî pá pé eq Maupyî Mau lé majan lé zan luî, Bet Shemesha, Aiyalon, Gederot, Sohko eq hau é awui ayàm mâ é wà pé, Timna eq hau é awui ayàm mâ é wà pé, Gimzo eq hau é awui ayàm mâ é wà pé lé lú yû mù, haú pé má nyi nyi akô nghut ri. 19 Haû Yhûmsîng Garai gi, Isira-elaq hkóhkâm Ahaza é yánmai, Yudaq mau lé lhoqnyhum pyâm é nghut ri; hkâsu mù gâ le, yhang gi, Yudaq mau lé agè ashop hkyô kut nhang é htoq agó, haû Yhûmsîng Garai lé gyai yhang a jujúm nghut ri. 20 Asuri hkóhkâm Tigalat-Pilesera gi, yhâng chyáng lé kôlhang, yhang lé a garúm yu é za, wuîhke jamjau hkyô shèq lhoqhtoq byî ri. 21 Ahaza gi, haû Yhûmsîng Garaî é noqkuq yhûm mai le, hkóhkâm wâng mai lé, zaugun wui chyáng mai le, sùtzè yu htoq mù, Asuri hkóhkâm lé byi kôlhang, yhang lé a garúm yû nghut ri.
22 Hkóhkâm Ahaza gi, wuîhke jamjau huî é u má shèq, haû Yhûmsîng Garai lé je riyhang a jujúm lo nghut ri. 23 Yhang gi, “Aram hkóhkam pê é hparà pé gi, yhángmòq lé garúm yu é yánmai, ngo lé le garúm yû sháng gàq; ngò, yhángmòq lé hkungga nhông byi râ nghut lhê.” ga myìt yù luî, yhang lé ung pyâm é Damasikuq wà mâ é hparà pé lé hkungga pé nhông byî ri. Nghut kôlhang, haû gi, yhâng é matú le, Isira-elaq byù bànshoq bâng é matú le, gyòp gyó hkyô za nghut ri.
24 Ahaza gi, Garai Gasâng é noqkuq yhûm mâ é chûngzè pé lé tsîng yù mù, ajàp azo zân hpyit pyám luî, haû Yhûmsîng Garaî é noqkuq yhûm mâ é hkum pé lé myhî pyám mù, Yerusalem wà mó mâ é hkyô chyûn hkangmó má hkungga gyàp tsing saî tô ri. 25 Hau htoq agó, yhang gi, gótû hparà pé lé hkungga pé nhông byi râ matú, Yudaq mau mâ é wà hkangmó má, myhang é hparà noq jowò pé tsing saî tô é nghut luî, yhâng é îchyí îwâ pê é Garai Gasang, haû Yhûmsîng Garai lé nhikjum lhoqyô ri.
26 Yhang ùp é gótû hkyô pé eq yhâng é nyi yàp é hkyô pé bànshoq awang mai a hpyo hpyot lé gi, Yudaq eq Isira-elaq hkóhkam pê é laiká má kâ tô ri. 27 Ahaza gi, yhâng é îchyí îwâ pê chyáng ló bo bánnô byùq bê nghut mù, Yerusalem wà mó má myhup yhûm pyâm é hui kôlhang, Isira-elaq hkóhkam pê é lùp gò pé má myhup yhûm é a hui nghut ri. Yhang zo Hezeki-a gi, yhâng é hkóhkâm hkô má zùng bê nghut ri.