Yudaq Hkóhkâm Yohtam
27
Yohtam gi, chyungxe zànwut í xe ngo zân má hkóhkâm dùt mù, Yerusalem wà mó má raxe hkyuq zân ùp ri. Yhâng nu gi, Zadok é yhang zo byìzo Yerusha ga sû nghut ri. 2 Yohtam gi, yhâng wa Uzi-a kut é su, haû Yhûmsîng Garaî é myòq hí má jo têng é hkyô kut ri; nghut kôlhang, yhang gi, haû Yhûmsîng Garaî é noqkuq yhûm má a wàng nghut ri. Shiwa byu pé kúm gi, ashop é hkyô pé xoq kut nyi ashi kô nghut ri. 3 Yhang gi, haû Yhûmsîng Garaî é noqkuq yhum é Ahtoq Hkum lé saî saí mù, Ohpela bùm má wàhkûm myo myo saî jàt ri. 4 Hau htoq agó, yhang gi, Yudaq bum mau má wà pé xuq mù, sik yô hkaû má gyèdap pé eq mâchya pé saî ri.5 Yohtam gi, Ammon byu pê é hkóhkâm lé majan ê zan mù, yhángmòq lé zân ung yu ri. Haû mù, Ammon byu pé gi, yhang lé, haú zân, ngùnhtung rahkying rashô joí, súngsô ngo sên sûm mûn sum hkyîng joí kô eq mùk-yó gùq ngo sên sûm mûn sum hkyîng joí kô àp byî akô. Yhángmòq gi, htâng í zân le haû myhó myhó lé byî ashi kô nghut ri.
6 Yohtam gi, yhâng é Garai Gasang nghut é, haû Yhûmsîng Garaî é hí má jujúm nyi é yánmai, kô myhang lo nyi ri.
7 Yohtam ùp é gótû hkyô pé, yhang majan zân é bànshoq eq yhang kut é gótû hkyô pé lé gi, Isira-elaq eq Yudaq hkóhkam pê é laiká má kâ tô é nghut ri. 8 Yhang gi, chyungxe zànwut í xe ngo zân má hkóhkâm dùt mù, Yerusalem wà mó má raxe hkyuq zân ùp ri. 9 Yohtam gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà má myhup yhûm pyâm é hui bê nghut ri. Yhang zo Ahaza gi, yhâng é hkóhkâm hkô má zùng bê nghut ri.