Yudaq Hkóhkâm Uzi-a
26
Yudaq shiwa byù bànshoq bang gi, chyungxe zànwut raxe hkyuq zân bò bê nghut é Uzi-a lé shuî yù kômù, yhâng wa Amazi-a é hkô má hkóhkâm kut nhang akô nghut ri. 2 Yhang gi, Amazi-a, yhâng é îchyí îwâ pé eq ló bánnô byùq é htâng má, Elat wà lé dum xuq mù, Yudaq mau má lhoqlhôm yù bê nghut ri.3 Uzi-a gi, raxe hkyuq zân má hkóhkâm dùt mù, Yerusalem wà mó má ngó xe í zân ùp ri. Yhâng nu gi, Yerusalem wà mó mâ é Yehkoli-a ga sû nghut ri; 4 Uzi-a gi, yhâng wa Amazi-a kut é eq rajung za, haû Yhûmsîng Garaî é myòq hí má jo têng é hkyô kut ri. 5 Yhang gi, Garai Gasang lé gyùq hkúngga râ matú yhang lé mhoq kyô é Zehkariq é i-pyàt má Garai Gasang lé ho ri; yhang, haû Yhûmsîng Garai lé ho é u má, Garai Gasang gi, yhang lé ûngmyuq hkyô wó nhang ri.
6 Yhang gi, Hpilisiti byu pé lé majan ê zan luî, Gat wàhkûm, Yapne wàhkûm eq Ashidot wàhkûm pé lé hpyoq hpyi pyám mù, Ashidot mau eq Hpilisiti mau gótû jowò pé má wà sik tsing xuq tô ri. 7 Hau htoq agó, Garai Gasang gi, yhang lé, Hpilisiti byu pé lé le, Gura Balaq wà má nyi é Arabi byu pé lé le, Me-un byu pé lé le, majan ê zân é má garúm yu ri. 8 Ammon byu pé gi, Uzi-a lé hkán lé kat akô; yhang gi, wum-o a-tsam gyaí bo byùq bê nghut é yánmai, Egutuq maukyo jé shoq myìng hû ló bê nghut ri.
9 Uzi-a gi, Yerusalem wà mó mâ é Htúngchyûn Hkum má le, Langhkaû Hkum má le, wàhkûm chyûn má le, mâchya pé tsing saî to mù, haú pé lé lhoq gingtîng to bê nghut ri. 10 Yhang gi, bum mau eq pá mau má shigu gaunyhaú gyai wó é yánmai, yòso má le mâchya pé saî to luî, wuì tíng dong myo myo dû tô ri. Hau htoq agó, yhang gi, mú zui zô é hkyô lé chyitdàp é yánmai, bùm pé má le, myìhpún bo é maumyî má le, yhâng é yò mú zui bang eq tsibyiq hkyâm saí bang lé nyhi tô ri.
11 Hau htoq agó, Uzi-a gi, rago wó lhoqmhân ge tô é gyè hpúng wó é nghut mù, kâ xûm hpó Yi-ela eq gyèzau Mase-a nhik nghap tô é eq rajung za, hkóhkam é zaugun wuì mâ é Hanani-a shuî û é má cháng luî, ahpúng hpúng kut, htoq e ló akô nghut ri. 12 A gyùq a wam é gyè wó zân é, yhûmhtu ushuq pê é jihpán bànshoq gi, 2600 yùq nghut ri. 13 Yhángmòq ùp é, majan zan râ matú lhoqmhân ge to bê é gyèzô pé gi, 307500 yùq nghut mù, haú bang gi, hkóhkâm hpô é gye pé lé majan wó bo zân ûng râ matú, wum-o a-tsam mó bo é gyè hpúng nghut ri. 14 Uzi-a gi, gye hpúng gón é matú, gòlong pé, lhâm pé, jòqtoq mùq pé, jòqtoq bu pé, lai pé eq lùq lhui laidán shi pé lé hen lajang byî ri. 15 Hau htoq agó, yhang gi, Yerusalem wà mó má, wàhkûm mai myoshi pé wó bìk râ eq lùqgòk pé wó lhêng hkyó râ matú, mâchya pé eq achyûn gingtíng jowò pé má hpàqchyî bò bang saî htoq é jàk lé le tô tô ri. Yhang gi, wum-o a-tsam mó bo byùq shoq gyai yhang garúm htuqbáng byî é hui bê nghut é yánmai, yhâng é myìng gi, gyai we shoq hû byo jam ló bê nghut ri.
16 Nghut kôlhang, Uzi-a gi, wum-o a-tsam mó bò jáng, yhang nghutbûn é hkyô gi, yhang lé shuî gyòp gyó bê nghut ri. Yhang gi, yhâng é Garai Gasang nghut é, haû Yhûmsîng Garai lé a jujúm é htoq agó, namngón hkungga nyhê é hkungga gyàp htoq má namngón hkungga nyhé râ matú, haû Yhûmsîng Garaî é noqkuq yhûm má wang e ri. 17 Hkyangjong Azari-a gi, haû Yhûmsîng Garaî é, a gyùq a wam é gótû hkyangjong shit xê yùq eq rahá, yhâng htâng má châng wang e ri. 18 Haû mù, yhángmòq gi, Hkóhkâm Uzi-a lé, “Uzi-a ê, nàng gi, haû Yhûmsîng Garai lé namngón hkungga nhông byi râ ahkáng wó sû a nghut. Namngón hkungga nhông byi râ gi, yhûmsing gùng lé lhoq chyoiyúng to bê nghut é, Arun é awùt ashín hkyangjông pé shèq ru nghut lhê. Nàng gi, târâ lu lai bê sû nghut mù, chyoiyúng jowò shî mai htoq ló aq. Nàng gi, haû Yhûmsîng Garai Gasâng èq hkúnggâ é hui râ a nghut lo.” ga dang htân taî akô nghut ri.
19 Uzi-a gi, namngón hkungga nyhé râ matú yhâng é lòq má myihkoq chung to uchyang nhikjum yo bê nghut ri. Yhang gi, haû hkyangjông pé lé nhik-yô nyi é hkûn, haû Yhûmsîng Garaî é noqkuq yhûm mâ é namngón hkungga nyhê é hkungga gyàp nàm má nyi tô é, hkyangjông pê é myòq hí má, yhâng é ngelang má yàpjèq nòlì dàp htoq lo é hui bê nghut ri. 20 Hkyangjong agyì Azari-a eq gótû hkyangjong bànshoq bang gi, yhang lé wú kat é hkûn, yhâng é ngelang má yàpjèq nòlì dàp tô é lé myàng kôjáng, yhang lé haû mai hân hân chyûn htoq pyâm akô. Haû Yhûmsîng Garai gi, yhang lé dàm byi bê nghut é yánmai, yhânggùng yhang le hân htoq ló naû bê nghut ri.
21 Hkóhkâm Uzi-a gi, shi byùq é buìnyì jé shoq yàpjèq nòlì dàp é nghut mù, yhûm gótû san má nyì luî, haû Yhûmsîng Garaî é noqkuq yhûm má wàng nhang é a hui lo nghut ri. Hkóhkam é yhang zo Yohtam gi, hkóhkâm wâng lé wú gon mù, mingbyû wuì lé ùp nyi ri.
22 Uzi-a ùp é gótû hkyô pé awang mai ahpyo hpyot lé gi, Amozi é yhang zo myìqhtoi Esai-a èq kâ tô ri. 23 Uzi-a gi, yhâng é îchyí îwâ pê chyâng ló bo bánnô byùq bê nghut mù, “Yhang gi, yàpjèq nòlì dàp sû nghut ri.” ga taí kô é yánmai, hkóhkam pé eq sêng é lùpdùng má, yhâng é îchyí îwâ pê é nàm má za myhup yhûm é huî ri. Yhang zo Yohtam gi, yhâng é hkóhkâm hkô má zùng bê nghut ri.