Yudaq Hkóhkâm Amazi-a
25
Amazi-a gi, chyungxe zànwut í xe ngo zân má hkóhkâm dùt mù, Yerusalem wà mó má í xe gau zân ùp ri. Yhâng nu gi, Yerusalem wà mó mâ é Yeho-adan ga sû nghut ri. 2 Amazi-a gi, haû Yhûmsîng Garaî é myòq hí má jo têng é hkyô kut kôlhang, i-myìt nhiklhum bànshoq èq a kut nghut ri. 3 Yhang gi, mîngdán lé yhâng é lòq má wó lhoq gingtîng to jáng, yhâng wa lé sat pyâm é zaugun nhik lé sat pyâm ri. 4 Nghut kôlhang, “Zô wui é yánmai mó lé, mó é yánmai zo wuî lé ge sat pyám râ a nghut. Ó yùq le, yhûmsing é mara mai shi byùq é hui ra râ nghut lhê.” ga Mosheq é târâ laiká bùk má kâ tô é má cháng luî, haû Yhûmsîng Garai hkunmó hkyô tô é eq rajung za, yhang gi, haú nhik é zodù wuì lé a sat pyám nghut ri.5 Amazi-a gi, Yudaq mau mâ é mingbyû wuì lé ji tsîng to mù, yhángmòq é yhûmhtu má cháng luî, Yudaq up bang eq Ben-yamin up bang lé, rahkyîng up gyèzaû pé eq rashô ùp gyèzaû pé hkyin htoq yu ri. Yhang gi, chyungxe zànwut í xê zàn mai ahtoq gû lé hkyin htoq yu é nghut mù, lhâm eq gòlong wó chûng luî, majan wó zan bê é byù sûm sen bo é lé myang ri. 6 Hau htoq agó, yhang gi, ngùnhtung rahkying rashô joí joí byi mù, Isira-elaq sarhê rasen lé le nghô yu ri.
7 Nghut kôlhang, Garai Gasâng é byù rayùq gi, yhâng chyáng lé jé mù, “Hkóhkâm ê, Isira-elaq mâ é gyè hpúng pé gi, nàng eq rahá ge yán htoq ê râ a nghut; hkâsu mù gâ le, haû Yhûmsîng Garai gi, Isira-elaq byù gâ é, Ehprim up mâ é byu pé eq rahá a nyì nghut ri. 8 Nàng ê mù, a gyùq a wàm majan ê zan kôlhang, Garai Gasang gi, gyè pê é hí má nang lé sum nhâng râ nghut lhê; hkâsu mù gâ le, Garai Gasang gi, wó garúm é eq wó sum nhang é a-tsam wó Sû nghut lhê.” ga taî ri.
9 Haú hkûn, Amazi-a gi, Garai Gasâng é byù haú lé, “Haû jáng, Isira-elaq gyè hpúng shí bâng é matú ngò byî pyâm é ngùnhtung rahkying rashô joí lé gi, hkâsu kut râ lhú?” ga myî ri.
Haû Garai Gasâng é byù gi, “Haû Yhûmsîng Garai gi, hau htoq myo shoq wó byî lhê.” ga tû taî ri.
10 Haû mù, Amazi-a gi, Ehprim mau mai yhâng chyáng jé lé é gyè hpúng lé, byò nhâng mù, yhûm shut taû ló nhâng bê nghut ri. Haû mù, yhángmòq gi, Yudaq mau lé gyai yhang nhik-yo luî, nhikmó-yô é eq yhûm taû ló bekô nghut ri.
11 Hau htâng, Amazi-a gi, wum-o mó lhoqkîng yù mù, yhâng é gyèzô pé lé Xo Langhkaû má shuî jé ê luî, Se-ira bùm mâ é byù ra-mun lé sat pyâm akô nghut ri. 12 Hau htoq agó, Yudaq gyè hpúng gi, byù duì gù ra-mun lé le wó chyup yû kômù, Sela lùq pyoq htoq má shuî dòq ló kôluî, ajàp azo dùt byùq râ matú lùq pyoq haû mai dûn hpyit hkyô pyâm akô nghut ri.
13 Haú u, Amazi-a eq rahá gyè zan râ ahkáng a wó é, yhâng èq nhang taû pyâm é gyè hpúng gi, Samariq wà mai Bet Horon jé shoq mâ é Yudaq mau eq sêng é wà pé lé tsing hpyoq mù, byù sum hkyîng lé sat pyám luî, zè pé gyai myo shoq lú yu ló bekô nghut ri.
14 Amazi-a gi, Edom byu pé lé châng sat é mai taû lo é hkûn, Se-ira byu pê é hparà pé lé yu lò mù, yhâng é hparà pé dông tsung to luî, haú pé lé noq paî gòp mù, hkungga pé nyhê nhông byî ri. 15 Haû mù, haû Yhûmsîng Garai gi, Amazi-a lé nhikmó-yo luî, yhâng chyáng myìqhtoi rayùq nhang kat é nghut mù, haú yùq gi, yhang lé, “Náng é lòq mai yhángmòq é byu pé lé lháng a wó hkyi yu é, byù shí bâng é hparà pé lé, nàng haî mù ho nyi lhê lhú?” ga taî ri.
16 Yhang dang ru taî nyi ashî le, hkóhkâm hpó gi, yhang lé, “Hkóhkam é hpàqchyî byi sû kut râ matú nang lé hkyin tô é nghut lhê lhú? Zim za nyì àq! Haî mù nang lé sat pyám râ dùt ri lhú?” ga taî ri.
Haû mù, myìqhtoi hpó gi, “Nàng shí hkyô kut é htoq agó, ngò hpàqchyî byî é lé le a gyo kut é yánmai, Garai Gasang gi, nang lé lhoqhtên pyám râ matú myìt hpyit bê nghut é lé, ngò sê lhê.” ga taí luî, zim za nyi byùq bê nghut ri.
17 Yudaq hkóhkâm Amazi-a gi, yhâng é hpàqchyî byi bang lé hpàqchyî yù mù, Isira-elaq hkóhkâm Yehu é yhang shu, Yeho-ahaza é yhang zo Yeho-asha chyáng, “Lé aq; ngá-nhik gi, myòqdong hkyúm majan zân lhum gòq.” ga taí nhang kat ri.
18 Nghut kôlhang, Isira-elaq hkóhkâm Yeho-asha gi, Yudaq hkóhkâm Amazi-a lé, “Lebanon bùm mâ é zuhpup gi, Lebanon bùm mâ é kyám gâm lé, ‘Ngá é yùqzo lé náng é byìzo byi tso aq.’ ga taí nhang kat ri. Haú hkûn, Lebanon bùm mâ é tân jung yòsô zè radu laî ló mù, zuhpup haú lé nâng hkyop pyám bê nghut ri. 19 Nàng gi, Edom byu pé lé wó ung pyâm é yánmai, gyáng dang taî é eq nghutbûn nyi rî-nhung. Nghut kôlhang, yhûm má nyi to aq! Náng gûng nàng le, Yudaq byu pé lé le, lhoqhtûm pyám râ dông, haî mù jamjau ho nyi lhê lhú?” ga tû taí nhang kat ri.
20 Nghut kôle, Amazi-a gi, dang haú lé a gyo nghut ri; hkâsu mù gâ le, yhángmòq gi, Edom mau mâ é hparà pé lé hô kô é yánmai, Garai Gasang gi, yhángmòq lé Yehosha é lòq má àp pyám râ matú myìt hpyit tô é nghut mú, haû kut é nghut ri. 21 Haû mù, Isira-elaq hkóhkâm Yeho-asha gi, dòq ê mù, Yudaq mau mâ é Bet Shemesha má Yudaq hkóhkâm Amazi-a eq myòqdong hkyúm majan zân lhum bekô nghut ri. 22 Yudaq byu pé gi, Isira-elaq byu pê é hí mai sûm ló byùq mù, ó le ô é yhûm shut hpang ló bûm bekô nghut ri. 23 Isira-elaq hkóhkâm Yehosha gi, Ahazi-a é yhang shu, Yo-ashi é yhang zo, Yudaq hkóhkâm Amazi-a lé Bet Shemesha má chyup yû mù, Yerusalem wà mó má she jé ló jáng, Ehprim Hkum mai Htúngchyûn Hkum jé shoq, Yerusalem wàhkûm lé myi shô dúng yhang hpyoq pyâm ri. 24 Hau htoq agó, yhang gi, Garai Gasâng é noqkuq yhûm má jòq é, Obet Edom wú gôn nyi é ngùn hîng bànshoq eq gótû zèhkoq bànshoq lé le, hkóhkâm wâng mâ é sùtzè bànshoq eq sàksé byu pé lé le, shuî chûng yu chûng mù, Samariq wà shut taû ló bê nghut ri.
25 Yudaq hkóhkâm, Yo-ashi é yhang zo Amazi-a gi, Isira-elaq hkóhkâm, Yeho-ahaza é yhang zo Yeho-asha shi byùq é htâng má raxe ngo zân chyungxe dui ashî nghut ri. 26 Amazi-a ùp é gótû hkyô pé awang mai ahpyo hpyot lé gi, Yudaq eq Isira-elaq é hkóhkam pê é laiká bùk má kâ tô lhê, a nghut lhú? 27 Haû Yhûmsîng Garaî é htâng châng nyi é mai Amazi-a lhing ló byùq é hkûn mai, Yerusalem wà mó má yhang lé gumlau toq bekô nghut mù, yhang gi, Lahkisha wà má hpang ê bê nghut ri; nghut kôlhang, yhángmòq gi, yhâng htâng má Lahkisha wà shut byù châng nhang kat kô é nghut mù, haú bang gi, yhang lé haú má sat pyám bekô nghut ri. 28 Yhâng é màng lé gi, myang mai htô lò mù, Yudaq mau mâ é Wà chyûng má, yhâng é îchyí îwâ pé eq rahá myhup yhûm pyám bekô nghut ri.