Yo-ashi Noqkuq Yhûm Saî Saî É Hkyô
24
Yo-ashi gi, chyungxe zànwut nyhit zân má hkóhkâm dùt mù, Yerusalem wà mó má myi xê zàn ùp ri. Yhâng nu gi, Berasheba wà mâ é Zibi-a ga sû nghut ri. 2 Hkyangjong Yehoi-ada é pyàt má, Yo-ashi gi, haû Yhûmsîng Garaî é myòq hí má jo têng é hkyô kut ri. 3 Yehoi-ada gi, yhang lé myiwe í yùq yù byî é nghut mù, yhang gi, yùqzo byìzô pé wó ri.4 Tsómra myáng jáng, Yo-ashi gi, haû Yhûmsîng Garaî é noqkuq yhûm lé saî saí râ matú myìt hpyit bê nghut ri. 5 Haû mù, yhang gi, hkyangjông pé eq Lewiq byu pé lé rahá wùt yù mù, yhángmòq lé, “Núngmòq gi, Yudaq mau mâ é wà pé shut ê mù, núngmòq é Garai Gasâng é yhûm lé saî saí râ matú, zàn wuì byi âng é má cháng luî, Isira-elaq byù bànshoq bâng chyáng mai ngùn ê hkyui yù keq. Ahkuî yhang ê kut keq.” ga taî ri. Nghut kôlhang, Lewiq byu pé gi, radá dâm a kut kó nghut ri.
6 Haû mù, hkóhkâm hpó gi, hkyangjong agyì Yehoi-ada lé ji yù mù, yhang lé, “Dangshikaq bo é sàksé zúm é matú, haû Yhûmsîng Garaî é duìnhâng zoshâng Mosheq eq Isira-elaq byù hpúng mai hkyô tô é hkán lé, Yudaq byu pé eq Yerusalem wà byu pê chyáng mai hkyui yù râ matú, haî mù Lewiq byu pé lé a taí shî é lhú?” ga taî ri.
7 Haû agè ashop é myiwe Ahtali-a é yhang zô pé gi, Garai Gasâng é noqkuq yhûm má hput cheq wâng mù, haû mâ é chyoiyúng zè pé lé lháng, Balaq hparà pê é matú nhông byî akô nghut ri.
8 Haû hkóhkâm hpó hkunmó hkyô é nghut mù, yhángmòq gi, sidèk saí luî, haû Yhûmsîng Garaî é noqkuq yhûm mâ é wâng hkum shinggan má tsung tô akô. 9 Hau htoq agó, Garai Gasâng é duìnhâng zoshâng Mosheq mai yòso má Isira-elaq byu pé kat râ matú hkyô tô é hkán lé, haû Yhûmsîng Garaî chyáng yu lé râ dùt é hkyanglù lé, Yudaq byu pé eq Yerusalem wà byu pê chyáng pyo kat bê nghut ri. 10 Haû mù, zaugun wuì bànshoq eq shiwa byù bànshoq bang gi, gabú tung chyûnghuq haû yu lé kômù, sidèk haû byíng shoq, lé kat akô nghut ri. 11 Lewiq byu pé mai hkóhkam é zaugun wui chyáng haû sidèk wàq lé hkangmó, sidèk haú má ngùn gyai myo shoq shoq bo tô é lé myàng kômù, hkóhkam é kâ xûm sû eq hkyangjong agyì hpô é duìnhâng zoshâng mó gi, sidèk haú mâ é ngùn hut yû luî, yhâng é jowò má yhang dum tô tô akô nghut ri. Yhángmòq gi, nyí wuî haû su kut nyî kô é nghut mù, ngùn gyai myo shoq wó tsîng to bekô nghut ri. 12 Haû hkóhkâm hpó eq Yehoi-ada gi, haû Yhûmsîng Garaî é noqkuq yhûm má múzó zui saî wú bang lé ngùn haú pé àp byî akô. Yhángmòq gi, haû Yhûmsîng Garaî é noqkuq yhûm saî saí râ matú, tsohtung ge saí bang, làksima pé, jòqtoq eq gyi pé ge bàt é bang lé, ngùn hau èq langchyáng lung yu akô nghut ri.
13 Mú zui bang gi, rago zui mù, múzó haú lé yhángmòq é lòq mai zui saî é nghut luî, Garai Gasâng é noqkuq yhûm lé, hí lhê é azòng eq rajung za gingtíng shoq wó saî pân bekô nghut ri. 14 Yhángmòq gi, yhûm haû ban saí jáng, myìt tô é ngùn lé, hkóhkâm hpó eq Yehoi-ada chyáng yu lò byi kô é nghut mù, yhángnhik gi, ngùn hau èq, haû Yhûmsîng Garaî é noqkuq yhûm má dójaú râ eq myi nyhé hkungga pê é matú, chûngzè pé, gòmhtung pé eq ngùn hîng lé saî é zè pé saí nhang akô nghut ri. Yehoi-ada chyungxe dui nyi é u, haû Yhûmsîng Garaî é noqkuq yhûm má ayang myi nyhé hkungga nhông byî nyi ri.
15 Yehoi-ada gi, u hpyû zuì nè shoq nyì mù, chyungxe zànwut rasho sum xê zàn má shi ló byùq bê nghut ri. 16 Yhang gi, Garai Gasang eq Yhâng é noqkuq yhum é matú, Isira-elaq byu pê chyáng ge é hkyô kut bê nghut é yánmai, Dawiq é Wà má hkóhkam pé eq rahá bo myhup yhûm é hui bê nghut ri.
Yo-ashi É Agè Ashop Hkyô
17 Yehoi-ada shi byùq é htâng má, Yudaq byu pê é zaugun wuì gi, hkóhkâm hpó lé lé hkúngga kô é nghut mù, yhang gi, yhángmòq é dang gyo byî ri. 18 Yhángmòq gi, yhángmòq é îchyí îwâ pê é Garai Gasang, haû Yhûmsîng Garaî é noqkuq yhûm lé tô pyám kômù, Ashera hparà zìng pé eq hparà lhô pé lé noqkuq akô. Yhángmòq é yubàk marâ é yánmai, Garai Gasâng é nhikjum yo hkyô gi, Yudaq mau eq Yerusalem wà mó ahtoq má jé bê nghut ri. 19 Haû Yhûmsîng Garai gi, shiwa byu pé lé Yhâng chyáng shuî lhing taû yù râ matú, myìqhtoî pé lé nhang kat é nghut mù, haú bang gi, yhángmòq lé htuqhtîng é sàksé shit kôlhang, yhángmòq gi, a gyo kó nghut ri.
20 Haû mù, Garai Gasâng é Sô gi, hkyangjong Yehoi-ada é yhang zo Zehkariq chyáng jé é nghut mù, Zehkariq gi, shiwa byu pê é hí má yàp to luî, “Garai Gasang taî le, ‘Núngmòq gi, haî mù haû Yhûmsîng Garaî é hkunmó pé lé a cháng kô é lhú? Núngmòq gi, kô myhâng kôrâ a nghut. Núngmòq gi, haû Yhûmsîng Garai lé tô pyám bekô nghut é yánmai, Yhang le núngmòq lé tô pyám bê nghut ri.’ gâ ri.” ga taî ri.
21 Nghut kôlhang, yhángmòq gi, yhang lé gumlau toq râ da kômù, hkóhkam é hkunmó mai, haû Yhûmsîng Garaî é noqkuq yhûm wàng hkaû má yhang lé lùqgòk èq dú sat pyâm akô nghut ri. 22 Hkóhkâm Yo-ashi gi, Zehkariq é yhâng wa Yehoi-ada mai yhang lé shit é jeju lé a bûn é za, yhang zo lé sat pyám byi bê nghut ri. Zehkariq gi, shi ló nyi é hkûn, “Haû Yhûmsîng Garai gi, shí hkyô lé myàng byi luî, lató hpuq sháng gàq.” ga taî ri.
23 Haú zân byíng jáng, Aram é gyè hpúng gi, Yo-ashi lé majan zan râ matú yán lé mù, Yudaq mau eq Yerusalem wà mó lé htim luî, mingbyû wui é zaugun wuì bànshoq lé sat pyám mù, wó lú yu é zè bànshoq lé, Damasikuq wà mó mâ é yhángmòq é hkóhkam chyáng hun kat akô nghut ri. 24 Yudaq byu pé gi, yhángmòq é îchyí îwâ pê é Garai Gasang, haû Yhûmsîng Garai lé tô pyám bekô nghut é yánmai, haû Yhûmsîng Garai gi, yhángmòq é gyè hpúng lé, byù a myô é Aram gyè pê é lòq má àp byi bê nghut mù, yhángmòq gi, Yo-ashi lé târâ jéyáng akô nghut ri. 25 Aram byu pé taû ló byùq é hkûn, Yo-ashi gi, dàm gyai dap mâ é nyi gyó tô ri. Yhâng é zaugun wuì gi, hkyangjong Yehoi-ada é yhang zo lé sat pyám kô é yánmai, yhang lé gumlau toq kômù, yhang lé yhâng é yhupgyàp má sat pyám bekô nghut ri. Haû mù, yhang gi, shi byùq bê nghut luî, Dawiq é Wà má myhup yhûm é hui kôlhang, hkóhkam pê é lùp má myhup yhûm é a hui nghut ri.
26 Yhang lé gumlau toq é su nhik gi, Ammon myiwe myhí Shime-at é yhang zo Zabat eq Moba myiwe myhí Shimrit é yhang zo Yehozabat nghut ri. 27 Yhang zô pê é hkyô, yhang eq sêng é myìqhtoi dang myo myô é hkyô eq Garai Gasâng é noqkuq yhûm lé saî saî é hkyô pé lé gi, hkóhkam pê é jihpán laiká bùk pé má tsing kâ tô ri. Yhang zo Amazi-a gi, yhâng é hkóhkâm hkô má zùng bê nghut ri.