23
Nyhit zan zàn nghû râ má, Yehoi-ada gi, wum-o lhoqkîng yù luî, shô ùp gyèzaû pé nghut é, Yehoram é yhang zo Azari-a, Yehohanan é yhang zo Ishima-elaq, Obet é yhang zo Azari-a, Adai-a é yhang zo Mase-a eq Zihkri é yhang zo Elishahpat pé lé ji yù mù, yhángmòq eq dangshikaq tô ri. 2 Yhángmòq gi, Yudaq mau gón má ê sô lhîng mù, Lewiq byu pé eq wà pé bànshoq mâ é Isira-elaq byu pê é yhûmhtu ushuq pé lé shuî tsîng yu akô. Yhángmòq gi, Yerusalem wà mó má jé lô kô é hkûn, 3 shiwa byù hpúng gón haû gi, Garai Gasâng é noqkuq yhûm má Hkóhkâm Yo-ashi eq dangshikaq tô akô nghut ri.Yehoi-ada gi, yhángmòq lé, “Dawiq é awùt ashín pé eq séng luî haû Yhûmsîng Garai danghtum htûm tô é eq rajung za, hkóhkam é yhang zo ùp râ nghut lhê. 4 Ahkuî, núngmòq gi, shí dông kut ra râ nghut lhê; Bánno Buìnyì má wò yù âng é hkyangjông pé eq Lewiq byu pé sum hpúng mâ é rahpúng gi, hkum zúng mù, 5 rahpúng gi, hkóhkâm wâng lé zúng luî, rahpúng gi, A-pûn Awang Hkum zúng ra râ nghut lhê; góbang bànshoq gi, haû Yhûmsîng Garaî é noqkuq yhûm mâ é wâng má nyì ra râ nghut lhê. 6 Hkyangjông pé eq wò âng é Lewiq byu pé mai lai luî, ó yùq le haû Yhûmsîng Garaî é noqkuq yhûm má ge wang ê râ a nghut; yhángmòq gi, lhoq chyoiyúng é hui bê nghut mù, ge wang akô nghut ri; nghut kôlhang, góbang bànshoq gi, a wang é za, haû Yhûmsîng Garaî é hkunmó lé cháng ra kôrâ nghut lhê. 7 Lewiq byu pé gi, yhûmsing é lòq má shâm lhâm chung to mù, hkóhkam é lhînghkyùq má jowò yu to ra râ nghut lhê; haû noqkuq yhûm má wang é sû ó yùq le, sat pyâm é hui ra râ nghut lhê. Hkóhkâm hpó hká ló le hká, châng zúng keq.” ga taî ri.
8 Lewiq byu pé eq Yudaq byù bànshoq bang gi, hkyangjong Yehoi-ada hkunmó hkyô é eq rajung za kut kôluî, yùq hkangmó gi, Bánno Buìnyì má wò yû râ matú wang é bang lé le, htoq ló é bang lé le, ó le ó shuî yu akô nghut ri. Hkâsu mù gâ le, hkyangjong Yehoi-ada gi, Lewiq byù hpúng pé lé a nhang kat shi nghut ri. 9 Haû mù, yhang gi, shô ùp gyèzaû pé lé, Garai Gasâng é noqkuq yhûm má jòq é, Hkóhkâm Dawiq é lhâm pé eq tiq é kô é gòlong pé àp byî ri. 10 Haû mù, yhang gi, byù bànshoq bang lé, yhûmsing é shâm lhâm chûng mù, maupyî hkyam mai mautsûng hkyam jé shoq, hkungga gyàp eq noqkuq yhûm yàm mai, hkóhkam é lhînghkyùq má yàp nhang tô ri.
11 Haú hkûn, Yehoi-ada eq yhang zô pé gi, hkóhkam é yhang zo lé shuî htoq yû mù, yhang lé hkóhkâm mùq tsung byi luî, dangshikaq laiká byi mù, hkóhkâm lhoqtoq akô nghut ri. Yhángmòq gi, yhang lé namngón xû bùt byi kômù, “Hkóhkâm chyung hîng xê hing nyì sháng gàq ô!” ga garû taî akô nghut ri.
12 Ahtali-a gi, shiwa byu pé dìn uchyang, haû hkóhkâm lé hkya-ôn bùm kô é htê lé wó gyo jáng, haû Yhûmsîng Garaî é noqkuq yhûm má nyi é bâng chyáng ê jé ri. 13 Yhang wú kat é hkûn, hkum yâm mâ é zìng mó nàm má hkóhkâm yàp tô é lé myang é htoq agó, zaugun wuì eq tut mùt bang hkóhkam é a-nàm má nyi tô bum é lé le, ra-mau gón mâ é bang gabú byam chyu mù tut pé mùt myhîng nyì kô é lé le, mahkôn dàt hkôn bang le bàt jung mùt jung ajà jà chûng luî, mahkôn shuî hkya-ôn nyì kô é lé le myang ri. Haú hkûn, Ahtali-a gi, yhâng é mèbu lâng cheq pyám mù, “Gumlau toq bê! Gumlau toq bê ô!” ga wùt garû taî ri.
14 Hkyangjong Yehoi-ada gi, “Haû Yhûmsîng Garaî é noqkuq yhûm má yhang lé hkâsat kó. Yhang lé, gyèzô pê chyáng shuî htoq ê mù, yhâng htâng châng é ó yùq lé le sat pyám keq.” ga taí mù, gyè hpúng pé lé ùp é shô ùp zau pé lé nhang htoq kat ri. 15 Haû mù, yhángmòq gi, yhang, hkóhkâm wâng mâ é Myang Hkum má jé é hkûn, yhang lé chyup yû mù, haú má sat pyám bekô nghut ri.
16 Hau htâng, Yehoi-ada gi, yhang le, shiwa byu pé eq hkóhkâm hpó le, haû Yhûmsîng Garaî é byu pé dùt sháng gàq ga, Yhang eq dangshikaq tó nhang ri. 17 Shiwa byu pé bànshoq bang gi, Balaq é hparà jong má ê mù, haú lé hpyoq hpyi pyám luî, kaúgyàp eq hparà lhô pé lé bàt hkyop pyám mù, kaúgyàp pê é hí má Balaq é hkyangjong hpó Matan lé sat pyâm akô nghut ri.
18 Hau htoq agó, Yehoi-ada gi, Mosheq é târâ má kâ tô é dông, Dawiq hkunmó hkyô tô é eq rajung za, gabú byam chyû é eq mahkôn hkôn mù, Yhûmsîng Garai lé myi nyhé hkungga nhông byi râ matú, noqkuq yhûm má Dawiq tô tô é hkyangjong Lewiq byu pê é lòq má, haû Yhûmsîng Garaî é noqkuq yhûm má múzó wú gon râ byu pé nyhi to byî ri. 19 Hau htoq agó, yhang gi, hká hkyô má le a sansêng é sû ó yùq le, haû Yhûmsîng Garaî é noqkuq yhûm má a wó wâng sháng gàq ga, noqkuq yhûm mâ é hkum pé má zúng bang nyhi tô ri.
20 Yhang gi, shô ùp gyèzaû pé, xânghpoq nge wó bang, shiwa byu pê é zaugun wuì, ra-mau gón mâ é shiwa byù bànshoq eq hkóhkâm lé, haû Yhûmsîng Garaî é noqkuq yhûm mai shuî gyó ló mù, Ahtoq Hkum dông hkóhkâm wâng má wàng luî, hkóhkâm hpó lé hkóhkâm tángmyhâng má zùng nhâng bê nghut ri. 21 Haû mù, mingbyû wuì bànshoq gi, gabú byam chyu bekô nghut luî, wà mó haû gi, zîm byùq bê nghut ri. Haû gi, Ahtali-a lé yhángmòq sham èq sat pyám kô é yánmai nghut ri.