Yudaq Hkóhkâm Ahazi-a
22
Yerusalem wà byu pé gi, Yehoram é yhang zo zohtáng Ahazi-a lé yhâng é hkóhkâm hkô má zùng nhâng bekô nghut ri; hkâsu mù gâ le, Arabi byu pé eq rahá wàp má wang é da-myàq pé gi, yhang mâng pé bànshoq lé sat pyám byi kô é nghut ri. Haû mù, Yudaq hkóhkâm Yehoram é yhang zo Ahazi-a gi, ùp hî bê nghut ri.2 Ahazi-a gi, chyungxe zànwut í xe í zân má hkóhkâm dùt mù, Yerusalem wà mó má razàn ùp ri. Yhâng nû é myìng gi, Ahtali-a gâ ri; yhang gi, Omri é yhang shu nghut ri.
3 Yhang le, Ahap yhûm bâng é hkyô lé châng kut ri; hkâsu mù gâ le, yhâng nu gi, agè ashop é hkyô kut râ matú yhang lé wum byî ri. 4 Yhang gi, Ahap é yhûmbyù wuì kut é su, haû Yhûmsîng Garaî é myòq hí má agè ashop é hkyô kut ri; hkâsu mù gâ le, yhâng wa shi byùq é htâng má, Ahap é yhûmbyù wuì gi, yhang htên byùq shoq ashop é hkyô kut râ hpàqchyî byî akô nghut ri. 5 Yhang gi, yhángmòq hpàqchyî byî é hkyô má cháng luî, Ramot Gile-at má Aram hkóhkâm Haza-ela lé majan ê zan râ matú, Isira-elaq é hkóhkâm Ahap é yhang zo Yehorama eq myìt bo huî ri. Aram byu pé kúm gi, Yehoram lé dàm tap akô nghut ri. 6 Haû mù, yhang gi, Aram hkóhkâm Haza-ela lé majan zân é hkûn, Ramot jowò má yhángmòq èq tap é dàm lé ló yâ ge yù râ matú, Yezirela wà má taû ló bê nghut ri.
Haû mù, Yudaq hkóhkâm Yehoram é yhang zo Ahazi-a gi, Ahap é yhang zo Yehoram dàm dap bê nghut é yánmai, yhang lé ê hui râ matú Yezirela wà shut gyó e ri.
7 Ahazi-a mai Yehoram lé ê kum nhang é dông, Garai Gasang gi, yhâng chyáng htên byòq hkyô jé nhâng bê nghut ri. Ahazi-a gi, jé é hkûn, Yehoram eq rahá Nimshi é yhang zo Yehu lé ê te akô nghut ri. Yehu gi, Ahap é yhûmbyù wuì lé lhoqhtûm pyám râ matú, haû Yhûmsîng Garaî èq namngón xû bùt byi huî é sû nghut ri. 8 Yehu gi, Ahap é yhûmbyù wuì lé lhoqhtûm pyâm nyi é hkûn, Yudaq zaugun sûwún wuî eq Ahazi-a lé dójaú é yhâng é buìnùm wui é yhang zo yùqzô pé lé myàng mù, yhángmòq lé sat pyâm ri. 9 Yhang gi, Ahazi-a lé châng ho é hkûn, yhang Samariq wà má haq nyi tô é u lé, yhâng é byu pê èq châng hkyit chyup yû bê nghut mù, yhang lé Yehu chyáng shuî lò kôluî, sat pyám bekô nghut ri. Yhángmòq gi, “Yhang le, i-myìt nhiklhum bànshoq èq haû Yhûmsîng Garai lé hô sû, Yehoshahpat é yhang zo yùqzo nghut ri.” ga taî akô nghut ri; haû mù, yhang lé myhup yhûm pyám bekô nghut ri. Haû mù, Ahazi-a é yhûmbyù wuì má gi, mîngdán lé wó ùp é byù a nyì lo nghut ri.
Ahtali-a Eq Yo-ashi É Hkyô
10 Ahazi-a é yhâng nu Ahtali-a gi, yhang zo shi byùq bê nghut é lé myàng jáng, Yudaq up é hkóhkâm zô pé lhúnglháng lé toq sat ló bê nghut ri. 11 Nghut kôlhang, Hkóhkâm Yehoram é yhang zo byìzo Yehosheba gi, Ahazi-a é yhang zo Yo-ashi lé, sat pyám hui râ nghut é hkóhkâm zô pê chyáng mai ê shuî hpang htoq yû mù, yhang lé wú gon sû eq rahá yhup wàp hkaû má haq nyhi tô ri. Haú dông mai, Hkóhkâm Yehoram é yhang zo byìzo eq Ahazi-a é yhâng nhammó, hkyangjong Yehoi-ada é yhûmsîng myhí nghut sû, Yehosheba gi, Ahtali-a a wó sat pyám shoq zoshâng haú lé haq nyhi tô ri. 12 Haû mù, yhang gi, haú mau má Ahtali-a ùp nyi é u, hkyuq zân yhang Garai Gasâng é noqkuq yhûm má yhángmòq eq haq nyi nyi ri.