21
Yehoshahpat gi, yhâng é îchyí îwâ pê chyáng ló bo bánnô byùq bê nghut mù, yhángmòq eq rahá Dawiq é Wà má myhup yhûm pyâm é hui bê nghut ri. Haû mù, yhang zo Yehoram gi, yhâng é hkóhkâm hkô má zùng bê nghut ri. 2 Yehoshahpat é yhang zo yùqzô pé nghut é, Yehoram é yhang gû pé gi, Azari-a, Yehi-ela, Zehkariq, Azari-ahu, Mihka-elaq eq Shehpati-a pé nghut akô. Shí bang bànshoq gi, Isira-elaq hkóhkâma Yehoshahpat é yhang zo yùqzô pé nghut akô. 3 Yhángmòq é yhâng wa gi, yháng nhiktâng wuì lé, ngùn, hîng eq hpaudap jung zèhkoq chyûnghuq byî é htoq agó, Yudaq mau mâ é gingtíng wà mó pé lé le tsing byî ri; nghut kôlhang, Yehoram gi, yùqzo zo-mún nghut é yánmai, mîngdán lé gi, yhang lé byî ri.Yudaq Hkóhkâm Yehoram
4 Yehoram gi, yhâng wâ é mîngdán lé ùp é má wum-o rago wó lhoqkîng to jáng, yhang gû pé bànshoq eq Isira-elaq é zaugun wuì ra-am lé sham èq sat pyâm ri. 5 Yehoram gi, chyungxe zànwut súm xe í zân má hkóhkâm dùt luî, Yerusalem wà mó má shit zân ùp ri. 6 Yhang gi, Ahap é yhang zo byìzo lé yu é yánmai, Ahap é yhûmbyù wuì su, Isira-elaq hkóhkam pê é hkyô pé lé châng ri. Yhang gi, haû Yhûmsîng Garaî é myòq hí má agè ashop é hkyô kut bê nghut ri. 7 Nghut kôlhang, haû Yhûmsîng Garai gi, Dawiq lé, yhâng é matú eq yhâng é awùt ashín pê é matú, ahtum abyùq myi-kok dùq nyi é su ru ùp nyì nhâng râ ga dangshikaq tô tô é yánmai, Dawiq é yhûm lé a kâm lhoqhtên pyám nghut ri.
8 Yehoram é pyàt má, Edom byu pé gi, Yudaq lé gumlau toq kôluî, yhûmsing é hkóhkâm lhoqtoq yu akô nghut ri. 9 Haû mù, Yehoram gi, yhâng é zaugun wuì eq yhâng é gyèlhêng bànshoq eq rahá haú mau má e akô; haú hkûn, Edom byu pé gi, yhang eq yhâng é gyèlhêng kon zau pé lé lhînghkyùq lhom lóm tô akô; nghut kôlhang, yhang gi, myín lé wó toq htîm ung htoq lo ri. 10 Haû mù, Edom byu pé gi, hkû-nyí jé shoq Yudaq byu pé lé gumlau toq nyi akô nghut ri.
Haú u má, Lipna gi, Yehoram lé gumlau toq nyi ri; hkâsu mù gâ le, Yehoram gi, yhángmòq é îchyí îwâ pê é Garai Gasang, haû Yhûmsîng Garai lé tô pyâm mù, 11 Yudaq mau mâ é bùm pé má myhang é hparà noq jowò pé tsing saí luî, Yerusalem wà mó mâ é byu pé lé mara kut shut nhang é eq Yudaq byu pé lé hkyô shuî nghoq ri.
12 Yehoram gi, myìqhtoi Eliya hun kat é laiká ralhum myang yu ri. Haú má kâ tô é gi,
“Náng é îchyí îwa Dawiq é Garai Gasang, haû Yhûmsîng Garai taî le, ‘Nàng gi, náng wa Yehoshahpat é hkyô pé eq Yudaq hkóhkâm Asa é hkyô pé lé a châng é za, 13 Isira-elaq hkóhkam pê é hkyô pé lé cháng luî, Ahap é yhûm bang kut kô é eq rajung za, Yudaq eq Yerusalem wà mó mâ é byu pé lé mara shuî kut shut bê nghut ri. Hau htoq agó, nàng gi, náng htoq je ge é náng é yhûmbyù wuî nghut é, nunggu nungmâng pé lé le sat pyám bê nghut ri. 14 Haû mù, ahkuî, haû Yhûmsîng Garai gi, náng é mingbyû wuì lé le, nungzo núngdu pé eq náng é yhûmsîng myhî pé lé le, nàng eq sêng é jung hkangmó lé le, wúm mó èq bàt berâ nghut lhê. 15 Nàng yhang le, û nòlì mó nò râ nghut mù, ra-nyí eq ra-nyí náng é û bùp yeq htoq lò shoq dùt râ nghut lhê.’ gâ ri.” gâ ri.
16 Haû Yhûmsîng Garai gi, Yehoram lé gumlau toq râ matú, Hpilisiti byu pé eq Hkusha mau yâm mâ é Arabi byu pé lé i-myìt nhaû toq byî ri. 17 Haû mù, yhángmòq gi, Yudaq lé ê htim luî, wó zân ung yù mù, hkóhkâm wâng má myang é zè gè bànshoq lé le, yhâng é zodù wuì eq yhûmsîng myhî pé lé le, yu ló chyup ló kô é nghut mù, yhang zo zohtáng Ahazi-ab mai lai luî, yhang lé, yùqzo rayùq le a nyhi hkyô to byi lo kó nghut ri.
18 Shí pé bànshoq dùt é htâng má, haû Yhûmsîng Garai gi, Yehoram lé a wó yâ ge jung û nòlì mó nò nhâng bê nghut ri. 19 Yhang gi, myáng myáng no júng nyi é nghut mù, í zân byíng ló jáng lûm no lò luî, yhâng é û pé bùp yeq htoq lò mù, gyai no é èq shi byùq bê nghut ri. Yhâng é mingbyû wuì gi, yhâng é îchyí îwâ pé é matú kut kô é su, màng yhum myi mut poî a kut byi kó nghut ri.
20 Yehoram gi, chyungxe zànwut súm xe í zân má hkóhkâm dùt mù, Yerusalem wà mó má shit zân ùp ri. Yhang shi byùq é hkûn ó le a yón kó nghut ri; yhang gi, Dawiq é Wà má myhup yhûm é hui kôlhang, hkóhkam pê é lùp má myhup yhum huî é a nghut.