Moba Byu Pé Eq Ammon Byu Pé Lé Yehoshahpat Ung Pyâm É Hkyô
20
Hau htâng má, Moba byu pé, Ammon byu pé eq Me-un byu pé ra-am gi, Yehoshahpat lé majan zan râ matú lé lo bum akô nghut ri.2 Haú hkûn, byù ra-am gi, lé mù, Yehoshahpat lé, “Gyè ajùm ayò gi, nang lé majan lé zan râ matú, Xo Nhông hé hpoq mâ é Edom mau dông lé lô kômù, En Gedi le gâ é Hazezon Tamari jowò má wàp xuq to bekô nghut ri.” ga taî kyô akô nghut ri. 3 Haû mù, Yehoshahpat gi, gyùq luî, haû Yhûmsîng Garai lé hô mù, Yudaq mau gón má zoshuq túm nhang ri. 4 Yudaq mau mâ é mingbyû wuì gi, haû Yhûmsîng Garai lé garúm dung râ ga rahá zîng bum akô; yhángmòq gi, haû Yhûmsîng Garai lé hô râ ga, Yudaq mau mâ é wà hkangmó mai htoq lé lo bum akô nghut ri.
5 Haú hkûn, Yehoshahpat gi, haû Yhûmsîng Garaî é noqkuq yhûm yhûmhkun hí má nyi tô é, Yudaq byù eq Yerusalem wà mó mâ é byu pê é hí má yàp to mù,
6 “Ngá-mòq é îchyí îwa pê é Garai Gasang, haû Yhûmsîng Garai ê, Nàng gi, mauhkûng má nyi é Garai Gasang nghut lhê, a nghut lhú? Nàng gi, a-myû wui é mîngdán bànshoq lé ùp é sû nghut lhê, a nghut lhú? Hpungwup a-tsam eq wum-o a-tsam gi, Náng é lòq má nghut mù, ó yùq le Nang lé a wó htuqhtíng nghut ri. 7 Ngá-mòq é Garai Gasang ê, Nàng gi, Náng é Isira-elaq byu pê é hí mai shi mau má nyi é bang lé hkat htoq pyám luî, Náng é luzúm hpó Abraham é awùt ashîn pé lé, maumyî haû ahtum abyùq byî é a nghut lhí? 8 Yhángmòq gi, maumyî haú má nyi nyì mù, Náng é mying é matú chyoiyúng jowò saí kôluî, 9 ‘Ngá-mòq chyáng, wuîhke jamjau hpuzo hkyô nghut é, sham eq jéyáng é hkyô, nò wúm eq mùtmó gyó é hkyô jé lo é hkûn, ngá-mòq gi, Náng é myìng jòq é noqkuq yhûm shî mâ é Náng é hí má yàp mù, ngá-mòq myìt myo ûng wôm é èq Nang lé wùt ngaù râ nghut lhê; haú hkûn, Nàng gi, ngá-mòq lé gyo byi mù, hkyi yù râ nghut lhê.’ ga taî akô nghut ri.
10 Nghut kôlhang, Isira-elaq byu pé Egutuq ming mai htoq lo é hkûn, Nàng, yhángmòq lé majan a ê zán nhang é nghut mù, yhángmòq é hí mâ é mau bang lé a lhoqhtûm pyâm é za, koi lhaî pyâm tô é Ammon byu pé, Moba byu pé eq Se-ira Bùm mâ é bang gi, ahkuî shî má nyi tô bùm bê nghut ri. 11 Wú aq; yhángmòq gi, silî wunlî maumyî dông Nàng ngá-mòq lé byî tô é mau mai ngá-mòq lé hkat htoq pyám râ matú toq lé bûm bekô nghut ri; yhángmòq gi, ngá-mòq lé haú dông jeju taû akô nhung. 12 Ngá-mòq é Garai Gasang ê, Nàng gi, yhángmòq lé târâ a jéyáng râ lhú? Hkâsu mù gâ le, ngá-mòq gi, ngá-mòq lé lé htîm é gyè hpúng mó shî lé lhom wó htuqhtíng râ wum-o a bò nghut rô. Ngá-mòq gi, hkâsu kut râ le a sé lo; ngá-mòq é myòqjí gi, Nang lé za ru láng wú nyi alô.” ga taî ri.
13 Yudaq byù bànshoq bang eq yhángmòq é yhûmsîng myhî pé, zodù wuì eq zoshâng zô pé gi, haû Yhûmsîng Garaî é hí má yàp tô bum akô nghut ri.
14 Haú hkûn, haû Yhûmsîng Garaî é Sô gi, shiwa byù hpúng má yàp tô é, Lewiq byù, Asap é awùt ashín, Matani-a é yhâng shuké tsáng, Yi-ela é yhâng shuké, Benai-a é yhang shu, Zehkariq é yhang zo Yahazi-ela chyáng lé jé é nghut mù, 15 Yahazi-ela gi, “Hkóhkâm Yehoshahpat, Yudaq mau eq Yerusalem wà mó má nyi é bànshoq bang ê, gyo keq! Haû Yhûmsîng Garai núngmòq lé taî le, ‘Gyè hpúng mó shí bâng é yánmai, hkâgyùq kó; myìt wum le hkâgyui kó. Hkâsu mù gâ le, majan haû gi, núngmòq é mú a nghut; Garai Gasâng é mú shèq ru nghut lhê. 16 Nàpmá yhángmòq lé majan ê zan râ matú yán gyó ê keq. Yhángmòq gi, Ziza hkyèt má dòq lò kôrâ nghut mù, núngmòq gi, Yeru-ela yòso mâ é langhkaû um má hui kôrâ nghut lhê. 17 Nghut kôlhang, núngmòq gi, majan haû zan nó a ra. Jowò za tsing yu to keq; Yudaq eq Yerusalem wà mó mâ é bang ê, zim za yàp to mù, haû Yhûmsîng Garai mai núngmòq lé byi râ nghut é hkyi yù hkyô lé wú keq. Hkâgyùq kó; myìt wum le hkâgyui kó. Nàpmá yhángmòq lé ê htoq hui keq; haû Yhûmsîng Garai gi, núngmòq eq rahá nghut nyi ri.’ gâ ri.” ga taî ri.
18 Haú hkûn, Yehoshahpat gi, myigùng jé shoq ngóm gòp mù, Yudaq eq Yerusalem wà mó mâ é byù bànshoq bang gi, haû Yhûmsîng Garaî é hí má ngóm gòp luî, noqkuq akô nghut ri. 19 Haû jáng, Kohat koq mâ é Lewiq byù ra-am eq Kora koq bang gi, yàp to mù, gabú tung htê mó o mó èq, Isira-elaq é Garai Gasang, haû Yhûmsîng Garai lé hkya-on kúngton akô nghut ri.
20 Yhángmòq gi, htang nàpsûn noq le, Teko-a yòso shut toq e ló akô. Yhángmòq htoq e ló kô é u, Yehoshahpat gi, yàp to mù, “Yudaq byu pé eq Yerusalem wà byu pé ê, ngá é dang gyo keq! Núngmòq é Garai Gasang nghut é, haû Yhûmsîng Garai lé lùmjíng keq; haú jáng, núngmòq wó yàp ging kôrâ nghut lhê; Yhâng é myìqhtoî pé lé le lùmjíng keq; haú jáng, núngmòq ûngmyuq hkyô wó kôrâ nghut lhê.” ga taî ri. 21 Yehoshahpat gi, shiwa byu pé eq hpyê lhûm é htâng má, gyèzô pê é hí má e ló râ hkûn, haû Yhûmsîng Garai lé hkya-on mahkôn hkôn râ matú le, Yhâng chyoiyúng é hkìkhkâm hkyo é matú Yhang lé hkya-on kúngtôn râ matú le, byù hkyin masàt tô ri. Yhángmòq gi,
“Haû Yhûmsîng Garai lé jeju hkya-on keq;
hkâsu mù gâ le, Yhâng é chyitdàp myìt gi, ahtum abyùq gîng nyi ri.” ga taî akô nghut ri.
22 Yhángmòq gi, hkya-on mahkôn hkon é eq hkya-on kúngton hi ló kô é hkûn, haû Yhûmsîng Garai gi, Yudaq byu pé lé majan lhom zân é Ammon byù, Moba byù eq Se-ira Bùm mâ é byu pé lé htîm é nghut mù, haú bang gi, sûm byùq bekô nghut ri. 23 Ammon byu pé eq Moba byu pé gi, Se-ira Bùm mâ é bang lé lhoqhtûm pyám râ matú toq htim kômù, yhángmòq lé sat pyám bekô nghut ri. Yhángmòq gi, Se-ira Bùm mâ é byu pé lé ban sat pyâm é htâng má, rayùq eq rayùq taû sat htûm lhum bekô nghut ri.
24 Yudaq byu pé gi, haû yòso lé byu myang é jowò má lé jé kômù, gyè hpúng mó haú lé wú kat kô é hkûn, rayùq lháng a lùt é za, myigùng má mang lèq tô é lé myang akô nghut ri. 25 Haû mù, Yehoshahpat eq yhâng é byu pé gi, haú bâng é zè pé ê wàq yù râ matú ê jé kô é hkûn, màng haú pé mai sùtzè pé, mèbu pé eq hpaudap jung myo myo a ung wàq loshoq myang yu akô. Haú pé gi, lûm myô é yánmai, sum nyí yhang gùq te yu akô nghut ri. 26 Yhángmòq gi, myi nyí nghu é nyí má, Berahka Langhkaû má chôm zùp zing kômù, haû Yhûmsîng Garai lé jeju hkya-ôn akô nghut ri. Haû mù, jowò haû lé gi, hkû-nyí jé shoq Berahka Langhkaû ga myhîng akô nghut ri.
27 Hau htâng, Yehoshahpat shuî-u luî, Yudaq byu pé eq Yerusalem wà byù bànshoq bang gi, gabú tung Yerusalem wà mó má taû ló bekô nghut ri. Hkâsu mù gâ le, haû Yhûmsîng Garai gi, yhángmòq lé, yhángmòq é gyè pê é ahtoq má gabú râ hkyô byi bê nghut ri. 28 Yhángmòq gi, Yerusalem wà mó má wang ló mù, tíng pé eq tínggóng pé bàt luî, tut pé mùt mù, haû Yhûmsîng Garaî é noqkuq yhûm má wang e akô nghut ri.
29 Haû lhînghkyùq mâ é mîngdán pé mâ é byù bànshoq gi, haû Yhûmsîng Garai mai Isira-elaq byu pê é gyè pé lé hkâsu kut majan zân ung pyâm é lé wó gyo kôjáng, Garai Gasang lé gyùq kyum bùm bekô nghut ri. 30 Haû mù, Yehoshahpat é mîngdán gi, nguì ngón nyî bê nghut ri; hkâsu mù gâ le, yhâng é Garai Gasang gi, lhînghkyùq mai yhang lé bánno nhâng bê nghut ri.
Yehoshahpat Ùp É Ló Htâng É Hkyô Pé
31 Haû mù, Yehoshahpat gi, Yudaq mau lé ùp ri. Yhang gi, chyungxe zànwut súm xe ngo zân má Yudaq hkóhkâm dùt é nghut mù, Yerusalem wà mó má í xe ngo zân ùp ri. Yhâng nu gi, Shilahi é yhang zo Azuba nghut ri. 32 Yhang gi, yhâng wa Asa é hkyô pé châng nyì luî, haú pé mai hkyô a nghoq ló byùq é za, haû Yhûmsîng Garaî é myòq hí má jo têng é hkyô kut ri. 33 Nghut kôle, yhang gi, haû myhang é hparà noq jowò pé lé a huî sêng pyâm é nghut mù, mingbyû wuì gi, yhángmòq é îchyí îwâ pê é Garai Gasang lé i-myìt nhiklhum mai a hô shi kó nghut ri.
34 Yehoshahpat ùp é gótû hkyô pé awang mai ahpyo hpyot lé gi, Isira-elaq hkóhkam pê é laiká bùk má kâ xûm tô é, Hanani é yhang zo Yehu é mhô-myi shindâm laiká bùk má kâ tô ri.
35 Htâng má, Yudaq hkóhkâm Yehoshahpat gi, Isira-elaq hkóhkâm Ahazi-a eq xoq tuî ri; haú yùq gi, agè ashop hkyô kut é sû nghut ri. 36 Yhang gi, Tarishi wà jé shoq lháng wó ê râ wuìsanghpo saí râ matú, haú yùq eq myìt huî ri. Hau htâng, wuìsanghpo haú pé lé Ezi-on Gebera má saî akô nghut ri. 37 Haú hkûn, Maresha byù Dodawahu é yhang zo Eli-ezera gi, “Nàng gi, Ahazi-a eq xoq lhum bê nghut é yánmai, haû Yhûmsîng Garai gi, nàng kut é múzó lé lhoqhtên pyám râ nghut lhê.” ga, Yehoshahpat lé htuqhtîng é myìqhtoi dang taî ri. Wuìsanghpo haú pé le, gyòp byùq mù, Tarishi wà má a wó jé lo nghut ri.