19
Yudaq hkóhkâm Yehoshahpat gi, ngón za Yerusalem wà mó mâ é yhâng é hkóhkâm wâng má taû jé é hkûn, 2 Hanani é yhang zo, myìqhtoi Yehu gi, hkóhkâm hpó lé ê hui mù, yhang lé, “Nàng gi, agè ashop sû lé garúm râ eq haû Yhûmsîng Garai lé a ngui é bang lé chyitdàp râ dùt ri lhú? Nàng haû su kut é yánmai, haû Yhûmsîng Garaî é nhikmó-yo hkyô gi, náng chyáng jé bê nghut ri. 3 Nghut kôlhang, nàng gi, ra-mau gón mâ é Ashera hparà zìng pé lé lhoqhtên pyám mù, Garai Gasang lé ho é myìt bo é yánmai, náng chyáng ge é hkyô ra-tsuí bo ashî nghut ri.” ga taî ri.Yehoshahpat Târâ Agyì Pé Lé Hkyin Tô É Hkyô
4 Yehoshahpat gi, Yerusalem wà mó má nyi nyi ri; yhang gi, Berasheba wà mai Ehprim bum mau jé shoq htoq e ló mù, mingbyû wuì lé, yhángmòq é îchyí îwâ pê é Garai Gasang, haû Yhûmsîng Garaî chyáng lhing taû lò nhang ri. 5 Hau htoq agó, yhang gi, Yudaq mau gón mâ é gingtíng wà mó hkangmó pé má, târâ agyi pé tsing hkyin nyhi to mù, 6 yhángmòq lé, “Núngmòq gi, byu é mú lé a nghut, haû Yhûmsîng Garaî é múzó lé târâ hpyit é ru nghut luî, núngmòq târâ hpyit hkangmó Yhang bo lom nyì râ nghut é yánmai, núngmòq kut é múzó má rago sidìq nyì keq. 7 Ahkuî, haû Yhûmsîng Garai lé gyùq hkúnggâ é hkyô núngmòq chyáng jòq nyî sháng gàq. Târâ rago hpyit keq; hkâsu mù gâ le, ngá-nhûng é Garai Gasang nghut é, haû Yhûmsîng Garaî chyáng, târâ a ràp-rá é hkyô, myòqdong hkyin é hkyô eq lòqhkaû lang zè yu é hkyô pé haî le a bo é nghut lhê.” ga taî ri.
8 Hau htoq agó, Yehoshahpat gi, Yerusalem wà mó má, haû Yhûmsîng Garaî é târâ shuî cháng râ eq byu pê é mû hpyit byi râ matú, Lewiq byù, hkyangjông pé eq Isira-elaq yhûmhtu ushuq pé ra-am lé hkyin nyhi tô ri. Haú bang gi, Yerusalem wà mó má nyi akô nghut ri. 9 Yhang haú bang lé hkunmó hkyô é gi, “Núngmòq gi, haû Yhûmsîng Garai lé gyùq hkúngga luî, jujúm é eq i-myìt nhiklhum bànshoq èq dójaú nyì ra râ nghut lhê. 10 Wà pé má nyi é núngmòq é byu pé gi, byù sat é mú, târâ pé, hkunmó pé, târâ wàng hkunmó pé eq cháng ra târâ pé lé lu laî pyâm é mú rajung jung htoq luî, núngmòq chyáng lé hpyit nhâng kô é hkûn, haû Yhûmsîng Garai lé mara a kut shut râ matú, yhángmòq lé lhoqpun lhoqkying ra râ nghut lhê; haû a nghut jáng, Yhâng é nhikmó-yo hkyô gi, núngmòq eq núngmòq é byu pê chyáng jé râ nghut lhê. Haú hkyô kut keq, haû jáng núngmòq mara a kut shut kôrâ nghut lhê.
11 Hkyangjong agyì Amari-a gi, haû Yhûmsîng Garai eq sêng é hkyô haî má le, núngmòq lé ùp râ nghut lhê; Yudaq up mâ é zau, Ishima-elaq é yhang zo Zebadi-a gi, hkóhkâm eq sêng é hkyô haî má le, núngmòq lé ùp râ nghut lhê; Lewiq byu pé gi, núngmòq é zaugun wuì dông dójaú kôrâ nghut lhê. A gyùq a wàm zui saí keq; haû Yhûmsîng Garai gi, rago zui saî é bang eq rahá nghut nyî sháng gàq ô.” gâ ri.