Ahap Lé Myìqhtoi Mihkai-a Htuqhtíng Dang Taî É Hkyô
18
Hkóhkâm Yehoshahpat gi, sùtzè myo myo wó é eq xânghpoq nge wó é nghut mù, myi byi myi yû hkyô mai Hkóhkâm Ahap lé mùng mòq dù mù xoq yu ri. 2 Zànwut tsómra lai jáng, yhang gi, Samariq mau má Ahap lé ê gyó huî ri. Ahap gi, yhâng é matú le, yhâng htâng cháng bâng é matú le, sau pé eq no pé myo myo sat byi mù, yhang eq rahá Ramot Gile-at má ê htim râ matú wum lâng shi-kùt ri. 3 Haû mù, Isira-elaq hkóhkâm Ahap gi, Yudaq hkóhkâm Yehoshahpat lé, “Nàng, ngò eq rahá dòq ê mù, Ramot Gile-at lé ê htim râ lhú?” ga myî ri.Yehoshahpat gi, “Ngò gi, nàng su nghut mù, ngá é byu pé gi, náng é byu pé su nghut lhê; ngá-mòq gi, majan zan râ matú nàng eq rahá bo lé râ nghut lhê.” ga tû taî ri. 4 Nghut kôlhang, Yehoshahpat le, Isira-elaq hkóhkâm lé, “Hkû-nyí yhang, haû Yhûmsîng Garaî é dang lé hí myî wú gòq.” ga taî ri.
5 Haû mù, Isira-elaq hkóhkâm gi, myìqhtoi myi shô yùq lé ji tsîng to mù, yhángmòq lé, “Ngá-mòq gi, Ramot Gile-at lé majan ê zân le, gè râ lhú, a gè râ lhú?” ga myî ri.
Haú hkûn, yhángmòq gi, “Ê keq; Garai Gasang gi, wà haú lé hkóhkam é lòq má àp byi râ nghut lhê.” ga tû taî akô nghut ri.
6 Nghut kôlhang, Yehoshahpat gi, “Shí má, ngá-nhúng wó myî wú râ nghut é, haû Yhûmsîng Garaî é myìqhtoi rayùq yùq a nyì lo kó lhú?” ga myî ri.
7 Haû jáng, Isira-elaq hkóhkâm gi, Yehoshahpat lé, “Haû Yhûmsîng Garai lé ngá-nhúng myi râ matú myìqhtoi rayùq nyi ashî; nghut kôlhang, yhang gi, ngò eq séng luî, hkâ-nhám le, ge é hkyô a nghut é za, a ge é hkyô chyat myìqhtoi htoi byî é yánmai, yhang lé ngò a nguì nghut lhê. Yhang gi, Imla é yhang zo Mihkai-a nghut ri.” ga tû taî ri.
Haû jáng, Yehoshahpat gi, “Hkóhkâm nhîng haû su nghû a ge taí.” ga tû taî ri.
8 Haû mù, Isira-elaq hkóhkâm hpó gi, yhâng é zaugun rayùq lé, “Imla é yhang zo Mihkai-a lé radá dâm hân ê shuî lò àq.” ga taî ri.
9 Isira-elaq hkóhkâm hpó eq Yudaq hkóhkâm Yehoshahpat gi, hkóhkâm hking wùt mù, Samariq wà hkum hí mâ é chyârâng má, yhûmsing é hkóhkâm tángmyhâng má zung tô kô é nghut luî, myìqhtoî pé bànshoq gi, yhángnhik é hí má myìqhtoi htoî nyi bum akô nghut ri. 10 Hkenana é yhang zo Zedeki-a gi, jòqtoq hkyuî pé saî yù mù, “Haû Yhûmsîng Garai taî le, ‘Nàng gi, Aram byu pé lé wó lhoqhtên pyám shoq, hkyuî shí pê èq yhángmòq lé htung râ dùt lhê.’ gâ ri.” ga taî ri.
11 Myìqhtoî pé góbang bànshoq le, “Ramot Gile-at lé majan ê zan mù, ûngmyuq hkyô wó keq; hkâsu mù gâ le, haû Yhûmsîng Garai gi, hkóhkam é lòq má wà haú lé àp byi râ nghut lhê.” ga myìqhtoi chôm htoî bum akô nghut ri.
12 Haû Mihkai-a lé ê ji é lagyo hpó gi, yhang lé, “Wú aq; myìqhtoi góbang gi, hkóhkâm ûngmyuq hkyô wó râ ga chyat myìqhtoi chôm htoi byî bum akô. Haû mù, nàng le, yhángmòq eq rajung za ge é dông myìqhtoi htoi byi aq.” ga taî ri.
13 Nghut kôlhang, Mihkai-a gi, “Haû Yhûmsîng Garai teng za rû dui nyi é eq rajung za, ngò gi, Garai Gasang taî é lé za, yhang lé ge taî kyô lhê.” ga taî ri.
14 Yhang jé jáng, hkóhkâm hpó gi, yhang lé, “Mihkai-a ê, ngá-mòq gi, Ramot Gile-at lé majan ê zân le, gè râ lhú, a gè râ lhú?” ga myî ri.
Haú hkûn, yhang gi, “Majan ê zan mù, ûngmyuq hkyô wó keq; hkâsu mù gâ le, núngmòq é lòq má yhángmòq lé àp byi râ nghut lhê.” ga tû taî ri.
15 Haú hkûn, hkóhkâm hpó gi, yhang lé, “Haû Yhûmsîng Garaî é myìng lang luî tengmán é dang za taî é mai lai luî, haî le a taí râ matú, ngò, nang lé hkâ-myhó dâm dakâm nhâng ra râ lhú?” ga taî ri.
16 Haû jáng, Mihkai-a gi, “Isira-elaq byu pé bànshoq bang gi, sau zúng sû a nyi é sau pé su, bùm pé má byo myín bum é lé ngò myang ri. Haû Yhûmsîng Garai le, ‘Byù shí bang gi, yhûmsîng a wó kó nghut ri; ó le ô é yhûm má ngón za ló kó sháng gàq.’ ga taî ri.” ga tû taî ri.
17 Haú hkûn, Isira-elaq hkóhkâm gi, Yehoshahpat lé, “Yhang gi, ngò eq séng luî, hkâ-nhám le, ge é hkyô a nghut é za, a ge é hkyô chyat myìqhtoi htoi byî ri nghû taí bê a nghut lhí?” ga taî ri.
18 Mihkai-a gi, xoq luî, “Haû mù, haû Yhûmsîng Garaî é dang lé gyo keq; haû Yhûmsîng Garai gi, yhâng é hkóhkâm tángmyhâng má zung to mù, mauhkûng mâ é ajùm ayò gi, Yhâng é lòqyò lòqpaî hkyam shut yàp tô bum é lé ngò myang ri. 19 Hau htoq agó, haû Yhûmsîng Garai gi, ‘Isira-elaq hkóhkâm Ahap lé, Ramot Gile-at má majan ê zan nhâng mù, yhang haû má shi byùq shoq, ó yùq ê lâng nghoq yû râ lhú?’ ga taî ri.
Haú hkûn, shí yùq rajung, mhó yùq rajung ga taî bum akô nghut ri. 20 Ló htáng má, sô rayùq hí shut htoq lé mù, haû Yhûmsîng Garaî é hí má yàp to luî, ‘Yhang lé ngò ê lâng nghoq râ nghut lhê.’ ga taî ri.
Haû jáng, haû Yhûmsîng Garai gi, ‘Hkâsu kut ê lâng nghoq râ lhú?’ ga myî ri.
21 Sô haû gi, ‘Ngò ê mù, yhâng é myìqhtoi bànshoq bâng é nhut má mhaû é sô ê kat byi râ nghut lhê.’ ga taî ri.
Haû jáng, haû Yhûmsîng Garai gi, ‘Nàng, yhang lé wó lâng nghoq yû râ nghut lhê; haú dông ê kut àq.’ ga taî ri.
22 Haû mù, haû Yhûmsîng Garai gi, náng é myìqhtoi shí bâng é nhut má mhaû é sô kat byi bê nghut ri. Haû Yhûmsîng Garai gi, náng é matú ihkyùp jé nhâng râ hkunmó hkyó bê nghut ri.” ga taî ri.
23 Haû mù, Hkenana é yhang zo Zedeki-a gi, ê luî, Mihkai-a lé bo-pyuq pyuq byi mù, “Haû Yhûmsîng Garaî é sô gi, nang lé dang nyô shoq, ngá chyáng mai hká dông htoq ló byùq é nghut lhê lhú?” ga myî ri.
24 Mihkai-a gi, “Nàng, ló haq râ ga ahkaû wàp shut wang ló é buìnyì má myàng râ nghut lhê.” ga tû taî ri.
25 Haû jáng, Isira-elaq hkóhkâm gi, “Mihkai-a lé chyup yû mù, wà zau Amon eq hkóhkam é yhang zo Yo-ashi chyáng taû nhang kat luî, 26 ‘Hkóhkâm taî le, “Shi yùq lé htóng má kat pyám luî, ngò ngón za dum taû jé lo é hkûn jé shoq, wuì eq mùk za byi tso byi huq nyî láng keq.” gâ ri.’ nghû taí keq.” ga hkunmó hkyô ri.
27 Haú hkûn, Mihkai-a gi, “Nàng ngón za wó dum taû lò râ ru nghut le gi, ngò dông mai haû Yhûmsîng Garai taí berâ a nghut.” ga taî ri. Hau htâng, yhang gi, “Mingbyû wuì bànshoq bang ê, ngá é dang pé lé gyô xûm to keq.” ga le xoq taî ri.
Ramot Gile-at Má Ahap Sat Huî É Hkyô
28 Haû mù, Isira-elaq hkóhkâm eq Yudaq hkóhkâm Yehoshahpat gi, Ramot Gile-at wà shut dòq e ló bekô nghut ri. 29 Isira-elaq hkóhkâm gi, Yehoshahpat lé, “Ngò gi, mâyu hking htaî wùt chûng mù, majan pá má wang ê râ nghut lhê; nàng kúm gi, hkóhkâm hking wùt chûng aq.” ga taî ri. Haû mù, Isira-elaq hkóhkâm gi, mâyu gyèhking wùt chûng mù, majan pá shut wang e ló bê nghut ri.
30 Haû Aram hkóhkâm gi, yhâng é gyèlhêng kon zau wuî lé, “Isira-elaq hkóhkâm mai lai luî, tiq é kô é ó yùq lé le majan hkâzan kó.” ga hkunmó hkyô tô ri. 31 Haû gyèlhêng kon zau wuî gi, Yehoshahpat lé myàng kôjáng, “Shí yùq gi, Isira-elaq hkóhkâm nghut bê.” ga myìt yù kômù, yhang lé taû htîm akô nghut ri; nghut kôlhang, Yehoshahpat gi, wùt garû ngau é nghut mù, haû Yhûmsîng Garai gi, yhang lé garúm yû luî, yhángmòq lé taû ló byùq nhâng bê nghut ri; 32 hkâsu mù gâ le, gyèlhêng kon zau wuî gi, yhang, Isira-elaq hkóhkâm a nghut é lé myàng kôjáng, yhang lé a hkat lo kó nghut ri.
33 Nghut kôlhang, rayùq sû gi, yhâng é lai lé bìk lhâm kat é nghut mù, Isira-elaq hkóhkam é wànggò long eq wamgò long gyoro má bìk záng byi bê nghut ri. Haû mù, hkóhkâm hpó gi, gyèlhêng kon sû lé, “Lhîng mù, ngo lé majan pá shî mai shuî htoq ló aq; ngò dàm dap bê nghut ri.” ga taî ri. 34 Ra-nyí buì yhang majan htan dik é nghut mù, Isira-elaq hkóhkâm hpó gi, Aram byu pê shut hû luî, myínhtâng jé shoq yhâng é gyèlhêng má nyhuî nghe tô ri. Yhang gi, buì wang é hkûn shi byùq bê nghut ri.