Yudaq Hkóhkâm Yehoshahpat
17
Asa é yhang zo Yehoshahpat gi, yhâng é hkóhkâm hkô má zùng mù, Isira-elaq mau bang lé htuqhtíng râ ga wum-o lhoqkîng nyi ri. 2 Yhang gi, Yudaq mau mâ é gingtíng wà mó pé bànshoq má gyè hpúng tsing nyhi tô é htoq agó, Yudaq mau má le, yhâng wa wó zân ung yu é Ehprim mau mâ é wà pé má le, zúng é gyè pé tsing nyhi tô ri.3 Yehoshahpat gi, yhâng é hí mâ é, yhâng é îchyí îwa Dawiq é hkyô pé má châng é yánmai, haû Yhûmsîng Garai gi, Yehoshahpat eq rahá nghut nyi ri. Yehoshahpat gi, Balaq hparà pé lé a ho é za, 4 yhâng wâ é Garai Gasang lé shèq hô mù, Isira-elaq byu pé kut é hkyô lé a kut é za, Yhâng é hkunmó pé lé châng nyi é nghut ri. 5 Haû mù, haû Yhûmsîng Garai gi, mîngdán lé yhâng é lòq má lhoqgîng to byî é nghut mù, Yudaq byù bànshoq bang gi, yhâng chyáng chyûnghuq yu lé byi kô é nghut luî, Yhang gi, sùtzè myo myo wó é eq xânghpoq nge wó bê nghut ri. 6 Yhâng é i-myìt nhiklhum gi, haû Yhûmsîng Garaî é hkyô pé má àp nhong to bê nghut mù, Yudaq mau mai myhang é hparà noq jowò pé eq Ashera hparà zìng pé lé huî sêng pyâm ri.
7 Yhang gi, yhang hkóhkâm kut é sum zan zàn má, Yudaq mau mâ é wà pé má ê mhoqshit râ matú, zaugun wuì nghut é, Ben Haila, Obadi-a, Zehkariq, Nehtanela eq Mihkai-a pé lé nhang kat ri. 8 Haú bang eq rahá, Lewiq byù Shemai-a, Nehtani-a, Zebadi-a, Asahela, Shemiramot, Yehonahtan, Adoniya, Tobiya eq Toba Adoniya le, hkyangjong Elishama eq Yehoram nhik le bo lom akô nghut ri. 9 Yhángmòq gi, haû Yhûmsîng Garaî é târâ laiká bùk yu chûng mù, Yudaq mau gón mhoqshit akô; yhángmòq gi, Yudaq mau mâ é wà pé bànshoq má ê sô jé kôluî, mingbyû wuì lé mhoqshit akô nghut ri.
10 Haû mù, Yudaq mau lhînghkyùq mâ é mîngdán bànshoq mâ é bang gi, haû Yhûmsîng Garai lé gyùq kyum bùm bekô nghut mù, Yehoshahpat lé majan a lé wám zan lo kó nghut ri. 11 Hpilisiti byu pé ra-am gi, Yehoshahpat lé chyûnghuq pé eq hkán kat é ngùnhtung lé byî akô nghut ri; Arabi byu pé le, saulo nyhit hkying nyhit shô du eq bainám lo nyhit hkying nyhit shô du lé chyûnghuq akô nghut ri.
12 Yehoshahpat gi, je riyhang wum-o a-tsam bo lò mù, Yudaq ming má gyèwap pé eq sùtzè to râ wà mó pé tsing saî tô ri. 13 Haû mù, Yudaq mau mâ é wà mó pé má zoshuq gyai wó bekô nghut ri. Yhang gi, Yerusalem wà mó má le a gyùq a wam é sarhê pé nyhi tô ri. 14 Yhángmòq é yhûmhtu má cháng luî, tsing gùq tô é jihpán gi, Yudaq up mai, hkyîng ùp zau pé gi, gyèzau Atna eq sarhê pé sûm sen; 15 hau htâng má, gyèzau Yehohanan eq sarhê pé í sên shit mun; 16 hau htâng má, haû Yhûmsîng Garaî é múzó é matú yhûmsîng gùng yhang àp nhong é, Zihkri é yhang zo Amasi-a eq sarhê pé í sen nghut ri. 17 Ben-yamin up mai, a gyùq a wam é sarhê Eli-ada eq rahá, lai pé chung é eq gòlong pé wàq é byù í sen; 18 hau htâng má, Yehozabat eq majan zan râ rì rì nghut é sarhê pé rasên shit mun nghut ri. 19 Shí bang gi, Yudaq mau gón mâ é gingtíng wà mó pé má hkóhkâm nyhi tô é gyè hpúng pé mai lai luî, hkóhkâm lé dójaú é byu pé nghut akô.