Asa É Ló Htâng Zànwut Pé
16
Asa ùp é súm xe hkyuq zan zàn má, Isira-elaq hkóhkâm Basha gi, Yudaq hkóhkâm Asa é mau má ó le htoq wâng a wó kut râ matú, Yudaq mau má ê dòq htim mù, Rama wà lé ê xuq gingtîng tô ri.2 Haû mù, Asa gi, haû Yhûmsîng Garaî é noqkuq yhûm mâ é sùtdò eq yhâng é hkóhkâm wâng mâ é sùtdò lé hpóng mù, ngùn eq hîng lé yu htoq luî, Damasikuq wà má zung é Aram hkóhkâm Ben Hadat chyáng hun kat mù, 3 “Náng wa eq ngá wâ é gyoro má dangshikaq tô é su, ngò eq náng é gyoro má le dangshikaq to gòq. Wú aq; ngò gi, náng chyáng ngùn eq hîng hun kat lhê. Ahkuî, Isira-elaq hkóhkâm Basha gi, ngá chyáng mai taû ló byùq sháng gàq, yhang eq nàng tô tô é dangshikaq lé lhoqhtên pyám aq.” ga châng taî kat ri.
4 Ben Hadat gi, Hkóhkâm Asa lé myìt hui byi mù, yhâng é gyèzaû pé lé, Isira-elaq byu pê é wà pé shut nhang kat luî, yhángmòq gi, Iyon wà, Dan wà, Abela Ma-im wà eq Naphtali up bâng é maumyî mâ é zè to wà pé bànshoq lé wó zân ung yù bekô nghut ri. 5 Basha gi, haú hkyô lé wó gyo jáng, Rama wà xuq nyi é hkyô lé nô pyám mù, yhâng é múzó bànshoq lé tô pyâm to bê nghut ri. 6 Hkóhkâm Asa gi, Yudaq byu pé bànshoq lé wùt yù mù, Basha mai Rama wà saî xuq hkûn chung é lùqgòk pé eq sik pé lé chôm wàq yù kôluî, Geba wà eq Mizipa wà xuq akô nghut ri.
7 Haú hkûn, myìqhtoi Hanani gi, Yudaq hkóhkâm Asa chyáng lé mù, yhang lé, “Nàng gi, náng é Garai Gasang nghut é, haû Yhûmsîng Garai lé a lùmhkau é za, Aram hkóhkâm lé lùmhkaû bê nghut é yánmai, Aram hkóhkâm é gyèzô pé gi, náng é lòq mai wó hpang lùt bekô nghut ri. 8 Hkusha byu pé eq Libya byu pé gi, gyè hpúng mó le, gyèlhêng pé eq myang ji ji bang myo myo le nghut kô é, a nghut lhú? Nghut kôlhang, haû Yhûmsîng Garai lé lùmhkaû jáng, Yhang gi, yhángmòq lé náng é lòq má àp é nghut lhê. 9 Hkâsu mù gâ le, haû Yhûmsîng Garaî é myòqjí gi, Yhang lé i-myìt nhiklhum bànshoq èq àp nhông bang lé wum-o lhoqkíng byi râ ga, myìdàm htoq gón má byu wú nyi ri. Nàng gi, ngòk é hkyô kut pyám bê nghut ri; ahkuî mai náng chyáng majan htoq nyî berâ nghut lhê.” ga taî ri.
10 Asa gi, hau é yánmai myìqhtoi hpó lé nhikmó-yo luî, yhang lé htóng má lhûng pyâm ri. Haú hkûn, Asa gi, shiwa byù ra-am lé le htân htân zing-rî ri.
11 Asa ùp é hkyô pé awang mai ahpyo hpyot lé gi, Yudaq eq Isira-elaq hkóhkam pê é laiká bùk má kâ tô é nghut ri. 12 Asa ùp é súm xe gaú zan zàn má, yhang gi, hkyî má dàm dàp luî, gyai yhang no júng nyi ri. Yhang gi, haú í yhang no júng nyî kôle, haû Yhûmsîng Garai lé a ho é za, chi sará pé lé shèq ho ri. 13 Haû mù, yhang gi, hkóhkâm kut é myí xe razan zàn má shi ló byùq luî, yhâng é îchyí îwâ pê chyáng ló bo bánnô nyi byùq bê nghut ri. 14 Mingbyû wuì gi, yhang lé, ge saî é bang saî tô é namngón jung pé eq namngón xû byíng tô é hpyang má jáng to luî, Dawiq é Wà má, yhâng é matú, yhang yhang kyûng tô é lùp má myhup yhûm pyám bekô nghut ri; hau htoq agó, yhángmòq gi, yhang lé hkúnggâ é dông myihkyóm mó le mùt akô nghut ri.