Hparà Lhô Pé Lé Asa Lhoqhtên Pyâm É Hkyô
15
Garai Gasâng é Sô gi, Odet é yhang zo Azari-a chyáng lé jé é nghut mù, 2 Azari-a gi, Asa lé ê hui luî, yhang lé, “Asa, Yudaq byu pé eq Ben-yamin byu pé bànshoq ê, ngá é dang gyo keq. Haû Yhûmsîng Garai eq núngmòq rahá nghut nyi é hkûn, Yhang le núngmòq eq rahá nghut nyi é nghut lhê. Núngmòq, Yhang lé hô jáng, myang hô kôrâ nghut lhê; nghut kôlhang, núngmòq, Yhang lé tô pyám kôjáng, Yhang le núngmòq lé tô pyám râ nghut lhê. 3 Isira-elaq a-myû má, tengmán é Garai Gasang a nyi é, mhoqshit é hkyangjong a nyi é eq târâ a cháng kut é gyai myáng byùq bê nghut lhê. 4 Nghut kôlhang, yhángmòq gi, byò dàn byò sho hui kô é hkûn, Isira-elaq é Garai Gasang, haû Yhûmsîng Garaî chyáng lhing lô kômù, Yhang lé hô kôluî, myang hô bekô nghut ri. 5 Haú yòq haú bun pé má, maumyî haú pé má nyi é bànshoq bang gi, wuîhke jamjau mó hpu zô nyì kô é yánmai, htoq ló wang lò gyai a yùqyò kó nghut ri. 6 Garai Gasang gi, wuîhke jamjau jung hkangmó èq yhángmòq lé hpu zo nhang nyi é nghut mù, yhángmòq gi, ra-myû eq ra-myû, rawà eq rawà, lhoqhten lhoqhkyop lhûm nyi akô nghut ri. 7 Nghut kôlhang, núngmòq gi, myìt wum a gyuî é za wum-o lhoqkíng keq; hkâsu mù gâ le, núngmòq zui saî é eq rajung za chyûnghuq wó kôrâ nghut lhê.” ga taî ri.8 Asa gi, dang haú pé eq myìqhtoi Odet é yhang zo Azari-a é myìqhtoi dang lé wó gyo jáng, myìt wum lhoqkîng yù mù, Yudaq mau eq Ben-yamin mau gón mai le, Ehprim bum mau má yhang wó zân ung yu é wà pé mai le, achaq achyut é hparà hpôlhô lé huî sêng pyám mù, haû Yhûmsîng Garaî é noqkuq yhum é laìshînhtâng hí mâ é Yhûmsîng Garaî é hkungga gyàp lé saî saí bê nghut ri.
9 Haû mù, yhang gi, Yudaq up bang eq Ben-yamin up bang bànshoq lé le, yhángmòq chyáng bo nyi é Ehprim koq, Manase koq eq Sime-on up lé le, zùp zing nhang tô ri; hkâsu mù gâ le, Asa é Garai Gasang, haû Yhûmsîng Garai gi, yhang eq rahá nghut nyi é lé Isira-elaq byu pé myàng kôjáng, yhángmòq chyáng mâ é byù myo myo gi, yhâng chyáng lé dàp bum akô nghut ri.
10 Yhángmòq gi, Asa ùp é raxe ngó zan zàn, lha-mó sum hkyap hkyap lé, Yerusalem wà mó má lé zùp zîng akô nghut ri. 11 Haú nyí, yhángmòq gi, wó lú lo é zè pé mâ é no nyhit shô du eq sau bainám nyhit hkyîng du, haû Yhûmsîng Garai lé hkungga nhông byî akô nghut ri. 12 Hau htoq agó, yhángmòq gi, yhángmòq é îchyí îwâ pê é Garai Gasang, haû Yhûmsîng Garai lé, yhángmòq é i-myìt nhiklhum bànshoq eq i-myìt sô bànshoq èq hô râ matú dangshikaq tô akô nghut ri. 13 Haû gi, Isira-elaq é Garai Gasang, haû Yhûmsîng Garai lé a ho é, byù mó byù zo nghut nghut, yùqgè myiwe nghut nghut, bànshoq lé sat pyám ra râ hkyô nghut lhê. 14 Yhángmòq gi, htê mó o mó kut luî, tut pé eq hkyuî lhabó pé mùt myhíng mù, haû Yhûmsîng Garai lé dâkam akô nghut ri. 15 Yudaq byù bànshoq bang gi, yhángmòq é i-myìt nhiklhum bànshoq èq dakâm bekô nghut é yánmai, haû eq séng luî gabú byam chyû bum akô nghut ri. Yhángmòq gi, Garai Gasang lé myìt lòm tung hô kômù, myang hô bekô nghut luî, haû Yhûmsîng Garai gi, yhángmòq lé jowò hkangmó má bánno nhâng bê nghut ri.
16 Hkóhkâm Asa gi, yhâng whoí Mahka mai Ashera lé noqkuq râ matú achaq achyut é alhô saî é yánmai, yhâng whoí lé hkóhkâm myhí ayá mai lhoqhkyô pyám byi luî, alhô haú lé zân lhêng yù mù, lhoqhkyop pyám luî, Kidron Langhkaû má nyhê hkyô pyâm ri. 17 Yhang gi, Isira-elaq mau mâ é myhang é hparà noq jowò pé lé a huî sêng pyám kôlhang, yhâng é i-pyàt bànshoq má haû Yhûmsîng Garai lé yhâng é i-myìt bànshoq èq àp nhong nyi ri. 18 Yhang gi, yhánghpe tâng àp nhong tô é ngùn, hîng eq zèhkoq pé lé, haû Yhûmsîng Garaî é noqkuq yhûm má kat tô ri.
19 Asa hkóhkâm kut é súm xe ngo zân jé shoq majan a htoq lo nghut ri.