14
Abiya gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà má myhup yhûm pyâm é hui bê nghut ri. Yhang zo Asa gi, yhâng é hkóhkâm hkô má zùng bê nghut ri. Yhang hkóhkâm kut é buìnyì pé má, mîngdán gi, raxê zàn yhang nguì ngón bê nghut ri.Asa Yudaq Hkóhkâm Kut É Hkyô
2 Asa gi, yhâng é Garai Gasang nghut é, haû Yhûmsîng Garaî é myòq hí má ge é eq jô é têng é hkyô kut ri. 3 Yhang gi, gó-mîng byu pê é kaúgyàp pé eq myhang é hparà noq jowò mâ é hparà zòng pé lé lhoqhkyop pyám mù, chyoiyúng lùqzìng pé lé bàt hpyi pyám luî, Ashera hparà zìng pé lé zân lhêng pyâm ri. 4 Yhang gi, Yudaq byu pé lé, yhángmòq é îchyí îwâ pê é Garai Gasang, haû Yhûmsîng Garai lé hô nhâng mù, Yhâng é târâ pé eq hkunmó pé lé cháng nhang ri. 5 Yhang gi, Yudaq mau mâ é wà pé bànshoq é myhang é hparà noq jowò mâ é hparà zòng pé eq namngón jung nyhé hkungga gyàp pé lé lhoqhkyop pyâm é nghut mù, yhang ùp é a-ô má mîngdán nguì ngón bê nghut ri. 6 Yhang gi, mîngdán gón nguì ngón é yánmai, Yudaq mau má gingtíng wà mó pé xuq tô ri. Haû Yhûmsîng Garai gi, yhang lé bánno nhang é nghut mù, zànwut haú pé má, ó yùq le yhang eq majan a htoq kó nghut ri.
7 Asa gi, Yudaq a-myû wuì lé, “Ngá-nhúng, wà mó shí pé lé xuq mù, wàhkûm tsing saí luî, mâchya mó pé, hkum pé eq hkumkyáng pé tsing saî kat to sháng. Ngá-nhûng é Garai Gasang nghut é, haû Yhûmsîng Garai lé ngá-nhúng hô bê nghut é yánmai, mîngdán shî gi, ngá-nhûng é nghut nyi ashî; ngá-nhúng gi, Yhang lé ho é nghut luî, Yhang gi, ngá-nhúng lé lhînghkyùq bâng chyáng mai bánno nhang to bê nghut ri.” ga taî ri. Haû mù, yhángmòq gi, wà haú pé lé xuq mù, kô lam lò bekô nghut ri.
8 Asa gi, Yudaq a-myû up mai gòlong mó pé eq lhâm pé wó wàq wó chung é gyèzo sûm sen eq, Ben-yamin up mai gòlong zo pé eq lai pé chung é gyèzo í sên shit mun wó ri; shí bang bànshoq gi, a gyùq a wam é sarhê pé chyat nghut akô nghut ri.
9 Hkusha byù Zera gi, yhángmòq lé majan lé zan râ ga, gyèzo raxê sen, gyèlhêng sum shô cham eq kut luî, Maresha jé shoq yán lé lo akô nghut ri. 10 Haú hkûn, Asa gi, yhang lé ê hui râ ga htoq ê mù, Maresha nàm mâ é Zehpahta Langhkaû má majan zan râ matú jowò chôm yu tô akô nghut ri.
11 Haû mù, Asa gi, yhâng é Garai Gasang nghut é, haû Yhûmsîng Garai lé, “Yhûmsîng Garai ê, Nàng su, wum-o a bò sû lé garúm mù, wum-o a-tsam mó bò sû lé htím nhang é ó a nyì. Ngá-mòq é Garai Gasang nghut é, Yhûmsîng Garai ê, ngá-mòq gi, Nang lé lùmhkaû mù, Náng é myìng mai shî myhô myô é gyè jùm lé majan zan râ nghû lé bê nghut é yánmai, ngá-mòq lé garúm yû laq ô. Yhûmsîng Garai ê, Nàng gi, ngá-mòq é Garai Gasang nghut lhê; waxâng zo gi, Nang lé a ûng sháng gàq ô.” ga wùt dûng ri.
12 Haú hkûn, haû Yhûmsîng Garai gi, Hkusha byu pé lé, Asa eq Yudaq byu pê é hí má dàm byî é nghut mù, Hkusha byu pé gi, hpâng bekô nghut ri; 13 haû mù, Asa eq yhâng é gyèzô pé gi, Gerara jé shoq yhángmòq lé châng hkat kômù, Hkusha byu pé gyè a wám dum zan loshoq, byù myo myo lé sat pyám bekô nghut ri; Hkusha byu pé gi, haû Yhûmsîng Garai eq yhâng é gyè hpúng hí má sûm byùq bekô nghut mù, Yudaq byu pé gi, zè gyai myo shoq wó lú yu ló bekô nghut ri. 14 Gerara awui ayàm pé mâ é wà pé bànshoq mâ é bang gi, haû Yhûmsîng Garai lé gyùq nán nyi bùm bekô nghut é yánmai, yhángmòq gi, wà haú pé lhoqhtên pyâm akô; yhángmòq gi, zè pé myô dìk shoq jòq é yánmai, zè haú pé lé wà haú pé mai lú yu pyám byi bekô nghut ri. 15 Yhángmòq gi, sau, bainám eq gola-uk pé lé zúng bâng é zúm lé lhoqhtên pyám mù, sau, bainám eq gola-uk myo myo lé le kôn chûng luî, Yerusalem wà mó shut taû ló bekô nghut ri.