Yudaq Mau Mâ É Hkóhkâm Abiya
13
Hkóhkâm Yerobo-am ùp é raxe shit zan zàn má, Abiya gi, Yudaq mau mâ é hkóhkâm dùt bê nghut ri. 2 Yhang gi, Yerusalem wà mó má hkóhkâm sum zân kut ri. Yhâng nu gi, Gibe-a byù Uri-ela é yhang zo byìzo Mahka nghut ri.Abiya eq Yerobo-am é gyoro má gi, majan htoq nyi ri. 3 Abiya gi, majan zan râ ga a gyùq a wam é sarhê myî sen hkyin yù mù, htoq e ló ri; haú hkûn, Yerobo-am le wum-o a-tsam bo é gyèzo shit sen hkyin yù mù, lhom htim râ hen tô ri.
4 Abiya gi, Ehprim bum mau mâ é Zemarim Bùm má yàp to mù, “Yerobo-am eq Isira-elaq byù bànshoq bang ê, ngá é dang lé gyo keq! 5 Isira-elaq é Garai Gasang, haû Yhûmsîng Garai gi, Isira-elaq byu pê é hkóhkâm wò lé, xo dangshikaqa dông mai, Dawiq eq yhâng é awùt ashîn pé lé ahtum abyùq byî to bê nghut é lé núngmòq a sé kó lhú? 6 Nghut kôlhang, Dawiq é yhang zo Sholumon é zaugun nghut sû, Nebat é yhang zo Yerobo-am gi, yhâng é yhûmsîng hpó lé gumlau toq bê nghut ri. 7 Rehobo-am gi, chyungxe zànwut tiq ashî mù, i-myìt a dìng shi luî, yhángmòq lé a lhom wó htuqhtîng é yánmai, a-kyû a htoq é agè ashop é byu pé gi, Yerobo-am é hkyam shut dàp kômù, Sholumon é yhang zo Rehobo-am lé htân htân htîm akô nghut ri.
8 Ahkuî le, núngmòq gi, Dawiq é awùt ashín pê é lòq má lúng tô é haû Yhûmsîng Garaî é mîngdán lé toq htuqhtíng râ hen akô nhung! Gè gè yhang, núngmòq gi, gyè ajùm ayò nghut é htoq agó, núngmòq é hparà pé dùt râ matú Yerobo-am saî é hîng no zo zòng pé le bo akô nhung. 9 Nghut kôlhang, núngmòq gi, haû Yhûmsîng Garaî é hkyangjông pé nghut é, Arun é yhang zo yhang shû pé eq Lewiq byu pé lé hkat htoq pyám kômù, gó-mau mâ é byu pé kut kô é su, yhûmsîng o é eq rajung za, yhûmsing é matú hkyangjông pé hkyin yù bekô nghut ri. Ó yùq le, hkyangjong wò yù râ matú nohtó zo radu eq saulo nyhit du lé sat nhông byî é sû gi, haî le a nghut é hparà pê é hkyangjong dùt nyì bekô nghut ri.
10 Ngá-mòq é matú kúm, haû Yhûmsîng Garai gi, ngá-mòq é Garai Gasang nghut luî, ngá-mòq gi, Yhang lé a tô pyâm é nghut lhê. Haû Yhûmsîng Garai lé dójaú é hkyangjông pé gi, Arun é yhang zo yhang shû pé nghut luî, Lewiq byu pé gi, yhángmòq lé htuqbáng é bang nghut lhê. 11 Yhángmòq gi, nàp wuì myìn wuì, haû Yhûmsîng Garaî é matú myi nyhé hkungga pé eq namngón shôm nhông byî akô; yhángmòq gi, htûngli dông sansêng é mùkgyàp htoq má mùk tô shit kômù, myìn wuì hîng myi-kok tsûngjang mâ é myi-kok pé lé tuq akô nghut ri. Ngá-mòq gi, ngá-mòq é Garai Gasang nghut é, haû Yhûmsîng Garai cháng nhang é eq rajung za châng nyi é nghut lhê. Nghut kôlhang, núngmòq gi, Yhang lé tô pyám bekô nghut ri. 12 Garai Gasang gi, ngá-mòq eq rahá nghut nyi lhê; Yhang gi, ngá-mòq é ushuq mó nghut lhê; Yhâng é hkyangjông pé gi, núngmòq lé majan zan râ matú, yhángmòq chung tô é tut mùt kôrâ nghut lhê. Isira-elaq byu pé ê, núngmòq gi, ûng kôrâ a nghut é yánmai, núngmòq é îchyí îwâ pê é Garai Gasang, haû Yhûmsîng Garai lé majan hkâzan kó ô.” ga taî ri.
13 Haú hkûn, Yerobo-am gi, gyèzo rahpúng lé yhángmòq é nùnghtáng shut haq lhing ê nhang ri; haû mù, Isira-elaq byu pé gi, Yudaq byu pê é hí shut rahpúng lhom to mù, htâng shut le rahpúng haq lhom to bekô nghut ri. 14 Yudaq byu pé gi, lhing wú kat kô é hkûn, yhángmòq é hí shut htâng shut gyè byíng tô é lé myàng kôjáng, haû Yhûmsîng Garai lé wùt dûng ngau kô é nghut mù, hkyangjông pé gi, yhángmòq é tut mùt akô nghut ri. 15 Haú hkûn, Yudaq byu pé gi, majan toq htê garû kat kô é nghut mù, haû Yhûmsîng Garai gi, Abiya eq Yudaq byu pê é hí má, Yerobo-am eq Isira-elaq byu pé lé dam byi mù, sûm byùq nhâng bê nghut ri. 16 Isira-elaq byu pé gi, Yudaq byu pê é hí mai hpang akô; haû mù, Garai Gasang kúm gi, yhángmòq lé Yudaq byu pê é lòq má àp pyám bê nghut ri. 17 Haû mù, Abiya eq yhâng é gyè hpúng gi, yhángmòq lé gyai yhang sat kyop pyâm é nghut mù, Isira-elaq byu pé mâ é wum-o a-tsam bo é byù ngo sen shi byùq bê nghut ri. 18 Haú hkûn, Isira-elaq byu pé sûm byùq é nghut mù, Yudaq byu pé gi, yhángmòq é îchyí îwâ pê é Garai Gasang, haû Yhûmsîng Garai lé lùmhkaû kô é yánmai, ûngmyuq hkyô wó bekô nghut ri.
19 Abiya gi, Yerobo-am lé châng hkat mù, Behtela wà eq hau é awui ayàm mâ é wà pé, Yeshana wà eq hau é awui ayàm mâ é wà pé, Ehprun wà eq hau é awui ayàm mâ é wà pé lé, yhâng é lòq mai lú yû bê nghut ri. 20 Abiya é i-pyàt má, Yerobo-am gi, wum-o a wó bô lo nghut ri. Haû Yhûmsîng Garai gi, yhang lé dàm byî é nghut luî, yhang gi, shi byùq bê nghut ri.
21 Nghut kôlhang, Abiya gi, wum-o je bo byùq ri. Yhang gi, myiwe raxe myi yuq yù mù, yùqzo í xe í yùq eq byìzo raxe hkyuq yùq wó ri.
22 Abiya ùp é gótû hkyô pé, yhang kut é hkyô eq taî é hkyô pé lé gi, myìqhtoi Ido taî sân kyô é laiká má kâ tô é nghut lhê.