Hkóhkâm Shishak Yerusalem Wà Mó Lé Ê Htîm É Hkyô
12
Rehobo-am hkóhkâm kut é mîngdán gingtíng luî, yhang wum-o bo byùq é htâng má, yhang eq yhâng chyáng nyi é Isira-elaq byù bànshoq bang gi, haû Yhûmsîng Garaî é târâ lé tô pyám bekô nghut ri. 2 Haû Yhûmsîng Garai lé yhángmòq a jujúm kó nghut é yánmai, Egutuq hkóhkâm Shishak gi, Rehobo-am hkóhkâm kut é ngó zan zàn má, Yerusalem wà mó lé majan lé zân ri. 3 Yhang gi, Egutuq ming mai, gyèlhêng rahkying í shô cham, myang ji ji bang hkyuq mun le kut mù, yhang eq rahá a ung nghap é Libya gyè jùm, Sukim gyè jùm eq Ehti-opi gyè jùm le mù, dòq lé lô luî, 4 Yudaq mau mâ é gingtíng wà mó pé lé wó zân ung yù mù, Yerusalem wà mó má jé ri.5 Haú hkûn, myìqhtoi Shemai-a gi, Shishak lé gyùq luî, Yerusalem wà mó má chôm zîng tô é Rehobo-am eq Yudaq zaugun wuì chyáng ê jé mù, yhángmòq lé, “Haû Yhûmsîng Garai taî le, ‘Núngmòq, Ngo lé tô pyám bekô nghut ri; haû mù, Ngò gi, ahkuî, núngmòq lé Shishak é lòq má àp pyám bê nghut lhê.’ gâ ri.” ga taî ri.
6 Haû Isira-elaq byu pê é zaugun wuì eq hkóhkâm hpó gi, yhángmòq é i-myìt lhoqnyhum pyám kômù, “Haû Yhûmsîng Garai gi, díngmán sû nghut ri.” ga taî akô.
7 Yhángmòq i-myìt lhoqnyhum pyám kô é lé haû Yhûmsîng Garai myàng jáng, Shemai-a chyáng haû Yhûmsîng Garaî é dang jé é gi, “Yhángmòq i-myìt lhoqnyhum pyám bekô nghut mù, Ngò gi, yhángmòq lé lhoqhtên pyám râ a nghut; Ngò gi, a myáng má yhángmòq lé hkyi yù hkyô hpóng byi râ nghut mù, Ngá é nhikmó-yo hkyô gi, Shishak é lòq dông Yerusalem wà mó htoq má hut hkyó râ a nghut lo. 8 Nghut kôle, yhángmòq gi, Ngo lé dójaú é hkyô eq gó-mau pé mâ é hkóhkam pé lé dójaú é hkyô shai lhûm é lé wó sé kôrâ matú, Shishak é jùn dut kôrâ nghut lhê.” gâ ri.
9 Egutuq hkóhkâm Shishak gi, Yerusalem wà mó lé ê htîm é hkûn, haû Yhûmsîng Garaî é noqkuq yhûm mâ é sùtzè pé eq hkóhkâm wâng mâ é sùtzè pé lé hkyom yu ló é htoq agó, Sholumon saî é hîng gòlong pé eq jung hkangmó lé le yu ló ri. 10 Haû mù, Hkóhkâm Rehobo-am gi, hîng gòlong pê é malaî gyi gòlong saí mù, hkóhkâm wâng hkum zúng bâng é zaugun wui é lòq má àp byî tô ri. 11 Hkóhkâm hpó, haû Yhûmsîng Garaî é noqkuq yhûm má wang ê hkangmó, hkum zúng bang gi, gòlong pé wàq chûng mù, yhang eq rahá châng wang ê luî, hau htâng, hkum zúng wàp má gòlong haú pé lé lo dum kat to to kut akô nghut ri.
12 Rehobo-am gi, i-myìt lhoqnyhum pyâm é yánmai, haû Yhûmsîng Garaî é nhikmó-yo hkyô gi, yhâng chyáng mai bui ló byùq bê nghut mù, yhang lé bànshoq a lhoqhtên pyám nghut ri. Hau htoq agó, Yudaq mau má le ge é hkyô bo ashî nghut ri.
13 Hkóhkâm Rehobo-am gi, Yerusalem wà mó má yhâng gùng lé wum-o lhoqkîng yù mù, hkóhkâm xoq kut nyi ri. Yhang gi, hkóhkâm dùt é hkûn chyungxe zànwut myí xe razàn bò bê nghut mù, Yerusalem wà mó má raxe nyhit zân ùp ri; wà mó haû gi, Yhûmsîng Garaî é myìng jòq to nhâng râ matú, Isira-elaq a-myû up bànshoq mai Yhâng èq hkyin yu é wà nghut ri. Rehobo-am é yhâng nu gi, Ammon byù Nama ga sû nghut ri. 14 Yhang gi, haû Yhûmsîng Garai lé yhâng é i-myìt bànshoq èq a hô shi nghut é yánmai, agè ashop hkyô kut é nghut ri.
15 Rehobo-am ùp é hkyô awang mai ahpyo hpyot lé gi, byùxik labaû gôn é, myìqhtoi Shemai-a eq myìqhtoi Ido é ká xûm laiká má kâ tô lhê, a nghut lhí? Rehobo-am eq Yerobo-am nhik é gyoro má gi, ayang majan htoq nyi ri. 16 Rehobo-am gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà má myhup yhûm pyâm é hui bê nghut ri. Yhang zo Abiya gi, yhâng é hkóhkâm hkô má zùng bê nghut ri.