11
Rehobo-am gi, Yerusalem wà mó má jé ló jáng, Yudaq up eq Ben-yamin up mai, Isira-elaq byu pé lé majan ê zan mù, mîngdán haú lé Rehobo-am chyáng dum lhoqhâng yù râ matú, gyèzo rasên shit mun lé wùt tsîng tô ri.2 Nghut kôlhang, Garai Gasâng é byù Shemai-a chyáng haû Yhûmsîng Garaî é dang jé é gi, 3 “Yudaq hkóhkâm Sholumon é yhang zo Rehobo-am lé le, Yudaq mau eq Ben-yamin mau má nyi é Isira-elaq byù bànshoq lé le, shî su nghû taí aq; 4 ‘Haû Yhûmsîng Garai taî le, “Núngmòq é gu-mang Isira-elaq byu pé lé majan hkâ-é dòq zan kó; shí hkyô gi, Ngò kut é nghut é yánmai, núngmòq yùq hkangmó yhûm taû ló keq.” gâ ri.’ nghû àq.” gâ ri. Haû mù, yhángmòq gi, haû Yhûmsîng Garaî é dang pé lé gyo mù, Yerobo-am lé majan ê zan râ ga yán e ló é mai taû ló bekô nghut ri.
Rehobo-am Yudaq Mau Lé Lhoq Gingtîng É Hkyô
5 Rehobo-am gi, Yerusalem wà mó má nyì mù, Yudaq mau má gingtíng wàhkûm bo é wà pé xuq ri. Haú pé gi, 6 Betlehem, Etam, Teko-a, 7 Bet Zura, Sohko, Adulam, 8 Gat, Maresha, Zihpa, 9 Adorim, Lahkisha, Azeka, 10 Zora, Aiyalon eq Hebron pé nghut akô. Wà shí pé gi, Yudaq eq Ben-yamin mau má gingtîng é wà mó pé nghut ri. 11 Rehobo-am gi, gingtîng é wà haú pé má gyèwum jàt mù, gyèzaû pé nyhi to luî, zoshuq, tsanlun xû eq tsibyiq wing pé htuqbáng byî ri. 12 Yhang gi, wà haú pé bànshoq má gòlong pé eq lhâm pé tsing tô to mù, wà haú pé lé wum gyai bô nhâng bê nghut ri. Haû mù, yhang gi, Yudaq eq Ben-yamin lé ùp bê nghut ri.
13 Isira-elaq ming gón mâ é hkyangjông pé eq Lewiq byu pé gi, yhûmsîng nyi é mau mai yhâng é hkyam shut chyat bo lom bum akô nghut ri. 14 Lewiq byu pé gi, yhángmòq é mhan nú yô pé eq sùtzè pé lé tô pyâm to kôluî, Yudaq mau eq Yerusalem wà mó má lé jé akô; hkâsu mù gâ le, Yerobo-am eq yhang zô pé gi, yhángmòq lé, haû Yhûmsîng Garaî é hkyangjông pé dông a hàp yù kut kô é nghut mù, 15 Yerobo-am gi, myhang é hparà noq jowò pé mâ é matú le, yhang saî é bainám hparà lhô pé eq no hparà lhô pê é matú le, yhâng é yhang, hkyangjông pé hkyin masàt yu ri. 16 Haû Isira-elaq a-myû up hkangmó mâ é, yhûmsing é i-myìt bànshoq èq, Isira-elaq é Garai Gasang, haû Yhûmsîng Garai lé ho é bànshoq bang gi, yhángmòq é îchyí îwâ pê é Garai Gasang, haû Yhûmsîng Garai lé hkungga pé nhông byi kôrâ matú, Yerusalem wà mó má Lewiq byu pê htâng châng lé lo bum akô nghut ri. 17 Yhángmòq gi, Yudaq ming lé lhoq gingtíng byi mù, Sholumôn é yhang zo Rehobo-am lé sum zân yhang htuqbáng byî kôluî, shî sum zân gyoro má Dawiq eq Sholumon é hkyô pé châng akô nghut ri.
Rehobo-am É Yhûmbyù Wuì
18 Rehobo-am gi, Yesê yhang zo yùqzo Eli-ap é yhang zo byìzo Abihaila eq Dawiq é yhang zo yùqzo Yerimot nham é yhang zo byìzo Mahalat lé yu ri. 19 Mahalat gi, yùqzo Ye-usha, Shemari-a eq Zaham nhiktâng wuì lé hku ri. 20 Hau htâng, Rehobo-am gi, Apsalom é yhang zo byìzo Mahka lé yu é nghut luî, yhang gi, Abiya, Atai, Ziza eq Shelomit nhiktâng wuì lé hku ri. 21 Rehobo-am gi, yhâng é myi-mó myi-ngê wuì góbang bànshoq htoq má Apsalom é yhang zo byìzo Mahka lé je chyitdàp ri. Yhang gi, yhûmsîng myhí raxe shit yùq eq myi-ngê hkyuq xê yùq yu é nghut luî, yùqzo í xe shit yùq eq byìzo hkyuq xê yùq hku ri.
22 Rehobo-am gi, Mahka é yhang zo Abiya lé, yhang gu yhang mâng pê é zau kut nhang ri; haû gi, yhang lé hkóhkâm kut nhâng râ myìt tô é hkyô nghut ri. 23 Hau htoq agó, yhang gi, hpàqchyî dông, yhâng é yhang zo yùqzô pé lé, Yudaq mau eq Ben-yamin mau mâ é jowò hkangmó mâ é gingtíng wà mó pé má nyhi to luî, zoshuq myo myo tô to byi mù, myiwe myo myo yù byî tô ri.