NEHEMI-A
Laiká
(Nehemiah)
Nehemi-a É Kyûdung Dang
1
Hakali-a é yhang zo Nehemi-a é mungdang gi, a-ô mâ é eq rajung za nghut ri.Ngò gi, í xê zan zàna, Hkesile lhôhkyapb má, Susa wà mó mâ é gingtíng jowò má nyi nyi é u, 2 ngá é gu-mang wuì mâ é rayùq nghut é Hanani gi, byù ra-am eq kut, Yudaq mau mai ngá chyáng jé lé akô. Haú hkûn, ngò gi, yhángmòq lé, shúm zung é mai wó hpang lùt luî, taû ló é Yudaq byu pê é hkyô lé le, Yerusalem wà mó é hkyô lé le, myî é nghut lhê.
3 Yhángmòq gi, ngo lé, “Shúm zung é mai wó lùt mù, yhûmsing mau má dum taû jé lo é bang gi, wuîhke jamjau mó eq hoq hpû é huî nyi bùm akô. Yerusalem wà mó wàhkûm gi, gyòp gyó byùq mù, wà wàng hkum pé gi, nyhê hkyô pyâm é hui bê nghut ri.” ga taî kyô akô nghut ri.
4 Ngò gi, dang haú lé wó gyo jáng, zung gyó mù, ngau é nghut lhê. Ngò gi, buìnyì ra í nyí iyon yon mù, zoshuq túm luî, haû mauhkûng mâ é Garai Gasang lé kyûdung é nghut lhê. 5 Hau htâng, ngò gi,
“Mauhkûng htoq tsáng myhâng mâ é Garai Gasang, Yhûmsîng Garai ê, Nàng gi, hkìkhkam é eq gyùq chiq gíng é Garai Gasang nghut nyi ri. Nang gi, Nang lé chyit mù, Náng é hkunmó pé lé châng é bang lé, Náng é chyitdàp dangshikaq lhoqdìk byi Sû nghut ri. 6 Yhûmsîng ê, Náng é duìnhâng zoshâng wuì nghut é, Isira-elaq byu pê é matú, Náng é duìnhâng zoshâng ngò, Náng é hí má, nyí myín kyûdûng nyi é dang lé gyo byi râ matú, Náng é nohkyap tâm gyo byi mù, Náng é myòqjí hpông to byi laq. Ngò le, ngá wâ é yhûmbyù wuì le, ngá-mòq Isira-elaq byu pé mai Nang lé shut pyâm é mara pé lé, ngò yín yu lhê. 7 Ngá-mòq gi, Náng lé, gyai yhang agè ashop é dông kut shut bê nghut lhê. Náng é duìnhâng zoshâng Mosheq lé, Nàng byî tô é hkunmó pé lé le, târâ wàng hkunmó pé eq târâ pé lé le, ngá-mòq a cháng kut pyám bê nghut lhê.
8 Náng é duìnhâng zoshâng Mosheq lé, danghtum htûm tô é lé myìtbun byi laq. Haû gi, ‘Núngmòq a jujúm kô é nghut le gi, Ngò, núngmòq lé, gótû byù myû wui pê chyáng lhoqpyo pyám râ nghut lhê; 9 nghut kôlhang, núngmòq gi, Ngá chyáng dum taû lò mù, Ngá é hkunmó pé lé gyo kô é nghut jáng, shúm zung tô é núngmòq é byu pé, wê dik é maumyî chyûn má nyi tô bùm kôlhang, Ngò gi, yhángmòq lé shuî tsîng yù mù, Ngá é myìng jòq nyì râ matú, Ngò hkyin tô é jowò má, yhángmòq lé dum shuî lò râ nghut lhê.’ gâ é nghut lhê.
10 Yhángmòq gi, Náng é wum-o a-tsam mó eq Náng é wum mó bo é lòq èq hkyi xe yu tô é, Náng é duìnhâng zoshâng wuì eq Náng é byu pé nghut nyi ri. 11 Yhûmsîng ê, Náng é duìnhâng zoshâng ngá é kyûdung dang lé le, Náng é myìng lé gyùq hkúngga râ lé myìt ngui nyi é, Náng é duìnhâng zoshâng wui é kyûdung dang lé le, tâm gyo byi laq. Shî hkóhkam é hí má myòqdong wó nhang é dông, hkû-nyí, Náng é duìnhâng zoshâng ngo lé, ûngmyuq hkyô byi laq.” nghû dûng é nghut lhê.
Ngò gi, hkóhkâm hpó haú lé, tsibyiq wing jaú sû nghut lhê.