Nehemi-a Lé Yerusalem Wà Mó Shut Aritasase Nhang Kat É Hkyô
2
Hkóhkâm Aritasase ùp é í xê zan zàn, Nisan lhôhkyap má, hkóhkam é matú tsibyiq wing yu lò byi kôjáng, ngò gi, tsibyiq wing haú lé yù mù, hkóhkâm hpó lé jaú é nghut lhê. Ngò gi, hí lé, hkóhkam é hi má, hkâ-nhám le, myìt a ngón é hkyô a shit wú é nghut lhê; 2 haû mù, hkóhkâm gi, ngo lé, “Nàng a wángzán é su le a dùt é wá, haî mù náng é myòqdong haû í a yúng dùt nyi lhê lhú? Haû gi, myìt yón é alhô mai lai luî, gótû haî a ge nghut.” ga taî é yánmai, ngò gi, gyai yhang gyùq byùq é nghut lhê. 3 Nghut kôle, ngò gi, hkóhkâm lé, “Ngá é hkóhkâm gi, chyung hîng xé hing nyì sháng gàq! Ngá é îchyí îwâ pé lé myhup yhûm tô é wà mó gi, htên byòq byùq luî, wà wàng hkum pé lé myî èq nyhê hkyô pyâm tô le wá, ngá é myòqdong a yúng a dùt é hkâsu ge nyì râ lhú?” nghû taî é nghut lhê.4 Haú hkûn, hkóhkâm gi, ngò lé, “Nàng haî dúng nau ri lhú?” ga myî ri.
Hau jáng, ngò gi, mauhkûng htoq tsáng myhâng mâ é Garai Gasang lé kyûdung mù, 5 hkóhkâm lé, “Náng é duìnhâng zoshâng ngò gi, hkóhkam é hí má myòqdong wó mù, nàng hkóhkâm myìt ngui é nghut jáng, ngá é îchyí îwâ pé lé myhup yhûm tô é wà mó haú lé, ngò ló wó dum xuq râ matú, ngo lé, Yudaq mau mâ é wà mó shut ló nhâng laq.” nghû tû taî é nghut lhê.
6 Haú hkûn, hkóhkâm myhí eq rahá zung tô é hkóhkâm hpó gi, ngo lé, “Náng é gyunghkyô gi, hkâ-myháng myáng râ nghut lhê? Nàng hkâ-nhám dum taû lò râ lhú?” ga myî ri. Hkóhkâm hpó gi, ngo lé myìt hui bê nghut mù, ngò gi, yhang lé ahkyíng ding to bê nghut lhê.
7 Ngò gi, yhang lé, “Hkóhkâm myìt ngui é nghut jáng, Uhprat Wuìlàng buìwàng hkyam shut mâ é ming ùp zau wuî gi, ngò, Yudaq mau má ngón za jé shoq lhom lhaî kat kó sháng gàq, yhángmòq lé byi râ ahkáng laiká pé, ngo lé byî kat le gè râ làq? 8 Hau htoq agó, ngo lé, noqkuq yhûm lé zúng wú râ gingtíng jowo é wàng hkum pé saí râ matú le, wàhkûm saí râ matú le, ngò nyì râ yhûm saí râ matú le, sik lhom byi sháng gàq, hkóhkam é sik yô zúng zau Asap lé laiká ká byî kat le a gè lhú?” nghû taî é nghut lhê. Haû Garai Gasâng é jeju lòq gi, ngá chyáng ru joq nyi é nghut mù, hkóhkâm le, ngò dûng é hkyô pé lé gyo byi bê nghut ri. 9 Haû mù, ngo gi, Uhprat Wuìlàng buìwàng hkyam shut mâ é ming ùp zaû pê chyáng ê luî, yhángmòq lé, hkóhkâm byî kat é laiká ê byî é nghut lhê. Hkóhkâm hpó gi, gyèzaû pé eq myang ji jî é gyè hpûng lé, ngo eq rahá châng nhang kat ri.
10 Nghut kôlhang, Horoni byù Sanbalat eq duìnhâng zoshâng Ammon byù Tobi-a nhik gi, haú hkyô lé wó gyo kôjáng, Isira-elaq byu pé lé garúm râ byù rayùq jé lé lô bu-nhung ga gyai yhang myìt a ngón dùt byùq bekô nghut ri.
Yerusalem Wàhkûm Lé Nehemi-a Ê Wú Tû É Hkyô
11 Ngò gi, Yerusalem wà mó má jé ê mù, haú má sum nyí nyi yu é htâng, 12 myín lé, byù ra í yùq le shuî chûng mù, htoq e é nghut lhê. Ngò gi, Yerusalem wà mó é matú hkâsu kut byi râ hkyô lé, ngá é Garai Gasang èq, ngá é i-myìt nhiklhum má haî kat byî tô é hkyô lé, ó yùq lé le a taî kyo shi. Ngò jî é myang mai lai luî, gótû gaunyhaú a bo é nghut lhê.
13 Myín lé yhang, ngò gi, Langhkaû Hkum mai Mànjùng Wuìhtúng má ê mù, haû mai A-pyâng Hkum jé shoq ê luî, byòq htên byùq bê nghut é Yerusalem wàhkûm pé eq myî èq nyé gyó pyám bê nghut é wa hkum pé lé ê wú tû wú é nghut lhê. 14 Hau htâng, ngò gi, Wuìbúm Hkum eq Hkóhkam é Wuìhtum shut dum e é nghut lhê; nghut kôlhang, ngò jî é myang wó lai râ hkyô haú má a dong nghut ri. 15 Haû mù, ngò gi, myín lé yhang, langhkaû hkyô mai dòq ló uchyang wàhkûm lé tû wú ló é nghut lhê. Ló htáng má, ngò gi, dum tau mù, Langhkaû Hkum mai dum wang ló é nghut lhê. 16 Zaugun sûwún wuî gi, ngò hká shut ê mù, haî kut wún é hkyô lé a sé kó nghut ri; hkâsu mù gâ le, ngò gi, Yudaq byu pé lé le, hkyangjông pé lé le, xânghpoq nge wó bang lé le, zaugun sûwún wuî eq mú zuî nyì râ nghut é góbang ó yùq lé le, a taî kyo shî é yánmai nghut ri.
17 Hau htâng, ngò gi, yhángmòq lé, “Yerusalem wà mó gi, htên gyòp to mù, hau é wà hkum pé gi, myî èq nyé gyó byùq bê nghut é yánmai, ngá-nhúng wuîhke jamjau hui zô nyi é hkyô lé, núngmòq sê nyi lhê. Lé keq, ngá-nhúng gi, haû Yerusalem wàhkûm lé dum saî shap sháng. Haú hkûn, ngá-nhúng lé wú shôm pyâm é hkyô a jòq lo râ nghut lhê.” nghû taî é nghut lhê. 18 Ngò gi, yhángmòq lé, ngá chyáng Garai Gasâng é jeju lòq jòq nyi é hkyô eq hkóhkam èq ngo lé hkâsu ga taî é hkyô lé taî kyo bê nghut lhê.
Haú hkûn, yhángmòq gi, “Sâ, ngá-nhúng wà dum xuq lo sháng.” ga tû taî akô. Haû mù, yhángmòq gi, ge é múzó shî lé hî bekô nghut ri.
19 Nghut kôlhang, Horoni byù Sanbalat, duìnhâng zoshâng nghut é Ammon byù Tobi-a eq Arabi byù Geshem pé gi, haú hkyô lé wó gyo kôjáng, ngá-mòq lé, rhoî jihkyoî kut luî, wuìzuì kut pyám byî akô nghut ri. Yhángmòq gi, “Shî, núngmòq haî kut nyi akô lhú? Núngmòq gi, haû hkóhkâm lé gumlau toq nyi akô lhú?” ga myî akô nghut ri.
20 Haú hkûn, ngò gi, yhángmòq lé, “Mauhkûng htoq tsáng myhâng mâ é Garai Gasang gi, ngá-mòq lé ûng budang hkyô byi râ nghut lhê. Yhâng é duìnhâng zoshâng wuì ngá-mòq gi, wà dum xuq é múzó lé hî râ nghut lhê. Nghut kôlhang, núngmòq kúm gi, Yerusalem wà mó má, silî wunlî gàmbùm le, gótû hai ahko ahkáng le, mhô-myi masàt alhô agàn le, wó bo myang hkam yù kôrâ a nghut.” nghû tû taî é nghut lhê.