Wàhkûm Saî É Bang
3
Hkyangjong mó Eli-aship eq yhâng é hkyangjong luzúm wuî gi, toq e ló kômù, Sau Hkum lé saî saî akô nghut ri. Yhángmòq gi, haú lé lhoqchyoi lhoqyúng mù, hkum pé lé le tap to kôluî, Shô ùp Mâchya jé shoq le, Hananela Mâchya jé shoq le wàhkûm saí kôluî, haú lé lhoqchyoi lhoqyúng yu to bekô nghut ri. 2 Yhángmòq eq xoq xoq má gi, Yerihko byu pé saî akô; haû eq xoq xoq má gi, Imri é yhang zo Zahkura saî ri.3 Ngozo Hkum lé gi, Hasena é zodù wuì saî saî akô; yhángmòq gi, haû má, dangbàt pé kat mù, yhâng é jowò má yhang, hkum pé tap to luî, hkumkyáng pé eq hkumtáng pé lé kat tô akô nghut ri. 4 Haû eq xoq xoq má gi, Hakoza é yhang shu, Uri-a é yhang zo Meremot saî saî ri. Yhang eq xoq xoq má gi, Meshezabela é yhang shu, Berehki-a é yhang zo Meshulam saî saî ri; yhang eq xoq xoq má gi, Bana é yhang zo Zadok saî saî ri. 5 Haû eq xoq xoq má gi, Teko-a byu pé saî saî akô. Nghut kôlhang, yhángmòq é xânghpoq nge wó bang gi, yhángmòq é hkyô shit bânga é múzó lé a bo wùn wàq kó nghut ri.
6 Yeshana Hkum lé gi, Pase-a é yhang zo Yoi-ada eq Besodi-a é yhang zo Meshulam nhik saî saî akô; yhángnhik gi, haú má, dangbàt pé kat mù, yhâng é jowò má yhang, hkum pé tap to luî, hkumkyáng pé eq hkumtáng pé lé kat tô akô nghut ri. 7 Yhángmòq eq xoq xoq má gi, Gibe-on byù eq Mizipa byù nghut é, Gibe-on byù Melati-a eq Meronot byù Yadon pé saî saî akô; haú jowò pé gi, Uhprat Wuìlàng buìwàng hkyam mâ é ming zau ùp é ahkaû má nghut nyi ri. 8 Haû mai xoq xoq má gi, hîng lòqmú saí zo sû nghut é Harai-a é yhang zo Uzi-ela saî saî ri; haû eq xoq xoq má gi, namngón jung saí sû Hanani-a saî saî ri. Yhángmòq gi, Wàhkûm Làm Mó gâ é jé shoq, Yerusalem wà mó lé saî kyâm gîng yù bekô nghut ri. 9 Yhángmòq eq xoq xoq má gi, Yerusalem wà mó rawuí gû lé ùp é Hura é yhang zo Rehpai-a saî saî ri. 10 Haú má xoq luî, Haru-mahpa é yhang zo Yedai-a gi, yhâng yhûm tû-tap má saî saî ri; haû eq xoq xoq má gi, Hashabanei-a é yhang zo Hatusha saî saî ri. 11 Harim é yhang zo Malikiya eq Pahat-Moba é yhang zo Hashup gi, gótû rabun eq Myi Bunghkyûng Mâchya lé saî akô nghut ri. 12 Haû eq xoq xoq má gi, Yerusalem wà mó rawuí gû lé ùp é Halohesha é yhang zo Shalum mai, yhâng é byìzo pé garúm é èq saî saî ri.
13 Hanun eq Zano-a byu pé gi, Langhkaû Hkum saî saî akô. Yhángmòq gi, haú lé saî saí mù, hkum pé tap luî, yhâng é jowò má yhang, hkumkyáng pé eq hkumtáng pé lé kat tô akô. Yhángmòq gi, haû mai A-pyâng Hkum jé shoq, rahkyîng dúng hing é wàhkûm le saî saî akô nghut ri.
14 A-pyâng Hkum lé gi, Bet Hahkerim mau lé ùp é Rehkap é yhang zo Malikiya saî saî ri; yhang gi, hau lé saî saí mù, yhâng é jowò má yhang, hkum pé tap luî, hkumkyáng pé eq hkumtáng pé lé kat tô ri.
15 Wuìbúm Hkum lé gi, Mizipa mau ùp é Hkula-Hoze é yhang zo Shalum saî saî ri. Yhang gi, haú lé saî saí mù, maû to luî, hkum pé tap mù, yhâng é jowò má yhang, hkumkyáng pé eq hkumtáng pé lé kat tô ri. Hau htâng, yhang gi, hkóhkam é hkyâm nàm mâ é Shelab Wuìhtûm é xêwâm lé le, Dawiq é Wà mai gyó lo é zùmhtâng jé shoq saî saî ri. 16 Haû mai xoq xoq nghut é, Dawiq é lùp tû-tap mai, saî ge to bê wuìhtum eq Sarhê pê é Yhum pé jé shoq lé gi, Bet Zura mau rawuí gû lé ùp é Azabuk é yhang zo Nehemi-a saî saî ri.
Wàhkûm Lé Saî É Lewiq Up Pé
17 Haú mai xoq xoq má gi, Bani é yhang zo Rehum shuî-û é Lewiq byu pé saî saî akô. Yhâng é ayàm xoq xoq má gi, Kila mau rawuí gû lé ùp é Hashabi-a èq, yhâng é mau bâng é gùnglik dông saî saî ri. 18 Yhang eq xoq xoq má gi, Kila mau rawuí gû lé ùp é góyùq nghut sû, Henadat é yhang zo Binui shuî-û é, yhángmòq é gu-mang Lewiq byu pé saî saî akô nghut ri. 19 Yhang eq xoq xoq nghut é, gyèzè kat jowò shut dòq ló é jang tû-tap mai, wàhkûm chyûn jé shoq, gótû abun haú lé gi, Mizipa wà mó lé ùp é Yeshu-a é yhang zo Ezera saî saî ri. 20 Yhang eq xoq xoq nghut é, xêwâm chyûn haû mai hkyangjong mó Eli-aship é yhûm wàng hkum jé shoq, gótû abun haú lé gi, Zabai é yhang zo Baruk èq myìt lòm tung saî saî ri. 21 Yhang eq xoq xoq nghut é, Eli-aship é yhûm wàng hkum mai yhâng é yhûm ló htáng shoq, gótû haú bun lé gi, Hakoza é yhang shu, Uri-a é yhang zo Meremot saî saî ri.
Wàhkûm Saî É Hkyangjông Pé
22 Yhang eq xoq xoq má gi, haú mau awui ayàm mâ é hkyangjông pé saî saî akô nghut ri. 23 Haú bang eq xoq xoq má gi, Ben-yamin eq Hashup mai, yhángnhik é yhûm hí má saî saî akô. Yhángnhik eq xoq xoq má gi, Anani-a é yhang shu, Mase-a é yhang zo Azari-a èq, yhâng é yhûm nàm má saî saî ri. 24 Yhang eq xoq xoq má gi, Henadat é yhang zo Binui èq, Azari-a é yhûm mai wàhkûm goí jang eq achyûn jé shoq saî saî ri. 25 Wàhkûm goí tû-tap eq htóng zúng bâng é wâng nàm mâ é hkóhkâm wâng ahtoq túm mai saî jàt yu é mâchya jé shoq lé gi, Uzai é yhang zo Pala saî saî ri. Yhang eq xoq xoq má gi, Parosha é yhang zo Pedai-a eq, 26 Ohpela bum má nyi é noqkuq yhûm mâ é duìnhâng zoshâng wui èq, buìhtoq hkyam shut hu é Wuì Hkum tû-tap jowò eq saî jàt yu é mâchya jé shoq saî saî akô nghut ri.
Xoq Saî É Góbang
27 Yhángmòq eq xoq xoq má gi, Teko-a byu pé èq, saî jàt yu é mâchya mó mai Ohpela wàhkûm jé shoq, gótû rabun saî saî akô nghut ri.
28 Myang Hkum ahtoq shut má gi, hkyangjông pé èq, ó le ô é yhûm hí má saî saî akô nghut ri. 29 Yhángmòq eq xoq xoq má gi, Imera é yhang zo Zadok èq, yhâng é yhûm tû-tap má saî saî ri. Yhang eq xoq xoq má gi, Buìhtoq Hkyam Hkum zúng sû nghut é, Shehkani-a é yhang zo Shemai-a saî saî ri. 30 Yhang eq xoq xoq má gi, Shelemi-a é yhang zo Hanani-a eq Zalahpa é yhang zo layóng yùq Hanun èq, gótû rabun saî saî akô. Yhángnhik eq xoq xoq má gi, Berehki-a é yhang zo Meshulam èq, yhang nyi é yhûmwàng tû-tap má saî saî ri. 31 Yhang eq xoq xoq má gi, hîng lòqmú saí zo sû nghut é Malikiya èq, Jep Gon Hkum tû-tap mâ é, noqkuq yhûm mâ é duìnhâng zoshâng wuì eq wuìloq kut bâng é yhûm jé shoq le, wà chyûn ahtoq mâ é wàp jé shoq le saî saî ri. 32 Haû wà chyûn ahtoq mâ é wàp eq Sau Hkum gyoro má gi, hîng lòqmú saí zo bang eq wuìloq kut bâng èq saî saî akô nghut ri.