Htuqhtîng Lo É Hkyô Pé
4
a 1 Ngá-mòq wàhkûm dum saî saî nyi é hkyô lé, Sanbalat wó gyo jáng, yhang gi, gyai yhang nhikjum yo mù, i-myìt nyé luî, Yudaq byu pé lé wuìzuì kut pyám byi mù, 2 yhâng é gu-mang wuì eq Samariq gyèzô pê é hí má, “Haû a-nyhui ashuî é Yudaq byu pé gi, haî kut nyi akô làq? Yhángmòq gi, yhángmòq é wàhkûm lé, dum wó saî saî kôrâ lhú? Hkungga pé nhông byi kôrâ lhú? Ra-nyí má za, ban saí kôrâ lhú? Yhángmòq gi, nyé kyop byùq bê lùqgòk shí pé lé, A-pyâng bùm pé mai wó dum lhoqtui yù kôrâ lhú?” ga taî ri.3 Yhâng nàm má nyi tô é Ammon byù Tobi-a gi, “Yhángmòq saî nyi é lùqgòk xêwâm gi, wàmhkui radu dô dòq le lháng lêng gyòp byùq râ nghut lhê!” ga taî ri.
4 Ngá-mòq é Garai Gasang ê, ngá-mòq é dang lé gyo byi laq; haî mù gâ le, ngá-mòq gi, shôm pyâm é hui zô nyi ri. Yhángmòq é rhoî dang pé gi, yhángmòq chyáng dum taû jé sháng gàq. Lú yu pyâm é zè lé su, yhángmòq lé, shúm zung é mau má àp pyám aq. 5 Yhángmòq gi, wàhkûm saí bâng é hí má, Nang lé nhikjum lhoqyo kô é yánmai, yhángmòq kut shut é agè ashop hkyô lé hkâ-nghop pyám byi; yhángmòq é yubàk mara pé lé, Náng é hí mai hkâbùt sut pyám byi ô.
6 Haû mù, ngá-mòq gi, wàhkûm bànshoq lé, myhâng hpyang rawuí gû wó saî saí bê nghut lhê; hkâsu mù gâ le, shiwa byu pé gi, yhángmòq é i-myìt nhiklhum bànshoq èq saí kô é yánmai nghut ri.
7 Nghut kôlhang, Sanbalat, Tobi-a, Arabi byu pé, Ammon byu pé eq Ashidot byu pé gi, Yerusalem wàhkûm dum saî saî é hkyô lòqzó sô nyi bê hkyô lé le, dông tô é xêwâm pé saî xaû ló nyî bê hkyô lé le, wó gyo kôjáng, nhikjum mó yo bekô nghut ri. 8 Yhángmòq bànshoq bang gi, Yerusalem wà mó lé chôm htîm zan mù, haú má wuîhke jamjau chôm lhoqhtoq byi râ matú, byìn lé chôm hpyê lhûm akô nghut ri. 9 Nghut kôlhang, ngá-mòq gi, ngá-mòq é Garai Gasang lé kyûdung mù, yhángmòq é yánmai, lhôm râ byù nyí myín nyhi to bê nghut lhê.
10 Haú u lé, Yudaq mau byu pé gi, “Mú zui bang le wum nyhôm ló byùq bê nghut é htoq agó, hpoqkyuq hpoqpyâng le lûm myô tô é nghut mù, wàhkûm lé, ngá-mòq a wó saî saí lo.” ga taî bum akô nghut ri.
11 Hau htoq agó, ngá-mòq é gye pé gi, “Yhángmòq a sé a myàng shi kô é u lé, ngá-nhúng, yhángmòq chyáng wàng mù, yhángmòq lé sat pyám luî, kut nyi é múzó haú lé lhoqhkyîng pyám byi râ nghut lhê.” ga taî akô nghut ri.
12 Hau htâng, haú bâng é nàm má nyi é Yudaq byu pé gi, jé lé lô kômù, ngá-mòq lé, “Núngmòq hká shut lhîng kôlhang, ngá-nhúng lé yhángmòq htîm lò râ nghut lhê.” ga raxê dàm za lháng a nghut lé taî akô nghut ri.
13 Haû mù, ngò gi, shiwa byu pé ra-am lé, yhángmòq é yhûmhtu má cháng luî, shâm, lhâm eq lai pé chûng nhâng mù, san za dùt tô é, je ló nyhum é wàhkûm nùnghtáng má jowò hkyô tô é nghut lhê. 14 Ngò gi, múzó haú pé lé wú lajâng tô é htâng, toq mù, xânghpoq nge wó bang, zaugun sûwún wuî eq myìt gyó tô é shiwa byu pé lé, “Gyè pé lé hkâ gyùq kó. Haû hkìkhkam é eq gyùq chiq gíng sû nghut é Yhûmsîng lé myìtbun mù, núngmòq é gu-mang wui é matú le, núngmòq é yùqzo byìzô pê é matú le, núngmòq é yhûmsîng myhî pé eq yhûm yò pê é matú le, majan zan keq.” nghû taî é nghut lhê.
15 Ngá-mòq é gyè pé haq htung é hkyô lé ngá-mòq sê pyám byî é eq, Garai Gasang haú lé lhoqhtên pyám byi bê hkyô lé, yhángmòq wó gyo kô é hkûn, ngá-mòq bànshoq bang gi, wàhkûm xoq saí râ matú, ó le ô é múzó shut taû ló bê nghut lhê.
16 Haú nyí mai, ngá é byu pé rawuí gû gi, mû haû xoq kut kômù, gótû rawuí gû gi, lhâm, gòlong, lai pé eq gyèhking pé lé chung to wùt to kôluî, zúng nyi bum akô. Zaugun sûwún wuî le, wàhkûm saî nyi é Yudaq shiwa byù bànshoq bâng é htâng má yàp nyi bum akô nghut ri. 17 Zè wàq dé bang gi, ralòq èq yhángmòq é mû kut kômù, ralòq èq shâm lhâm chung tô akô nghut ri. 18 Wàhkûm saî é yùq hkangmó gi, mú zuî é hkûn, yhûmsing é shâm lé wun tô bum akô nghut ri. Nghut kôlhang, tut mùt é sû gi, ngò eq rahá nyi tô ri.
19 Hau htâng, ngò gi, xânghpoq nge wó bang, zaugun sûwún wuî eq myìt gyó tô é shiwa byu pé lé, “Ngá-nhûng é múzó shî gi, gyai ko gyaí lam é nghut mù, ngá-nhúng gi, wàhkûm ahtáng rayùq eq rayùq tsómra ra wê gâng lhûm tô bum é nghut lhê. 20 Tut htê lé hká jowò má núngmòq wó gyo kôlhang, ngá-mòq chyáng zîng lò keq. Ngá-nhûng é Garai Gasang gi, ngá-nhûng é matú majan bo zan byi râ nghut lhê.” nghû taî é nghut lhê.
21 Haû mù, ngá-mòq gi, byù rawuí gû shâm lhâm chung tô é bang le bò mù, maubó lo é mai kyî dum htoq lo é hkûn jé shoq, múzó haú lé xoq zuî é nghut lhê. 22 Haú hkûn, ngò gi, shiwa byu pé lé, “Yùq hkangmó eq yhang lé garúm sû gi, myín lé, Yerusalem wàhkaû má nyi to kó sháng gàq; haú jáng, yhángmòq gi, ngá-nhûng é matú, myín lé wú zúng bang wó dùt kômù, nyí lé mú zui bang wó dùt kôrâ nghut lhê.” nghû taî é nghut lhê. 23 Haû mù, ngò le, ngá é gu-mang wuì le, ngá é duìnhâng zoshâng wuì le, ngò eq rahá nyi é chyungxe zúng bang le, mèbu a hkyut kó; yùq hkangmó gi, yhûmsing é shâm lhâm lé a nhang pyám kó nghut ri.