Asho Awuî É Bang Lé Nehemi-a Garúm É Hkyô
5
Shiwa byù yùqgè wuì eq yhángmòq é yhûmsîng myhî pé gi, yhángmòq é gu-mang Yudaq byu pé lé, gyai yhang mara hun garû bum akô nghut ri. 2 Ra-am gi, “Ngá-mòq eq ngá-mòq é yùqzo byìzô pé gyai myô lhê; ngá-mòq gi, zoshuq myàng zo mù, chyungxe wó dui nyì râ matú, gùqzò muilhum wó râ ri.” ga taî akô.3 Góbang gi, “Ngá-mòq, mùtmó gyó é u lé, gùqzò muilhum wó râ matú, ngá-mòq é yò pé, tsibyiq hkyâm pé eq yhûm pé lé byam àp byî pyâm tô é nghut lhê.” ga taî akô.
4 Dum ra-am le, “Ngá-mòq gi, hkóhkâm lé, yò eq tsibyiq hkyam é hkán kat râ dùt mù, ngùn chyî yu to bê nghut lhê. 5 Ahkuî, ngá-mòq gi, ngá-mòq é a-myû Yudaq byu pé su, sui sho rajung za nghut é htoq agó, ngá-mòq é zodù wuì le, yhángmòq é zodù wuì su nghut kôle, ngá-mòq gi, ngá-mòq é yùqzo byìzô pé lé, ûng pyám luî, jùn kut nhâng râ byùq é nghut lhê. Ngá-mòq é byìzô pé ra-am gi, jùn kut nyi tô bùm bê nghut kôlhang, ngá-mòq é yohtung pé eq tsibyiq hkyâm pé gi, góbâng é lòq má lúng byùq bê nghut é yánmai, ngá-mòq gi, wum-o a-tsam a bò lo nghut ri.” ga taî bum akô.
6 Ngò gi, yhángmòq wùt garû é htê eq mara hûn dang haú pé lé wó gyo jáng, gyai yhang nhikjum yô byùq é nghut lhê. 7 Ngò gi, yhángmòq é hkyô lé, ngá é i-myìt má myìt wú mù, xânghpoq nge wó bang eq zaugun sûwún wuî lé, “Núngmòq gi, yhûmsing é byu pê chyáng mai a-myàt yù zô nyi akô lhú!” nghû mara hûn dang taî é nghut lhê. Hau htâng, ngò gi, haú hkyô lé taî sân pyám râ matú, shiwa mòqmó lé ji tsîng yù luî, 8 “Tûngbaù pé lé ungzô pyám bê nghut é ngá-nhûng é gu-mang Yudaq byu pé lé, ngá-nhúng wó dùt é í dum wui taû yù bê nghut lhê. Ahkuî, núngmòq gi, yhûmsing é gu-mang wuì lé dum taû ûngzô nyi akô lhú! Ngá-mòq gi, yhángmòq lé dum wui taû yù ra râ lhú?” nghû taí jáng, yhángmòq gi, haî le a ge tû taí lo kô é yánmai, zim za nyi tô akô nghut ri.
9 Haû mù, ngò gi, xoq luî, “Núngmòq kut nyi é hkyô gi, a jo nghut ri. Núngmòq gi, ngá-nhûng é tûngbaù gyè pê èq ngá-nhúng lé a taî hpoî pyám râ matú, ngá-nhûng é Garai Gasang lé gyùq hkúnggâ é èq sô nyi le a gè kó lhú? 10 Ngò le, ngá é gu-mang wuì le, ngá é byu pé le, shiwa byu pé lé, ngùn eq gùqzò muilhum chyi byî nyi lhê. Nghut kôlhang, a-myàt a yù zo lo chôm kut sháng! 11 Radá dâm, yhángmòq é yohtung pé, tsibyiq hkyâm pé, tsanlun hkyâm pé eq yhûm pé lé tau byi mù, yhángmòq chyáng mâ é gùq yu nyi é a-myàt nghut é ngùn, gùqzò muilhum, tsibyiq wing asik eq xû pé mâ é shô gàmbùm ragàmbùm tau byi keq.” nghû taî é nghut lhê.
12 Haú hkûn, yhángmòq gi, “Ngá-mòq, haú lé dum tau byi râ; yhángmòq chyáng mai haî le a dûng yù lo râ nghut lhê. Nàng taî é eq rajung za, kut berâ nghut lhê.” ga taî akô.
Hau htâng, ngò gi, hkyangjông pé lé ji yù mù, yhángmòq é hí má, xânghpoq nge wó bang eq zaugun sûwún wuî lé, yhángmòq danghtum htûm tô é eq rajung za kut kôrâ matú, dakâm nhâng bê nghut lhê. 13 Hau htâng, ngò gi, ngá é hpyidum mâ é hpyichyuq lé ko htoq kat mù, “Garai Gasang gi, danghtum htûm tô é shí lé a châng é sû ó yùq lé nghut kôle, shî su kut, yhâng é yhûm eq sùtzè pé mai ko htoq pyám sháng gàq. Haû mù, haû sû é yùq gi, ko htoq pyâm é eq akôm dùt byùq é hui zo sháng gàq.” nghû taî é nghut lhê.
Haú hkûn, haú má zîng tô é lhúnglhâng bang gi, “Amen.” ga taí kômù, haû Yhûmsîng Garai lé hkya-ôn bùm akô. Hau htâng, shiwa byu pé gi, yhángmòq danghtum htûm tô é eq rajung za, châng kut bekô nghut ri.
14 Hau htoq agó, ngò gi, Hkóhkâm Aritasase hkó zung é í xê zàn mai súm xe í zân jé shoq, raxe í zân yhang, Yudaq mau má, yhángmòq é ming zau wò yu nyi é hkûn, ngò eq ngá é gu-mang wuì gi, ming zau gàmbùm lé a zô é nghut lhê. 15 Nghut kôlhang, ngá é hí mâ é ming zau wuì gi, shiwa byu pé lé wò lai mó hûn mù, zoshuq eq tsibyiq wing lé hkyui yù kô é htoq agó, ngùnhtung hkyuq rûng kô kô le hkyui yu akô. Yhángmòq é a-ô mâ é bang le, shiwa byu pé lé ùp zô akô. Nghut kôlhang, ngò gi, Garai Gasang lé gyùq hkúnggâ é myìt mai, haû su a kut é nghut lhê. 16 Ngò gi, wàhkûm saî é mû lé za myìt zìng zùq nyi é nghut lhê. Ngá é byù bànshoq bang gi, mú kut râ matú haú jowò má zùp zîng bum akô; ngá-mòq gi, hai maumyî wó râ dông le a kut é nghut lhê.
17 Hau htoq agó, Yudaq byu pé eq zaugun sûwún wuî rasho ngo xê yùq za a nghut, awui ayàm mâ é a-myû wuì mai ngá-nhûng chyáng jé lé lo é bang le, ngá é zohpoq má zô bum akô nghut ri. 18 Nyí wuî, ngá é matú, no radu, myum yúng é sau hkyuq du eq wòq pé lé lajang byî akô. Hau htoq agó, raxê nyí má radàm, tsibyiq wing ajà jà lé, agùn agó byî akô. Nghut kôlhang, haû gi, shiwa byu pê é matú wòlai dùt é yánmai, ngò gi, hkâ-nhám le, ming zaû é zoshuq gàmbùm lé a dûng é nghut lhê.
19 Ngá é Garai Gasang ê, byù shí bâng é matú, ngò kut laî é múzó bànshoq é yánmai, ngo lé myìtbun luî, jeju shit laq ô.