Múzó Lé Je Htuqhtîng Lò Kô É Hkyô
6
Sanbalat, Tobi-a, Arabi byù Geshem eq ngá-nhûng é gyè góbang gi, ngò, haû wà wàng hkum pé lé a wó tap to shî é nghut kôle, wàhkûm lé a saî é jowò a jòq loshoq ban saî to bê nghut é hkyô lé wó gyo kô é hkûn, 2 Sanbalat eq Geshem nhik gi, “Gyó lô àq, Ono pá dam lam mâ é wà rawà má chôm huî lhum sháng.” gâ é dang lé, ngá chyáng lé taí nhang akô.Nghut kôlhang, yhángnhik gi, ngo lé jamjau byi râ matú hpàqchyî haq htung nyi akô nghut ri. 3 Haû mù, ngò gi, yhángmòq chyáng, lagyô pé lé nhâng mù, “Ngò gi, mú mó ralhum kut nyi é nghut luî, a wó gyó lô nghut ri. Núngmòq chyáng gyó lô râ matú za, múzó haú lé, ngò hkyê nô to râ lhú?” nghû, dum taû tû kat bê nghut lhê. 4 Yhángmòq gi, rajung zâ é danglù lé, ngá chyáng myi dâm yhang hun kat akô nghut ri; ngò le, dàm hkangmó rajung zâ é danglù lé, yhángmòq chyáng dum taû byî kat é nghut lhê.
5 Hau htâng, Sanbalat gi, ngo dâm nghû râ má rajung zâ é danglù lé, yhâng é duìnhâng zoshâng dông, ngá chyáng hun kat é nghut mù, yhâng é lòq má dizìk a htûng tap tô é laiká chung tô ri. 6 Laiká haú má,
“Nàng eq Yudaq byu pé gi, gumlau toq râ matú, hpàqchyî haq htung nyì kômù, wàhkûm saî nyi é hkyô lé, awui ayàm mâ é byù myû wuì mai taî nyi bum akô; haû têng é hkyô lé, Geshem le taî ri. Hau htoq agó, dang haú pé dông ga jáng, nàng gi, yhángmòq é hkóhkâm dùt berâ hkyô nghut mù, 7 ‘Yudaq mau má hkóhkâm rayùq nyi ri!’ ga, náng é hkyô lé, Yerusalem wà mó má taî pyô râ matú, myìqhtoi pé lé wò byî tô bê nghut ri. Ahkuî, hkyanglù haû gi, hkóhkam chyáng hkyang ròt ló berâ nghut mù, lé aq, ngá-nhúng rahá chôm hpyê lhum sháng.” ga bo tô ri.
8 Hau htâng, ngò gi, yhang lé, “Nàng taî é dang rahkun lháng a teng; náng é myìt mai hpàqchyî haq htung nyi é hkyô za nghut ri.” nghû tû taí nhang kat é nghut lhê.
9 Yhángmòq bànshoq gi, “Yhángmòq é lòq wum nyhôm byùq mù, múzó haû a wó lhoqpán kó sháng gàq.” ga myìt kôluî, ngá-mòq lé taî kyuq shi-kùt akô nghut ri.
Nghut kôlhang, ngò gi, “Ahkuî, ngá é lòq lé wum-o lhoqkíng byi laq.” nghû kyûdung é nghut lhê.
10 Ra-nyí lé, ngò gi, Mehetabela é yhang shu, Delai-a é yhang zo Shemai-a myhî lúng tô é, yhâng yhûm má ê jé é hkûn, yhang gi, ngo lé, “Noqkuq yhûm nghut é, Garai Gasâng é yhúmhkaû má huî lhum gòq; noqkuq yhûm hkum pé lé myhî pyám gòq. Haî mù gâ le, byu pé gi, nang lé sat râ matú lé lô kôrâ nghut lhê. Hkû-myîn yhang lháng, yhángmòq, nang lé lé sat kôrâ nghut lhê.” ga taî ri.
11 Nghut kôlhang, ngò gi, “Ngò sû é byù nhîng, ge hpang haq wún râ lhú? Ngò wá, yhûmsing é chyungxe lùt râ matú, noqkuq yhûm wang ê râ lhú? Ngò wang ê râ a nghut!” nghû tû taî bê nghut lhê. 12 Ngò gi, yhang lé, Garai Gasang èq nhang kat é a nghut é za, Tobi-a eq Sanbalat nhik èq ngùn byi luî, nghô yu to sû nghut é yánmai, yhang, ngo eq séng luî, myìqhtoi mhaû htoi byî é hkyô lé wó sê lhê. 13 Ngò gi, haú hkyô lé kut é dông, mara kut shut luî, hoq hpu mù, a ge é myìng wó sháng gàq ga, yhángnhik gi, ngo lé kyuq râ matú, Shemai-a lé nghô akô nghut ri.
14 Ngá é Garai Gasang ê, Tobi-a eq Sanbalat kut laî lo é hkyô lé le, ngo lé kyuq shi-kùt laî lo é myìqhtoi myhí Nodi-a eq gótû myìqhtoî pé lé le, xûm to byi laq.
Wàhkûm Ban Saî É Hkyô
15 Haû mù, buìnyì ngó xe í nyí myáng jáng, wàhkûm lé Elula lhôhkyapa í xe ngo nyí má ban saí bê nghut lhê. 16 Haú hkyô lé, ngá-mòq é gyè pé bànshoq bang wó gyo kôjáng, awui ayàm mâ é a-myû wuì bànshoq bang gi, gyùq byùq kômù, myòqnhô ngelang shum byùq bekô nghut ri. Hkâsu mù gâ le, múzó haú lé, ngá-mòq é Garai Gasang garúm luî, wó lhoqpân é hkyô lé sé kô é yánmai nghut ri.
17 Haú yòq haú bun má, Yudaq mau mâ é xânghpoq nge wó bang gi, Tobi-a chyáng laiká myo myo hun nyì kô é nghut mù, Tobi-a chyáng mai le, tû taî é laiká pé wó yu nyi bum akô nghut ri. 18 Hkâsu mù gâ le, yhang gi, Ara é yhang zo Shehkani-a é zo-moq hpó nghut é htoq agó, yhang zo yùqzo Yehohanan le, Berehki-a é yhang zo Meshulam é byìzo lé hâng yu é yánmai, Yudaq mau mâ é byù myo myo gi, yhángmòq danghtum htûm tô é èq tuî zing tô é bang nghut bum akô nghut ri. 19 Hau htoq agó, yhángmòq gi, Tobi-a kut é ge é hkyô, ngo lé taî kyo kômù, ngò haî taî é hkyô, yhang lé taî kyô akô. Tobi-a gi, ngo lé kyuq é dông, laiká pé hun kat ri.