Shiwa Byu Pé Mara Yín Yû Kô É Hkyô
10
Ezira gi, Garai Gasâng é yhûm hí má gòp byên to luî, ngaù uchyang kyûdung mù, dûng tôngbán nyi é hkûn, Isira-elaq byù myiwe, yùqgè, zoshâng wuì rajùm rayò mó gi, yhâng é lhînghkyùq má zîng to kômù, ngaùhkyûng ngaùyang mó dùt nyi akô nghut ri. 2 Haú hkûn, Elam é awùt ashín mâ é Yehi-ela é yhang zo Shehkani-a gi, Ezira lé, “Ngá-nhúng gi, ngá-nhûng é awui ayàm má nyi é gótû a-myû wui chyáng mai myiwe yù é dông, ngá-nhûng é Garai Gasang lé a jujúm kut pyám bê nghut ri; nghut kôlhang, Isira-elaq byu pê é matú gi, shí hkyô má myìt myòqbyù jang jòq ashî. 3 Haû mù, ngá é yhûmsîng nàng le, ngá-nhûng é Garai Gasâng é hkunmó pé lé châng é bang le, hpàqchyî byî é eq rajung za, myiwe haú bang eq yhángmòq é zodù wuì bànshoq lé nhang pyám râ matú, ahkuî, ngá-nhûng é Garai Gasâng é hí má dangshikaq to sháng. Haú lé târâ eq rajung za kut sháng. 4 Toq aq; shí hkyô gi, náng é lòq má ru nghut lhê; ngá-mòq nang lé htuqbáng râ nghut lhê; haû mù, myìt wum lhoqkíng luî, haú hkyô kut àq.” ga taî ri.5 Haû mù, Ezira gi, toq luî, hkyangjong ushuq pé, Lewiq byu pé eq Isira-elaq byu pé bànshoq bang lé, dang haú pé má cháng luî kut râ matú dakâm nhang é nghut mù, yhángmòq le dakâm bekô nghut ri. 6 Hau htâng, Ezira gi, Garai Gasâng é yhûm hí mai htoq mù, Eli-aship é yhang zo Yehohanan é wàp má wang e ri. Yhang gi, haú má nyi tô é u, zang a zo, wuì a shuq kut ri; haî mù gâ le, yhang gi, shúm zung é mai wó lùt lo é bang a jujúm kô é hkyô má iyon yôn nyi ashî nghut ri.
7 Haû mù, yhángmòq gi, shúm zung é mai wó lùt lo é bang bànshoq, Yerusalem wà mó má lé zùp zing râ matú, Yudaq mau eq Yerusalem wà mó jàm shoq dang pyo kat akô nghut ri. 8 Haû zaugun wuì eq sûwún wuî chôm myìt hpyit yû kô é eq rajung za, sum nyí gyoro má a jé lé sû ó yùq nghut kôle, yhang wó é lhúnglháng sûm byùq mù, yhang yhang le, shúm zung é mai wó lùt lo é bang zùp zîng é hpúng mai lhoqhtoq pyâm é hui zo râ nghut lhê.
9 Haû mù, Yudaq mau eq Ben-yamin mau mâ é yùqgè wuì bànshoq bang gi, sum nyí gyoro má Yerusalem wà mó má lé zùp zing bekô nghut ri. Lha-mó gau hkyap hkyap, í xê nyí má, zùp zîng tô é shiwa byù bànshoq bang gi, Garai Gasâng é yhûm hí mâ é lam é jowò má zung bùm mù, múzó hau é yánmai le, mau mó wo é yánmai le, gyùq nán bûm bekô nghut ri. 10 Haú hkûn, hkyangjong Ezira gi, toq yàp luî, yhángmòq lé, “Núngmòq gi, a jujúm kut bekô nghut ri; núngmòq gi, gótû a-myû myiwe yù mù, Isira-elaq chyáng mara lhoqjàt yù bekô nghut ri. 11 Ahkuî, núngmòq é îchyí îwâ pê é Garai Gasang, haû Yhûmsîng Garai lé mara tôngbán mù, Yhang ô nau é hkyô cháng keq. Núngmòq é awui ayàm mâ é byù myû wuì eq núngmòq é gótû a-myû myiwe wui chyáng mai gótû san kut nyì lo keq.” ga taî ri.
12 Haú hkûn, shiwa byù hpúng gón htê mó èq garû taî é gi, “Nàng taî é jô ri; nàng taî é eq rajung za kut râ nghut lhê. 13 Nghut kôlhang, byù gyai myô é htoq agó, mau wô nám le nghut é yánmai, ngá-nhúng shinggan má a yàp to lo sháng. Múzó shî lé gi, ra-nyí í nyí má za ge lhoqpân é jung a nghut; haî mù gâ le, ngá-mòq gi, shí hkyô má mara gyai yhang kut shut to bê nghut ri. 14 Haû mù, shiwa byù hpúng gón é matú, ngá-nhûng é zaugun wuì wò yù byi mù, ngá-nhûng é wà pé mâ é rayùq yùq, gótû a-myû myiwe yu tô é nghut jáng, masàt tô é ahkyíng má, yhâng é wà mâ é sûwún wuî eq târâ agyi pé eq rahá lé nhâng luî, haú hkyô má ngá-nhûng é Garai Gasang nhikmó-yô é hkyô, ngá-nhûng chyáng mai lhing ló byùq é hkûn jé shoq, múzó haú lé hpyit byi kó sháng gàq.” gâ ri. 15 Asahela é yhang zo Yonahtan eq Tikwa é yhang zo Yahezi-a nhik za, haú hkyô lé a gyo kut kôluî, Meshulam eq Lewiq byù Shabehtai gi, yhángnhik lé myìt bo huî akô nghut ri.
16 Haû mù, shúm zung é mai wó lùt lo é bang gi, haû su taî é lé hàp yù bekô nghut luî, hkyangjong Ezira gi, yhángmòq é yhûmhtu pé má cháng mù, ushuq pé hkyin htoq yû luî, haú bâng é myìng lé kâ xûm to mù, wò byî to bê nghut ri. Yhángmòq gi, lha-mó raxê hkyap hkyap lhôxân nyí má, múzó haú pé lé gôn wú râ matú zùng bekô nghut ri. 17 Haû mù, yhángmòq gi, gótû a-myû myiwe yu é bànshoq lé, htang zàn lha-mó sânghî hkyap lhôxân nyí má mú haú pé ban hpyit byi bekô nghut ri.
Gótû A-myû Myiwe Yu É Bang
18 Hkyangjông pê é awùt ashín pé mâ é gótû a-myû mâ é myiwe yu é bang gi, Yozadak é yhang zo Yeshu-a é awùt ashín pé eq yhang gu yhang mâng pé mai, Mase-a, Eli-ezera, Yarip eq Gedali-a pé nghut akô; 19 Yhángmòq bànshoq bang gi, yhángmòq é yhûmsîng myhî pé lé kâng pyám râ ga dakâm kômù, yhángmòq é marâ é matú, mara hpyî hkungga dông sau hpúng mai saulo radu du tsing nhông byî akô nghut ri.
20 Imera é awùt ashín pé mai, Hanani eq Zebadi-a nhik;
21 Harim é awùt ashín pé mai, Mase-a, Eliya, Shemai-a, Yehi-ela eq Uzi-a pé;
22 Pashura é awùt ashín pé mai, Eli-onai, Mase-a, Ishima-elaq, Nehtanela, Yozabat eq Elasa pé nghut akô.
23 Lewiq byu pé mâ é gi, Yozabat, Shimi, Kelai-a gâ é Kelita, Pehtahi-a, Yudaq eq Eli-ezera pé nghut akô.
24 Mahkôn hkôn bang mâ é gi, Eli-aship nghut ri.
Hkum zúng bang mâ é gi, Shalum, Telem eq Uri pé nghut akô.
25 Gótû Isira-elaq byu pé mâ é gi, Parosha é awùt ashín pé mai, Rami-a, Izi-a, Malikiya, Miyamin, Ele-aza, Malikiya eq Benai-a pé;
26 Elam é awùt ashín pé mai, Matani-a, Zehkariq, Yehi-ela, Apdi, Yeremot eq Eliya pé;
27 Zatu é awùt ashín pé mai, Eli-onai, Eli-aship, Matani-a, Yeremot, Zabat eq Aziza pé;
28 Bebai é awùt ashín pé mai, Yehohanan, Hanani-a, Zabai eq Ahtilai pé;
29 Bani é awùt ashín pé mai, Meshulam, Maluk, Adai-a, Yashup, She-ala eq Yeremot pé;
30 Pahat-Moba é awùt ashín pé mai, Atna, Hkelali, Benai-a, Mase-a, Matani-a, Bezalela, Binui eq Manase pé;
31 Harim é awùt ashín pé mai, Eli-ezera, Ishi-a, Malikiya, Shemai-a, Shime-on, 32 Ben-yamin, Maluk eq Shemari-a pé;
33 Hashum é awùt ashín pé mai, Matenai, Matata, Zabat, Elihpelet, Yeremai, Manase eq Shimi pé;
34 Bani é awùt ashín pé mai, Madai, Amram, U-ela, 35 Benai-a, Bedi-a, Hkeluhi, 36 Wani-a, Meremot eq Eli-aship, 37 Matani-a, Matenai eq Yasu pé;
38 Binui é awùt ashín pé mai, Shimi, 39 Shelemi-a, Nahtan, Adai-a, 40 Maknadebai, Shashai, Sharai, 41 Azarela, Shelemi-a, Shemari-a, 42 Shalum, Amari-a eq Yosep pé;
43 Nebo é awùt ashín pé mai, Yi-ela, Matahti‑aq, Zabat, Zebina, Yadai, Yo-ela eq Benai-a pé nghut akô.
44 Shí bang bànshoq gi, gótû a-myû myiwe yu é bang chyat nghut akô; yhángmòq mâ é ra-am gi, myiwe haú bang mai zodù wó bum akô nghut ri.