Gótû A-myû Myiwe Yù Bâng É Matú Ezira Kyûdung Byî É Dang
9
Múzó haú pé ban kut é htâng má, haû ushuq pé gi, ngá chyáng lé kômù, “Isira-elaq byu pé, hkyangjông pé eq Lewiq byu pé gi, shí mau má nyi é gótû a-myû nghut é, Hkanan byù, Hiti byù, Perizi byù, Yebusi byù, Ammon byù, Moba byù, Egutuq byù, Amori byu pé eq gótû san kut a nyì kô é za, haú bâng é achaq achyut hkyô hkangmó lé bo châng kut nyi bum akô nghut ri. 2 Yhángmòq gi, haú bâng é byìzô pé lé, yhûmsing é matú le, yhángmòq é yùqzô pê é matú le yù kô é nghut mù, chyoiyúng é a-myû gi, yhángmòq é lhînghkyùq mâ é byu pé eq nyó nyi bùm bekô nghut ri. Haû htoq agó, ushuq pé eq zaugun wuì gi, a jujúm é hkyô haú má shuî sô nghoq wang nyì bekô nghut ri.” ga taî akô nghut ri.3 Ngò gi, haú hkyô lé wó gyo jáng, ngá é bu eq buhîng lé lâng cheq pyám mù, uxâm eq nhutmui lé kyaq nut htoq pyám luî, yón ngha zung byùq é nghut lhê. 4 Haú hkûn, Isira-elaq é Garai Gasâng é dang lé gyùq kyum é yùq hkangmó gi, shúm zûng huî é mai taû lo é bang a jujúm kô é yánmai, ngá é lhînghkyùq má lé zîng bum akô. Ngò gi, myínhtang lhê é hkungga nhong é ahkyíng jé shoq, haú má yón ngha zung tô é nghut lhê.
5 Myínhtang lhê é hkungga nhong é ahkyíng jé jáng, ngò gi, myìt yón nyi é mai toq luî, bu eq buhîng jèq to gù hkyîhput htuq mù, ngá é Garai Gasang nghut é, haû Yhûmsîng Garaî shut lòq lham luî,
6 “Ngá é Garai Gasang ê, ngá-mòq é yubàk gi, ulhum myùp shoq myo mù, ngá-mòq é mara gi, mauhkûng hkyâng bê nghut é yánmai, Náng chyáng ngá é myòqdong tu wú râ matú, ngò gyùq hoq hpu zô nyi ri. 7 Ngá-mòq é îchyí îwâ pê é pyàt mai ahkuî jé shoq, ngá-mòq é mara gi, kô dik nyi ri. Ngá-mòq é yubàk marâ é yánmai, hkû-nyí lhê su, ngá-mòq le, ngá-mòq é hkóhkam pé eq hkyangjông pé le, shâm lhâm hui zô é, shúm zung é, hpyoq zo hpyoq shuq é eq gùng-yui é hui zo râ matú, maigan hkóhkam pê é lòq má àp pyâm é hui bê nghut lhê.
8 Nghut kôlhang, ngá-mòq é Garai Gasang nghut é, haû Yhûmsîng Garai gi, shogyo nhikmyin myìt mai, ngá-mòq é matú, nyi myìt gyó to bang lé razùp zo nyhi to byi mù, Yhâng é chyoiyúng jowò má ngá-mòq lé gingtîng é jowò byi bê nghut luî, ngá-mòq é Garai Gasang gi, ngá-mòq é myòqjí lé maubó byi mù, jùn dut é mai razùp zo nô yù nhâng bê nghut ri. 9 Ngá-mòq gi, jùn pé nghut kôlhang, ngá-mòq é Garai Gasang gi, ngá-mòq lé jùn dut nyi é jang má a jâng tô pyâm to nghut ri. Yhang gi, ngá-mòq lé, Perisi hkóhkam pê é myòq hí má jeju byi luî, ngá-mòq é Garai Gasâng é yhûm lé saî saí râ matú, ngá-mòq lé chyungxe sik byi mù, haû htên gyòp tô é pé lé saî saí nhâng luî, Yudaq mau eq Yerusalem wà mó má wó mâgum yu é wàhkûm lé byi bê nghut ri.
10 Nghut kôlhang, ngá-mòq é Garai Gasang ê, ahkuî, ngá-mòq haî wó ge taí lo râ lhú? Hkâsu mù gâ le, ngá-mòq gi, Náng é hkunmó pé lé tô pyám bê nghut lhê; 11 Nàng gi, hkunmó haú pé lé, Náng é duìnhâng zoshâng myìqhtoî pé dông byî é nghut lhê. Nàng taî é gi, ‘Núngmòq ló wang sing yù râ maumyî lé gi, haú má nyi é byu pê é lhoqhten lhoqhpyoq hkyo èq agòt a-û dùt nhâng bê nghut ri. Yhángmòq gi, yhángmòq é achaq achyut hkyo é yánmai, maumyî haú lé rahtâng mai góhtâng jé shoq a sansêng é hkyo èq lhoqpyíng bekô nghut ri. 12 Haû mù, núngmòq é byìzô pé lé, yhángmòq é yhang zo yùqzô pé chyáng hkâbyi tso kó; yhángmòq é byìzô pé lé le, núngmòq é yhang zo yùqzô pé lé hkâyû byi kó. Núngmòq gi, wum-o bo lò mù, maumyî haû mâ é gè hkyô lé myàng zo luî, haú lé, núngmòq é zodù wui matú ahtum abyùq wó tô to byi kó sháng gàq, hkâ-nhám le, yhángmòq eq nguì ngón hkyô yù râ matú hkâhô kó.’ ga taî ri.
13 Ngá-mòq hui zô nyi é gi, ngá-mòq é agè ashop é nyì yàp hkyô pé eq ngá-mòq é mara mó é yánmai nghut kôlhang, ngá-mòq é Garai Gasang ê, Nàng, ngá-mòq lé dam byî é gi, ngá-mòq é mara mai hpu zo gíng é myhó a jé nghut é htoq agó, ahkui lhê su, ngá-mòq lé nyi myìt gyó nhang to bê nghut ri. 14 Náng é hkunmó pé lé ngá-mòq dum lu lai mù, achaq achyut hkyô kut é byù shi bang eq myi byi myi yû kut é nghut jáng, rayùq lháng a lùt a myìt to loshoq, ngá-mòq lé dam byi râ a nghut lhí? 15 Isira-elaq byu pê é Garai Gasang, haû Yhûmsîng Garai ê, Nàng gi, díngmán sû nghut ri! Ngá-mòq gi, hkû-nyí myang é eq rajung za, nyi myìt gyó tô é bang nghut lhê. Ngá-mòq é marâ é yánmai, Náng é hí má rayùq lháng a wó yàp é nghut kôlhang, ngá-mòq gi, mara bò gù Náng é hí má nyi tô bum lhê.” nghû kyûdûng é nghut lhê.