Ezira Eq Rahá Taû Lo É Yhûmhtu Ushuq Pê É Jihpán
8
A-ô mâ é gi, Hkóhkâm Aritasase ùp é u má, ngò eq rahá Babelon mau mai htoq lo é yhûmhtu ushuq pé eq yhángmòq é byùxik labaû pê é jihpán nghut lhê.2 Hpinehasa é awùt ashín mâ é gi, Gerishom;
Ihtama é awùt ashín mâ é gi, Dani-elaq;
Parosha é awùt ashín mâ é gi, Zehkariq nghut mù, yhang eq rahá jihpán gùq tô é yùqgè 150 yùq;
4 Pahat-Moba é awùt ashín mâ é gi, Zerahi-a é yhang zo Elihonai nghut mù, yhang eq rahá nghut é yùqgè wuì 200 yùq;
5 Zatu é awùt ashín mâ é gi, Yahazi-ela é yhang zo Shehkani-a nghut mù, yhang eq rahá nghut é yùqgè wuì 300 yùq;
6 Adin é awùt ashín mâ é gi, Yonahtan é yhang zo Ebet nghut mù, yhang eq rahá nghut é yùqgè wuì 50 yùq;
7 Elam é awùt ashín mâ é gi, Ahtali-a é yhang zo Yeshai-a nghut mù, yhang eq rahá nghut é yùqgè wuì 70 yùq;
8 Shehpati-a é awùt ashín mâ é gi, Mihka-elaq é yhang zo Zebadi-a nghut mù, yhang eq rahá nghut é yùqgè wuì 80 yùq;
9 Yo-ap é awùt ashín mâ é gi, Yehi-ela é yhang zo Obadi-a nghut mù, yhang eq rahá nghut é yùqgè wuì 218 yùq;
10 Bani é awùt ashín mâ é gi, Yosihpi-a é yhang zo Shelomit nghut mù, yhang eq rahá nghut é yùqgè wuì 160 yùq;
11 Bebai é awùt ashín mâ é gi, Bebai é yhang zo Zehkariq nghut mù, yhang eq rahá nghut é yùqgè wuì 28 yùq;
12 Azigat é awùt ashín mâ é gi, Hakatan é yhang zo Yohanan nghut mù, yhang eq rahá nghut é yùqgè wuì 110 yùq;
13 Adonikam é awùt ashín mâ é gi, ló htâng é bang nghut luî, yhángmòq é myìng gi, Elihpelet, Ye-u-ela eq Shemai-a nghut mù, yhángmòq eq rahá nghut é yùqgè wuì 60 yùq;
14 Bigiwai é awùt ashín mâ é gi, Uhtai eq Zahkura nhik nghut mù, yhángnhik eq rahá nghut é yùqgè wuì 70 yùq nghut ri.
Yerusalem Wà Mó Má Taû Lo É Bang
15 Ngò Ezira gi, Ahawa jowò shut yui ló é wuìlàng yàm má yhángmòq lé shuî zùp zing mù, haú má sum nyí byam nyi yu é nghut lhê. Ngò gi, shiwa byu pé eq hkyangjông pé lé jep wú é hkûn, Lewiq byu pé lé a myàng nghut ri. 16 Haû mù, ngò gi, ushuq pé nghut é, Eli-ezera, Ari-ela, Shemai-a, Elinahtan, Yarip, Elinahtan, Nahtan, Zehkariq eq Meshulam lé le, hpàqchyî bo é Yoi-arip eq Elinahtan nhik lé le ji yù luî, 17 Hkasihpi-a wà ushuq Ido chyáng nhang kat é nghut lhê. Ngò gi, Ido eq Hkasihpi-a wà mâ é noqkuq yhûm duìnhâng zoshâng wuì nghut é yhâng é gu-mang Lewiq byu pé mai, ngá-mòq é Garai Gasâng é yhum é matú, byù nhang kat byi kó sháng gàq nghû, yhángmòq lé hkâsu nghû ê taí râ dang taî kyô kat é nghut lhê. 18 Ngá-mòq é Garai Gasâng é jeju lòq gi, ngá-mòq eq rahá nghut nyi é yánmai, yhángmòq gi, ngá-mòq chyáng, Isira-elaq é yhang zo Lewiq up mâ é Mali é awùt ashín pé mâ é, wum-o a-tsam bò sû Sherebi-a, yhang zo yùqzô pé eq gu-mang wuì, bànshoq raxe shit yùq lé shuî lé lo akô; 19 Hashabi-a eq rahá, Merari é awùt ashín mâ é Yeshai-a, yhâng é gu-mang wuì eq yhángmòq é yhang zo yùqzô pé, bànshoq í xê yùq le bo akô nghut ri. 20 Yhángmòq gi, Lewiq byu pé lé htuqbáng byi râ matú, Dawiq eq yhâng é zaugun wuì hkyin nyhi tô é bang nghut é, noqkuq yhûm duìnhâng zoshâng wuì í sho í xê yùq lé le shuî lé akô. Yhángmòq bànshoq bang gi, jihpán má myìng bo é bang chyat nghut akô nghut ri.
21 Haú hkûn, ngò gi, ngá-mòq é Garai Gasâng é hí má ngá-mòq i-myìt wó lhoqnyhûm luî, ngá-mòq eq ngá-mòq é zodù wuì, ngá-mòq é sùtzè pé lé yùqyo é hkyôwuì byi râ matú, Yhang lé kyû wó chôm dung sháng gàq nghû, Ahawa Wuìlàng yàm má, zoshuq túm râ matú tsing taî é nghut lhê. 22 Hkâsu mù gâ le, ngá-mòq gi, hkóhkâm lé, “Ngá-mòq é Garai Gasâng é jeju lòq gi, Yhang lé hô bang eq rahá nghut nyi lhê; Yhang lé tô pyám bang lé kúm gi, Yhang nhikmó-yô lhê.” nghû taí bê nghut é yánmai, ngò gi, hkyôwuì má gyè pê chyáng mai ngá-mòq lé mâgum yù râ matú, hkóhkam chyáng mai gyèzô pé eq myangji ji bang lé dûng yù râ matú hoq ri. 23 Haû mù, ngá-mòq gi, zoshuq túm luî, ngá-mòq é Garai Gasang lé shí hkyô eq séng mù dûng tôngbán jáng, Yhang gi, ngá-mòq é kyûdung dang lé gyo byi bê nghut ri.
24 Haú hkûn, ngò gi, hkyangjong ushuq pé nghut é, Sherebi-a eq Hashabi-a nhik le mù, yhángnhik é gu-mang wuì raxê yùq lé hkyin htoq to luî, 25 hkóhkâm hpó, yhâng é hpàqchyî byi bang, yhâng é zaugun wuì eq haú má jé nyi tô é Isira-elaq byù bànshoq bang mai, ngá-mòq é Garai Gasâng é yhum é matú àp nhông byî é, ngùnhtung, hîng eq zèhkoq pé lé chín luî, yhángmòq é lòq má àp byi bê nghut lhê. 26 Yhángmòq lé ngò chîn àp byî é gi, ngùnhtung 7150 joí, ngùn zèhkoq 1100 joí, hîng 1100 joí, 27 sum joí laî é hîng hkoq í xê hkyap, hîng gù eq rajung za nghut é wìk wìk dùt é gyi gòmhtung í hkyap nghut lhê.
28 Ngò gi, yhángmòq lé, “Núngmòq le, zèhkoq shí pé le, haû Yhûmsîng Garaî é hí má chyoiyúng nyi lhê; ngùnhtung eq hîng shî gi, núngmòq é îchyí îwâ pê é Garai Gasang, haû Yhûmsîng Garai lé àp nhong é, byi naû hkungga dùt ra râ nghut lhê. 29 Yerusalem wà mó mâ é Yhûmsîng Garaî é yhûm ahkaû wàp má, hkyangjong ushuq pé, Lewiq byu pé eq Isira-elaq byu pê é yhûmhtu ushuq pê é hí má haú pé lé chîn shit é hkûn jé shoq, rago wú zúng to keq.” nghû taî é nghut lhê. 30 Haû mù, hkyangjông pé eq Lewiq byu pé gi, chîn to bê é ngùnhtung, hîng eq chyoiyúng zèhkoq pé lé, Yerusalem wà mó má jòq é ngá-mòq é Garai Gasâng é yhûm má yu ló râ matú hàp yù bekô nghut ri.
31 Hau htâng, ngá-mòq gi, Yerusalem wà mó má ló râ matú, sânghî lhôhkyap í xê nyí nyí má, Ahawa Wuìlàng mai hkyô htoq lô bê nghut lhê. Ngá-mòq é Garai Gasâng é lòq gi, ngá-mòq eq rahá nghut nyî mù, hkyô mâ é gyè pé eq lú zo lú shuq bâng chyáng mai ngá-mòq lé mâgum yu ri. 32 Haû mù, ngá-mòq gi, Yerusalem wà mó má wó jé ló luî, haú má sum nyí nô yu é nghut lhê.
33 Myi nyí nyí nghû râ má, ngá-mòq gi, ngá-mòq é Garai Gasâng é yhúmhkaû má, hkyangjong Uri-a é yhang zo Meremot é lòq má àp tô é ngùnhtung, hîng eq chyoiyúng zèhkoq pé lé chín bê nghut lhê. Hpinehasa é yhang zo Ele-aza, Lewiq byù nghut é, Yeshu-a é yhang zo Yozabat eq Binui é yhang zo Nodi-a pé le, yhang eq rahá nghut ri. 34 Jung hkangmó lé nghap yû chîn yù mù, bànshoq lé jihpán laiká bùk má kâ xûm to bê nghut lhê.
35 Shúm zung é mai wó lùt lo é bang gi, Isira-elaq byù bànshoq bâng é matú, nohtó raxe í du, saulo gaú xe hkyuq du, saulo zo nyhit xe nyhit du, mara hkyut hkunggâ é matú bainám lo raxe í du lé, Isira-elaq byu pê é Garai Gasang lé myi nyhé hkungga pé dông nhông byî akô; haú pé bànshoq gi, haû Yhûmsîng Garaî é matú myi nyhé hkungga chyat nghut ri. 36 Hau htoq agó, yhángmòq gi, hkóhkam é byù mó pé eq Uhprat Wuìlàng buìwàng hkyam mâ é ming zau wuì lé, hkóhkâm hpó hkyô kat é hkunmó pé àp byi kô é nghut mù, haú bang gi, shiwa byu pé lé le, Garai Gasâng é yhûm lé le, htuqbáng byi bekô nghut ri.