Ezira Yerusalem Wà Mó Má Lé Jé É Hkyô
7
Múzó haú pé ban é htâng má, Perisi hkóhkâm Aritasase ùp é u má, Ezira ga sû rayùq nyi ri; yhang gi, Serai-a é yhang zo; Serai-a gi, Azari-a é yhang zo; Azari-a gi, Hiliki-a é yhang zo; 2 Hiliki-a gi, Shalum é yhang zo; Shalum gi, Zadok é yhang zo; Zadok gi, Ahitup é yhang zo; 3 Ahitup gi, Amari-a é yhang zo; Amari-a gi, Azari-a é yhang zo; Azari-a gi, Merai-ot é yhang zo; 4 Merai-ot gi, Zerahi-a é yhang zo; Zerahi-a gi, Uzi é yhang zo; Uzi gi, Buki é yhang zo; 5 Buki gi, Abishu-a é yhang zo; Abishu-a gi, Hpinehasa é yhang zo; Hpinehasa gi, Ele-aza é yhang zo; Ele-aza gi, hkyangjong agyì Arun é yhang zo nghut ri. 6 Ezira shí yùq gi, Babelon mau mai jé lé é sû nghut ri. Yhang gi, Isira-elaq é Garai Gasang, haû Yhûmsîng Garai byî é Mosheq é târâ laiká lé rago wó mhoq byî é sû nghut ri. Yhâng é Garai Gasang nghut é, haû Yhûmsîng Garaî é lòq gi, yhang lé garúm byî nyi é yánmai, haû hkóhkâm hpó gi, yhang dûng é jung hkangmó lé gyo byî ri. 7 Isira-elaq byu pé ra-am nghut é, hkyangjông pé, Lewiq byu pé, mahkôn hkôn bang, hkum zúng bang eq noqkuq yhûm mâ é duìnhâng zoshâng wuì le, hkóhkâm Aritasase ùp é nyhit zan zàn má, Yerusalem wà mó má lé jé akô nghut ri.8 Ezira gi, hkóhkâm hpó ùp é nyhit zan zàn, lha-mó ngo hkyap hkyap má, Yerusalem wà mó má jé ri. 9 Yhang gi, sânghî lhôhkyap, lhôxân nyí má Babelon mai byìn toq mù, yhâng é Garai Gasâng é jeju, yhang eq rahá nghut nyi é yánmai, lha-mó ngo hkyap hkyap, lhôxân nyí Yerusalem wà mó má jé bê nghut ri. 10 Ezira kúm gi, haû Yhûmsîng Garaî é târâ lé mhoq yû mù, châng nyì râ matú le, Isira-elaq byu pé lé târâ wàng hkunmó pé eq târâ pé mhoq byi râ matú le, yhânggùng yhang àp nhong to sû nghut ri.
Ezira Chyáng Hkóhkâm Aritasase É Laiká Jé É Hkyô
11 Shî gi, Isira-elaq byu pê é matú, haû Yhûmsîng Garaî é târâ wàng hkunmó pé eq gótû hkunmó pé lé rago sé mù, târâ mhoq sará rayùq nghut é, hkyangjong Ezira chyáng Hkóhkâm Aritasase mai hun kat é laiká nghut ri; laiká haú má kâ tô é gi,
12 “Hkóhkam pê é hkóhkâm Aritasase mai,
mauhkûng mâ é Garai Gasâng é târâ sará nghut sû, hkyangjong Ezira chyáng laiká hun kat lhê.
Nguì ngón wángzán nyì sháng gàq.
13 Ahkuî, ngò hkunmó hkyô lhê; ngá é mîngdán má nyi é Isira-elaq byù ó yùq nghut nghut, hkyangjông pé eq Lewiq byu pé mâ é ó yùq nghut nghut, nàng eq rahá Yerusalem wà mó shut yhûmsing myìt mai bo châng ló nau é sû gi, ge bo ló lhê. 14 Hkâsu mù gâ le, náng lòq má àp tô é, náng é Garai Gasâng é târâ eq rajung za, Yudaq mau eq Yerusalem wà mó lé ló myî gôn wú râ matú, hkóhkâm hpó eq yhâng é hpàqchyî byi bang nyhit yùq gi, nang lé nhang kat lhê. 15 Hau htoq agó, nàng gi, Yerusalem wà mó má nyi é Isira-elaq é Garai Gasâng é matú, hkóhkâm hpó eq yhâng é hpàqchyî byi bang mai byí nau é myìt mai byî é ngùn eq hîng lé le, 16 Babelon mau má nàng wó yu é ngùnhtung eq hîng bànshoq lé le, Yerusalem wà mó mâ é, yhángmòq é Garai Gasâng é noqkuq yhum é matú, shiwa byu pé eq hkyangjông pé mai àp nhong é byi naû hkungga pé lé le, nàng yu chûng ra râ nghut lhê. 17 Ngùn haú pê èq, nohtó pé, saulo pé eq saulo zo pé le, haú pé má bo kat lhôm é gùqzò hkungga pé eq shuq jung hkungga pé le wui yù mù, Yerusalem wà mó mâ é núngmòq é Garai Gasâng é noqkuq yhûm mâ é hkungga gyàp má nhông byi râ dùt lhê.
18 Hau htâng, nàng eq náng é gu-mang Isira-elaq byu pé gi, myìt gyó tô é ngùnhtung eq hîng lé, núngmòq é Garai Gasang ô nau é má cháng luî chûng keq. 19 Náng é Garai Gasâng é noqkuq yhûm má dójaú râ matú, nang lé àp tô é zèhkoq bànshoq lé, Yerusalem wà mó mâ é Garai Gasâng é hí má àp byi keq. 20 Náng é Garai Gasâng é noqkuq yhûm má chûng râ dùt ashî nghut é zèhkoq pé lé gi, hkóhkam é sùtdò mai ge yu htoq byi ra râ nghut lhê.
21 Ngò Hkóhkâm Aritasase gi, Uhprat Wuìlàng buìwàng hkyam mâ é sùtdò zúng bang lé, mauhkûng mâ é Garai Gasâng é târâ sará nghut sû, hkyangjong Ezira mai núngmòq lé dûng é haî nghut kôle, hân lajang byi râ matú hkunmó hkyô lhê. 22 Ngùnhtung 1100 joí, súngsô mún 5333 joí, tsibyiq wing 660 chyóng, tsanlun xû 660 chyóng, xo râ é myhó bànshoq bò shoq nghut kôle, hân lajang byi keq. 23 Mauhkûng mâ é Garai Gasang sang tô é eq rajung za, haû mauhkûng mâ é Garai Gasâng é noqkuq yhum é matú hân lajang byi keq. Hkóhkâm hpó eq yhang zô pê é mîngdán htoq má, haî mù Yhâng é nhikmó-yo hkyô jé râ lhú? 24 Hau htoq agó, hkyangjông pé, Lewiq byu pé, mahkôn hkôn bang, hkum zúng bang, noqkuq yhûm mâ é duìnhâng zoshâng wuì eq Garai Gasâng é yhûm má mú zuî é góbâng chyáng mai, núngmòq, hkán eq jahkôn gùq yù râ ahkáng wó é a nghut.
25 Nàng, Ezira gi, náng chyáng bo tô é náng é Garai Gasâng é hpàqchyî byéng-yá má cháng luî, náng é Garai Gasâng é târâ pé lé sê é, Uhprat Wuìlàng buìwàng hkyam má nyi é mingbyû wuì bànshoq bang lé târâ ràp-rá é dông hpyit byi râ matú, zau wuî eq târâ agyì pé hkyin to râ dùt lhê. Nàng gi, târâ haû a sê é bang lé le mhoq byi râ dùt lhê. 26 Hau htoq agó, náng é Garai Gasâng é târâ pé eq hkóhkam é târâ lé a châng é sû ó yùq le, sat pyâm é, mîngdán mai hkat htoq pyâm é, sùtzè pé yu pyám byî é eq htóng lúng é rajung jung hui ra râ nghut lhê.” gâ ri.
27 Ezira taî é gi, “Ngá-mòq é îchyí îwâ pê é Garai Gasang, haû Yhûmsîng Garai gi, hkungsô wó nyi ri; hkâsu mù gâ le, Yhang gi, Yerusalem wà mó má jòq é Yhûmsîng Garaî é yhûm lé shí dông xânghpoq nge wó nhâng râ matú, hkóhkam é i-myìt má kat byi bê nghut ri. 28 Hau htoq agó, Yhang gi, hkóhkâm eq yhâng é hpàqchyî byi bang, hkóhkam é a-tsam mó bo é zaugun wuì bànshoq é hí má, ngo lé Yhâng é jeju shit byî ri. Haî mù gâ le, ngá é Garai Gasang nghut é, haû Yhûmsîng Garaî é lòq gi, ngò eq rahá nghut nyî mù, ngò gi, myìt wum lhoqkîng yù luî, ngò eq rahá bo taû lò râ matú, Isira-elaq byu pê chyáng mai ushuq pé lé shuî tsîng yu é nghut lhê.” gâ ri.