Hkóhkâm Dari Hkyô É Hkunmó
6
Haû mù, Hkóhkâm Dari gi, hkunmó hkyô é nghut luî, yhángmòq gi, Babelon mâ é ze hkông wàp má kat tô é jihpán laiká pé lé ho gôn wú kô é hkûn, 2 Medi mau mâ é Ekbatana gingtíng jowò má laiká ding ralhum myang ho akô nghut ri. Laiká ding haú má kâ tô é gi,“Xûm tô é hkyô pé a-ô mâ é eq rajung za nghut lhê.
3 Hkóhkâm Kuru ùp é sânghî zàn má, Yerusalem wà mó mâ é Garai Gasâng é noqkuq yhûm eq séng luî, hkóhkâm hkunmó hkyô é gi,
‘Shigu hkungga pé nhông byi râ jowò dông noqkuq yhûm haú lé saî saí kó sháng gàq; hau é a-pûn awang lé hkyó kó sháng gàq. Hau é myhâng hpyang gi, hkyuq xê dúng bò mù, làm hpyang le hkyuq xê dúng bò luî, 4 lùqgòk mó sum pyâm má sik ra-pyâm pyâm kat mù, a-pyâm pyâm kut saí kó sháng gàq. Haú má gyó âng é pé lé gi, hkóhkâm sùtdò mai htoq byi sháng gàq. 5 Hau htoq agó, Nebuhkatneza èq Yerusalem wà mó mâ é noqkuq yhûm mai yu htoq luî, Babelon mau má yu jé ló é Garai Gasâng é yhûm mâ é ngùn hîng zèhkoq pé lé gi, Yerusalem wà mó mâ é noqkuq yhûm mâ é yhâng é jowò pé má taû dé to ra râ nghut lhê; haú pé lé gi, Garai Gasâng é noqkuq yhûm má kat to ra râ nghut lhê.
6 Haû mù, ahkuî, Uhprat Wuìlàng buìwàng hkyam mâ é ming zau Tatenai, Shehta Bozenai eq haú mau mâ é zaugun wuì núngmòq gi, haú jowò mai we we nyì keq. 7 Garai Gasâng é noqkuq yhûm haû saî é múzó lé hkâhkúm kó; Yudaq byu pê é zaugun wuì eq Yudaq sûwún wuî gi, Garai Gasâng é noqkuq yhûm lé yhâng é jowò má yhang saî saí kó sháng gàq.
8 Hau htoq agó, Garai Gasâng é noqkuq yhûm saî é Yudaq sûwún wuî lé núngmòq hká dông garúm yû râ hkyô, ngò hkunmó hkyó kôle;
múzó haû a nô byùq râ matú, yhángmòq gyó âng é bànshoq lé gi, Uhprat Wuìlàng buìwàng hkyam má hkán hkyui tsîng tô é hkóhkam sùtdò mai râ é gû yu htoq byi ra kôrâ nghut lhê. 9-10 Yhángmòq gi, mauhkûng mâ é Garai Gasang myìt nguì ô nau é hkungga pé wó nhông byi mù, hkóhkâm eq yhang zô pê é matú kyû wó dung byi kó sháng gàq, mauhkûng mâ é Garai Gasang lé myi nyhé hkungga pé wó nhông byi râ matú, nohtó pé, saulo pé, saulo zô pé lé le, Yerusalem wà mó mâ é hkyangjông pé sang tô é eq rajung, súngsô mún, xo, tsibyiq wing eq tsanlun xû pé lé le, a htâng gyó loshoq, yhángmòq lé nyí wuî byi ra kôrâ nghut lhê.
11 Hau htoq agó, ngò hkunmó hkyó shi bá; rayùq yùq, mungdang shî lé htaî lhik pyâm é nghut jáng, yhâng é yhûm mâ é zìng lé nut htoq yû mù, haú má yhang lé tuî lhâng pyám ra râ nghut lhê; hau é yánmai, yhâng é yhûm gi, nohkyi bùm dùt byùq râ nghut lhê. 12 Haú jowò má Yhâng é myìng jòq nhang tô é Garai Gasang gi, Yerusalem wà mó mâ é noqkuq yhûm shî lé lhoqhtên pyám râ eq hkunmó shî lé htaî pyám râ matú lòq tu é, byù myû lé nghut nghut, hkóhkâm lé nghut nghut, lhoqhtên pyám sháng gàq.
Ngò Dari yhang, hkunmó haû lé hkyô lhê. Haú hkyô lé hân za kut kó sháng gàq.’ gâ ri.” gâ é nghut ri.
Noqkuq Yhûm Lé Saî Pân É Hkyô Eq Yhûmwàng Wang É Hkyô
13 Haú hkûn, Uhprat Wuìlàng buìwàng hkyam mâ é ming zau Tatenai, Shehta Bozenai eq yhángnhik é byìnzùm wuì gi, Hkóhkâm Dari hun kat é hkunmó eq rajung za, hân hân kut bekô nghut ri. 14 Haû mù, Yudaq sûwún wuî gi, myìqhtoi Hagai eq Ido é awùt ashín Zehkariq nhik hko taî é a-ô má yhûm hau lé xoq saí nyì kômù, lòqzó gyai so bê nghut ri. Haû mù, yhángmòq gi, Isira-elaq é Garai Gasâng é hkunmó eq rajung za le, Perisi hkóhkâm Kuru, Dari eq Aritasase pê é dangmó eq rajung za le, noqkuq yhûm haú lé saî pán bekô nghut ri. 15 Hkóhkâm Dari ùp é hkyuq zan zàn, Adara lhôhkyapa sum nyí nyí má noqkuq yhûm haú lé saî pán bekô nghut ri.
16 Haû mù, Isira-elaq byu pé nghut é, hkyangjông pé, Lewiq byu pé eq shúm zung é mai wó lùt lo é gótû byu pé gi, gabú myìt mai Garai Gasâng é yhûm lé, yhûmwàng wàng bekô nghut ri. 17 Yhángmòq gi, Garai Gasâng é yhûm lé yhûmwàng wàng kô é hkûn, nohtó rashô du, saulo í shô du, saulo zo myi shô du lé le, Isira-elaq byù bànshoq bâng é matú mara hkyut hkungga dông, Isira-elaq é a-myû up mâ é byù du má cháng luî, bainám lo raxe í du lé le, àp nhong akô nghut ri. 18 Hau htâng, yhángmòq gi, Mosheq é laiká bùk má kâ tô é eq rajung za, Yerusalem wà mó mâ é Garai Gasang lé dójaú râ matú, hkyangjông pé lé ahpúng hpúng kut nyhi to luî, Lewiq byu pé lé yhûmsing é hpúng má nyhi to bekô nghut ri.
Lhoqlhai Poî
19 Shúm zung é mai wó lùt lo é bang gi, sânghî lhôhkyap raxe myi nyí nyí má Lhoqlhai Poî kut akô nghut ri. 20 Hkyangjông pé eq Lewiq byu pé gi, yhûmsing gùng lhoq chyoiyúng yû bekô nghut mù, htûngli dông sanséng bekô nghut ri. Lewiq byu pé gi, shúm zung é mai wó lùt lo é bànshoq é matú le, yhángmòq é gu-mang hkyangjông pê é matú eq yhángmòq yhâng é matú le, Lhoqlhai Poî sau zo sat nhong akô nghut ri. 21 Haû mù, shúm zung é mai wó lùt lo é Isira-elaq byu pé eq, Isira-elaq é Garai Gasang, haû Yhûmsîng Garai lé hô râ matú, yhûmsing gùng lé haú mau mâ é gótû a-myû wui é achaq achyut hkyô mai koi pyâm é bànshoq bang gi, haú lé zo bekô nghut ri. 22 Yhángmòq gi, gabú myìt mai nyhit nyí yhang Múnchi a bo é Mùk Zo Poî kut akô; hkâsu mù gâ le, haû Yhûmsîng Garai gi, Isira-elaq é Garai Gasang nghut é, haû Garai Gasâng é yhûm lé wó saí shoq yhángmòq lé htuqbáng byi sháng gàq ga, Asuri hkóhkam é i-myìt lé yhángmòq shut lhing lò nhang é dông, yhángmòq lé gabú myìt ngón nhang é nghut ri.