Hkóhkâm Dari Lé Tatenai Laiká Kâ Hun É Hkyô
5
Haú hkûn, myìqhtoi Hagai eq Ido é awùt ashín myìqhtoi Zehkariq nhik gi, yhángnhik lé ùp zing tô é, Isira-elaq é Garai Gasâng é myìng mai, Yudaq mau eq Yerusalem wà mó má nyi é Yudaq byu pé lé myìqhtoi htoi byî akô nghut ri. 2 Haû mù, Shelatila é yhang zo Zerubabela eq Yozadak é yhang zo Yeshu-a nhik gi, Yerusalem wà mó mâ é Garai Gasâng é yhûm lé toq saî hî bekô nghut ri. Garai Gasâng é myìqhtoi haú nhik gi, yhángnhik eq rahá nghut mù, yhángnhik lé htuqlùq htuqbáng byî akô nghut ri.3 Haú hkûn, Uhprat Wuìlàng buìwàng hkyam mâ é ming zau Tatenai, Shehta Bozenai eq yhángnhik é byìnzùm wuì gi, yhángmòq chyáng ê jé kômù, “Noqkuq yhûm shî lé dum saî saî pán râ matú, núngmòq lé ahkáng ó yùq byi kô é lhú?” ga myî akô nghut ri. 4 Hau htoq agó, yhángmòq gi, “Yhûm shî saî nyì bâng é myìng pé taî kyo keq.” ga xoq taî akô nghut ri. 5 Nghut kôlhang, yhángmòq é Garai Gasang gi, Yudaq sûwún lé wú mâgum nyi é nghut mù, yhángmòq gi, Dari chyáng laiká kâ hûn mù, yhâng chyáng mai taû kat é laiká a myang yù yù, múzó haú lé a no nhâng kó nghut ri.
6 Uhprat Wuìlàng buìwàng hkyam mâ é ming zau Tatenai, Shehta Bozenai eq yhángnhik é byìnzùm wuì, Uhprat Wuìlàng buìwàng hkyam mâ é zaugun wuì gi, Hkóhkâm Dari chyáng laiká kâ hun kat akô nghut ri. 7 Yhángmòq, yhâng chyáng kâ hun kat kô é gi,
“Hkóhkâm Dari nguì ngón yùqyo nyì sháng gàq.
8 Hkóhkâm nang lé, ngá-mòq mai Yudaq mau má ê jé mù, hpung bo é Garai Gasâng é noqkuq yhûm má ê jé é hkyô sé nhâng nau ri. Yhûm haú lé lùqgòk mó èq saí kômù, wàhkûm pé má le sik pé tsing kê to bekô. Múzó haú lé gyai yhang shi-kùt nyi akô nghut mù, yhángmòq é lòqzó gyai sô ló bê nghut ri.
9 Ngá-mòq gi, sûwún wuî haú bang lé, ‘Noqkuq yhûm shî eq wàhkûm lé dum saî saî pán râ matú, núngmòq lé ahkáng ó yùq byi kô é lhú?’ nghû dangmyi myi bê nghut lhê. 10 Hau htoq agó, ngá-mòq gi, nang lé wó kyo râ matú yhángmòq é ushuq pê é myìng pé lé wó kâ to shoq nghû, yhángmòq é myìng pé lé le myî yù bê nghut lhê.
11 Ngá-mòq lé yhángmòq tû taí kô é gi,
‘Ngá-mòq gi, mauhkûng eq myigung é Garai Garaî é duìnhâng zoshâng wuì nghut lhê; góhkûn Isira-elaq hkóhkâm mó rayùq saî pân tô é noqkuq yhûm haû lé ngá-mòq dum saî saî é ru nghut lhê. 12 Ngá-mòq é îchyí îwâ pé shèq mauhkûng mâ é Garai Gasang lé nhikjum lhoqyo kômù, Yhang gi, yhángmòq lé, Hkalade ming mâ é Babelon hkóhkâm Nebuhkatneza é lòq má àp byî pyâm é nghut mù, hkóhkâm haû gi, noqkuq yhûm shî lé lhoqhtên pyâm é htoq agó, mingbyû wuì lé Babelon má chyup shuî ló byùq é ru nghut lhê.
13 Nghut kôle, Babelon hkóhkâm Kuru gi, yhang hkóhkâm kut é sânghî zàn má, Garai Gasâng é noqkuq yhûm shî dum saî saí râ matú hkunmó hkyô to bê nghut lhê. 14 Yhang gi, Nebuhkatneza èq Yerusalem wà mó mâ é noqkuq yhûm mâ é yu htoq mù, Babelon mâ é noqkuq yhûm má lo kat tô é Garai Gasâng é noqkuq yhûm eq sêng é ngùn hîng zèhkoq pé lé, Babelon mâ é noqkuq yhûm mai yu htoq mù, yhâng èq ming zau kut nhang tô é Sheshibaza gá su é lòq má àp byî ri. 15 Haû mù, yhang gi, Sheshibaza lé, “Zèhkoq shí pé lé yu ló mù, Yerusalem wà mó mâ é noqkuq yhûm má ló tô to luî, Garai Gasâng é yhûm lé, yhâng é jowò má yhang dum saî to keq.” gâ ri.
16 Haû mù, Sheshibaza shí yùq gi, lo jé mù, Yerusalem wà mó má Garai Gasâng é yhûm a-pûn awang lé hkyô to bê nghut ri. Haú nyí mai ahkuî jé shoq saî nyi bum kôlhang, a wó lhoqpán shi kó nghut ri.’ gâ ri.
17 Haû mù, hkóhkâm nàng gyô é nghut jáng, Yerusalem wà mó má Garai Gasâng é yhûm shî saí râ matú Hkóhkâm Kuru hkunmó hkyô tô lhê làq, Babelon mâ é hkóhkâm zè hkong é wàp má bo é jihpán laiká bùk má ho gôn wú mù, shí hkyô eq séng luî, hkóhkâm nàng myìt hpyit é eq rajung za ngá-mòq lé laiká hun kat àq.” gâ ri.