Múzó Má Gunjang Huî É Hkyô
4
Yudaq byu pé eq Ben-yamin byu pê é gye pé gi, Isira-elaq é Garai Gasang, haû Yhûmsîng Garaî é noqkuq yhûm lé, shúm zung é mai wó lùt lo é bang saî saî nyi é hkyô wó gyo kôjáng, 2 Zerubabela eq yhûmhtu ushuq pê chyáng lé kômù, “Núngmòq lé bo saî garúm râ ahkáng ngá-mòq lé byi keq; hkâsu mù gâ le, ngá-mòq le núngmòq eq rajung za, núngmòq é Garai Gasang lé châng ho é nghut mù, ngá-mòq lé shí jowò má shuî lé é Asuri hkóhkâm Esarahadon é i-pyàt mai, Garai Gasang haú lé hkungga nhông byî nyì bê nghut lhê.” ga taí akô nghut ri.3 Nghut kôlhang, Zerubabela, Yeshu-a eq Isira-elaq byu pê é gótû yhûmhtu ushuq pé gi, “Ngá-mòq é Garai Gasâng é matú ngá-mòq noqkuq yhûm saî é má núngmòq ge bo lòm râ a nghut. Ngá-mòq gi, Perisi hkóhkâm Kuru mai ngá-mòq lé hkunmó hkyô tô é eq rajung za, Isira-elaq byu pê é Garai Gasang, haû Yhûmsîng Garaî é matú, ngá-mòq baú yhûm haú lé saí râ nghut lhê.” ga tû taî akô nghut ri.
4 Haû mù, yhángmòq é awui ayàm mâ é byu pé gi, Yudaq byu pé lé myìt wum lhom lhoqhkyui byî shi-kùt mù, múzó má a wám ê lo râ dông lhom kut akô nghut ri. 5 Haú bang gi, Perisi hkóhkâm Kuru ùp é pyàt mai Perisi hkóhkâm Dari ùp é pyàt jé shoq, yhángmòq htung tô é múzó lé lhoqhtên pyám byi râ matú, zaugun wuì lé lòqhkaû lang zè byi mù lung yu akô nghut ri.
Ahasuru Eq Aritasase É A-ô Má Gunjang Huî É Hkyô
6 Hkóhkâm hkô má Ahasurua zung hi é hkûn, yhángmòq gi, Yudaq byu pé eq Yerusalem wà byu pé lé mara hûn laiká kâ hun kat akô nghut ri.
7 Perisi hkóhkâm Aritasase é pyàt má, Bishilam, Mihtiredat, Tabela eq yhâng é byìnzùm wuì góbang gi, Aritasase lé laiká kâ hun akô; laiká haú lé gi, Aramik laiká dông kâ to mù, dang hpuq to byî é nghut ri.b
8 Ming zau Rehum eq kâ xûm hpó Shimshai gi, Hkóhkâm Aritasase chyáng Yerusalem wà byu pé lé htuqhtîng é a-ô mâ é laiká kâ hun kat akô nghut ri.
9 Ming zau Rehum eq kâ xûm hpó Shimshai nhik eq rahá, yhángnhik é byìnzùm wuì nghut é, târâ agyi pé, Perisi, Uruk eq Babelon mâ é byu pé lé ùp é ming zaû pé eq zaugun wuì, Susa wà mâ é Elam byu pé, 10 byù mó eq hpautap gíng é Ashurabanipalac èq shuî htòt luî, Samariq wà eq Uhprat Wuìlàng buìwàng hkyam jowò hkangmó má nyì nhang tô é gótû byu pé gi, laiká kâ hun kat akô nghut ri.
11 Yhángmòq, Aritasase lé hun kat é laiká gi,
“Hkóhkâm Aritasase chyáng Uhprat Wuìlàng buìwàng hkyam má nyi é náng é duìnhâng zoshâng wuì laiká hun kat lhê.
12 Hkóhkâm gi, náng chyáng mai ngá-mòq chyáng jé lé lo é byu pé, Yerusalem wà mó má ê kôluî, haû gumlau toq é eq agè ashop é wà mó lé saî xuq nyî kô é hkyô sé gíng ri. Yhángmòq gi, wàhkûm pé lé saî saî nyì luî, a-pûn awang pé saî xuq nyi bum akô nghut ri.
13 Hau htoq agó, wà shî ban xuq luî, hau é wàhkûm ban saî tô é nghut jáng, hkán eq jahkôn le kat kôrâ a nghut, yhángmòq byi âng é pé le byi lo kôrâ a nghut; haú hkûn, hkóhkam pê é a-kyû le yom byùq berâ za nghut é hkyô lé, hkóhkâm hpó bûn sé aq. 14 Ahkuî, ngá-mòq gi, hkóhkâm wâng mâ é wò yu tô é bang nghut luî, hkóhkâm hpó hpau a dàp lo dùt ló é hkyô lé a wó wú to lo mù, laiká shi èq hkóhkâm hpó lé kyô kat lhê. 15 Laiká shi é yánmai, nàng gi, náng é îchyí îwâ pé kâ xûm tô é laiká bùk má ho nghap wú jáng, góhkûn mai, wà shî gi, gumlau toq é wà, hkóhkam pé eq mîngdán pé lé a-kyû lhoqhten byî é wà nghut é hkyô lé le, hau é yánmai, wà shî lhoqhtên pyâm é huî é hkyô lé le, wó sé râ nghut lhê. 16 Wà shî wó xuq mù, hau é wàhkûm wó saî pân é nghut jáng, hkóhkâm hpó nàng gi, Uhprat Wuìlàng buìwàng hkyam shut haî le wó lo râ a nghut nghû, ngá-mòq, nang lé kyô kat lhê.” gâ ri.
17 Haú hkûn, hkóhkâm hpó tû kâ hun kat é gi,
“Ming zau Rehum, kâ xûm hpó Shimshai, Samariq eq Uhprat Wuìlàng buìwàng hkyam jowò hkangmó má nyi é yhángmòq é byìnzùm wuì góbâng chyáng laiká hun kat lhê.
Nguì ngón wángzán nyî kó sháng gàq.
18 Núngmòq, ngá chyáng hun kat é laiká lé, ngá é hí má san za sê gyo shoq hpuq nghap kyo bekô nghut ri. 19 Ngò gi, kâ xûm tô é laiká bùk má ho nghap wú râ matú hkunmó hkyô é hkûn, wà shî gi, góhkûn mai hkóhkam pé lé gumlau toq é wà eq mau lé shuî byòk é jowò nghut é lé myang ho nghap htoq ri. 20 Yerusalem gi, hpungwup a-tsam bo é hkóhkam pé zùng mù, Uhprat Wuìlàng buìwàng hkyam bànshoq lé ùp zo luî, hkán hkyuî mù, jahkôn hkyui yù luî, byi âng é pé lé gùq yù mù, yhángmòq lé byî é wà nghut ri. 21 Haû mù, ngò hkunmó hkyô é hkûn jé shoq wà shî a wó dum xuq râ matú, byù shí bang lé múzó nô pyám râ hkunmó hkyó keq. 22 Shí hkyô lé a lhoqlhaî pyâm é za rago kut keq. Haî mù hkóhkam pé a-kyû sûm byùq râ lhú?” gâ ri.
23 Rehum, kâ xûm hpó Shimshai eq yhángnhik é byìnzùm wuì lé, Hkóhkâm Aritasase é laiká haû nghap kyo kôjáng, yhángmòq gi, Yerusalem wà mó mâ é Yudaq byu pê chyáng radá dâm ê kômù, yhángmòq é múzó nô pyám râ matú htân htân ê zìk pyâm akô nghut ri.
24 Haû mù, Yerusalem wà mó mâ é Garai Gasâng é yhûm saî é múzó gi, Perisi hkóhkâm Dari ùp é í zan zàn jé shoq a saî pán lô é za nô pyâm to bê nghut ri.