Hkungga Gyàp Dum Saî Saî É Hkyô
3
Lha-mó nyhit hkyap bò mù, Isira-elaq byu pé gi, ó le ô é wà pé má nyi nyì bekô; haú hkûn, yhángmòq gi, i-myìt rahkat zâ èq Yerusalem wà mó má lé zùp zîng akô nghut ri. 2 Haû mù, Yozadak é yhang zo Yeshu-a eq yhâng é gu-mang hkyangjông pé, Shelatila é yhang zo Zerubabela eq yhâng é byìnzùm wuì gi, chôm toq mù, Garai Gasâng é byù Mosheq é târâ má kâ tô é eq rajung za, myi nyhé hkungga pé nhông râ matú, Isira-elaq é Garai Gasâng é hkungga gyàp saî saí bekô nghut ri. 3 Yhángmòq gi, yhángmòq é awui ayàm mâ é gótû a-myû wuì lé gyùq kôle, hí lhê é jowò má yhang hkungga gyàp saí kômù, haû Yhûmsîng Garaî é matú myín nàp hau é ahtoq má myi nyhé hkungga pé nhông byî nyi akô nghut ri. 4 Yhángmòq gi, kâ tô é eq rajung za, Zúm Poî lé kut mù, nyí wuî nhông byi râ dùt é myi nyhé hkungga pé lé nhông byî akô nghut ri. 5 Hau htâng, yhángmòq gi, ayang lhê é myi nyhé hkungga pé, Lhôxan Lhôsik poî hkungga pé, masàt tô é haû Yhûmsîng Garaî é chyoiyúng poî pê é matú nghut é hkungga pé eq haû Yhûmsîng Garai lé nhong é byi naû hkungga pé lé, àp nhông byî akô nghut ri. 6 Yhángmòq gi, haû Yhûmsîng Garaî é noqkuq yhum é a-pûn awang lé a hkyó shi kô é nghut kôle, lha-mó nyhit hkyap hkyap lhôxân nyí má, haû Yhûmsîng Garai lé myi nyhé hkungga pé nhông byî hî bekô nghut ri.Noqkuq Yhûm Saî Saî É Hkyô
7 Hau htâng, yhángmòq gi, lùqgòk hkoq bang eq lòqmú zui bang lé ngùn byi mù, Perisi hkóhkâm Kuru ahkáng byî é eq rajung za, Sidon wà eq Turuq wà byu pé mai Lebanon mâ é kyám sik yù mù, wuì hkyô mai Yopa wà má wó htô jé râ matú, yhángmòq lé zoshuq eq tsanlun xû pé byî akô nghut ri.
8 Yerusalem wà mó má jòq é Garai Gasâng é yhûm má yhángmòq jé é htâng í zan zàn, lha-mó í hkyap hkyap má, Shelatila é yhang zo Zerubabela, Yozadak é yhang zo Yeshu-a, myìt gyó tô é shiwa byù nghut é, hkyangjông pé, Lewiq byu pé eq shúm zung é mai Yerusalem wà mó má dum taû lo é bànshoq bang gi, múzó lé hî kômù, í xê zàn lai bê é Lewiq byu pé lé, haû Yhûmsîng Garaî é yhûm saî é múzó má wú gon nhang akô nghut ri. 9 Haû mù, Yeshu-a eq yhang zo yùqzô pé, yhang gu yhang mâng pé, Hodawi-a é awùt ashín nghut é Katmi-ela eq yhang zo yùqzô pé, Henadat é yhang zo yùqzô pé, yùqzo haú bâng é yhang zo yùqzô pé eq yhángmòq é gu-mang wuì gi, haû Yhûmsîng Garaî é yhûm saî é múzó má rahá chôm wú gôn akô; yhángmòq bànshoq bang gi, Lewiq byu pé chyat nghut ri.
10 Haû yhûm saí bang gi, Yhûmsîng Garaî é noqkuq yhum é a-pûn awang lé hkyó kô é hkûn, Isira-elaq hkóhkâm Dawiq sang tô é eq rajung za, haû Yhûmsîng Garai lé hkya-on kúngtôn râ matú, tut pé chung é yhángmòq é hking wùt é hkyangjong eq Lewiq byù nghut é, chapchéng pé chung é Asap é yhang zo yùqzô pé gi, yhûmsing é jowò má yàp tô bum akô nghut ri. 11 Yhángmòq gi, hkya-on kúngton é eq jeju bûn é myìt mai, haû Yhûmsîng Garai lé,
“Yhang gi, gè Sû nghut ri;
Isira-elaq byu pé lé Yhang chyitdàp é myìt gi, ahtum abyùq gîng nyi ri.” ga mahkôn hkon bum akô.
Haú hkûn, shiwa byù bànshoq bang gi, haû Yhûmsîng Garaî é yhum é a-pûn awang hkyô to bê nghut é yánmai, haû Yhûmsîng Garai lé htê mó èq hkya-on kúngton akô nghut ri. 12 Nghut kôlhang, hí lhê é noqkuq yhûm lé myàng bê nghut é, chyungxe zànwut ko bê é hkyangjông pé, Lewiq byu pé eq yhûmhtu ushuq pé myo myo gi, góbang myo myo gabú garû nyì kô é u, noqkuq yhûm hau é a-pûn awang dum hkyó bê nghut é lé myàng kôluî, wùt ngau bum akô nghut ri. 13 Haû mù, shiwa byu pé lûm garû bùm kô é yánmai, gabú garu htê eq wùt ngaù htê lé a ge gàm hkoq lo nghut ri. Htê haú lé gyai we mai lháng wó gyo bê nghut ri.