2 HKÓHKÂM LABAÛ LAIKÁ
Laiká
(2 Chronicles)
Sholumon Hpàqchyî Byéng-yá Dûng Yu É Hkyô
1
Dawiq é yhang zo Sholumon gi, yhâng é mîngdán lé lhoq gingtîng to bê nghut ri; hkâsu mù gâ le, yhâng é Garai Gasang nghut é, haû Yhûmsîng Garai gi, yhang eq rahá nghut nyî mù, yhang lé gyai yhang shigyaú wàq toq tô é nghut ri.2 Haú hkûn, Sholumon gi, Isira-elaq shiwa byù hpúng gón, rahkyîng ùp gyèzaû pé, rashô ùp gyèzaû pé, târâ agyi pé, Isira-elaq byu pê é zaugun wuì bànshoq eq yhûmhtu ushuq pé lé dáng nyo ri. 3 Haû mù, Sholumon eq shiwa byù hpúng gón gi, Gibe-on mâ é myhang é jowò má dòq e akô; hkâsu mù gâ le, haû Yhûmsîng Garaî é duìnhâng zoshâng Mosheq mai yòso má saî é, Garai Gasâng é zùphpong zúm gi, haú má jòq tô é nghut ri. 4 Garai Gasâng é sàksé dò lé kúm gi, Kiri-at Yarim mai Dawiq wàq yù mù, hau é matú Yerusalem wà mó má yhang saî tô é zúm má kat to bê nghut ri. 5 Nghut kôlhang, Hura é yhang shu, Uri é yhang zo Bezalela saî é gyi hkungga gyàp gi, Gibe-on má, haû Yhûmsîng Garaî é sàksé zúm hí má jòq tô é nghut mù, Sholumon eq shiwa hpúng gón gi, hau é hí má ê noqkuq akô. 6 Sholumon gi, zùphpong zúm má haû Yhûmsîng Garaî é hí má jòq tô é gyi hkungga gyàp má ê jé luî, hkungga gyàp hau é ahtoq má myi nyhé hkungga rahkyîng nhông byî ri.
7 Haú myîn, Garai Gasang gi, Sholumon chyáng lé htoq shit mù, yhang lé, “Ngò, nang lé haî byi râ, dung aq.” ga taî ri.
8 Haú hkûn, Sholumon gi, Garai Gasang lé, “Nàng gi, ngá wa Dawiq lé jeju mó shit bê nghut mù, yhâng é hkô má ngo lé hkóhkâm kut nhâng bê nghut ri. 9 Ahkuî, Yhûmsîng Garai Gasang ê, myìdàm htoq mâ é hpuílhup su myô é a-myû lé ùp râ matú, ngo lé hkóhkâm kut nhâng bê nghut é yánmai, ngá wa Dawiq lé Nàng danghtum htûm tô é lé lhoqdìk byi àq hkoi. 10 Byù shí bang lé ngò wó shuî-u râ matú, hpàqchyî byéng-yá eq sê gyô é myìt byi laq; shî myhô é Náng é byu pé lé ó yùq wá wó ùphkâng râ lhú?” ga dûng ri.
11 Haû mù, Garai Gasang gi, Sholumon lé, “Shî gi, nàng ô nau é hkyô nghut mù, sùtzè, wó sut hkyô eq xânghpoq nge wó hkyô lé nàng a dûng é htoq agó, náng é gye pé shi byùq râ lé le, náng é chyungxe hîng râ lé le, nàng a dûng é za, Ngò, nang lé hkóhkâm kut nhang é Ngá é byu pé lé ùp râ matú, hpàqchyî byéng-yá eq sê gyô é myìt lé shèq dung bê nghut é yánmai, 12 hpàqchyî byéng-yá eq sê gyô é myìt, nang lé byi râ nghut lhê. Hau htoq agó, náng é hí mâ é hkóhkam pé a wó wú é eq náng é htâng mâ é hkóhkam pé wó râ a nghut é, sùtzè, wó sut hkyô eq xânghpoq nge wó hkyô lé le, Ngò, nang lé byi râ nghut lhê.” ga taî ri.
13 Haû mù, Sholumon gi, zùphpong zúm hí, Gibe-on mâ é myhang é jowò mai Yerusalem wà mó shut dum taû ló mù, Isira-elaq a-myû wuì lé ùp nyi ri.
14 Sholumon gi, gyèlhêng pé eq myang pé lé tsîng yu ri; yhang gi, gyèlhêng rahkying myi shô cham eq myang ramûn í hkyîng du wó é nghut mù, haú pé lé, lhêng tô tô é wà mó pé eq yhang nyi é Yerusalem wà mó má tô tô bum ri. 15 Yhang hkóhkâm hpó gi, Yerusalem wà mó má, hîng eq ngùn lé lùqgòk pé su, kyám gâm lé pá pé mâ é hkohúm gâm pé su lhoqmyô yu ri. 16 Sholumôn é myang pé lé gi, Egutuq ming mai wui lo é htoq agó, hkóhkam é wuìloq kut bâng èq Ku-e mai le wui lo é nghut ri. 17 Yhángmòq gi, Egutuq ming mai, lhêng racham lé ngùnhtung í joí èq raxe sum rûng kô byi mù, myang radu lé í xê rùng kô byi luî, wui yu akô nghut ri; haû eq rajung za, yhángmòq gi, Hiti byu pé eq Aram byu pê é hkóhkam pé bànshoq bang lé le haú dông ung byî akô nghut ri.