Noqkuq Yhûm Saí Râ Matú Hen Lajâng É Hkyô
2
Sholumon gi, haû Yhûmsîng Garaî é Mying é matú noqkuq yhûm eq yhâng é matú hkóhkâm wâng saí râ hkunmó hkyô ri. 2 Haû mù, yhang gi, wò wùn wàq râ bang nyhit mun, bùm pé má lùqgòk hkoq râ bang shit mun eq haú bang lé wú gon râ byù súm hkying hkyuq shô yùq lé hkyin htoq yu ri.3 Hau htâng, Sholumon gi, Turuq hkóhkâm Hirama lé,
“Ngá wa Dawiq é yhûm saí râ matú, nàng, kyám gâm sikhtung pé dé kat byî é eq rajung za, ngo lé le kyám gâm sikhtung pé dé kat byi aq. 4 Isira-elaq byu pê é matú ayang ru joq nyi é htûngli eq rajung za, ngá é Garai Gasang nghut é, haû Yhûmsîng Garaî é hí má namngón shôm nyhê nhông byi râ matú le, ting tô é mùk lé ayang wó tô shit râ matú le, nàp wuì, myìn wuì, Bánno Buìnyì pé, Lhôxan Lhôsik poî pé eq, ngá-mòq é Garai Gasang nghut é, haû Yhûmsîng Garaî é masàt tô é poî pé má myi nyhé hkungga nhông byi râ matú le, ahkuî, ngò gi, ngá é Garai Gasang nghut é, haû Yhûmsîng Garaî é Mying é matú, noqkuq yhûm saí mù, yhûmwàng wàng râ za nghut bê.
5 Ngá-mòq é Garai Gasang gi, gótû hparà pé bànshoq htoq má gyaú Sû nghut é yánmai, ngò saí râ nghut é noqkuq yhûm gi, gyaú râ nghut lhê. 6 Nghut kôlhang, mauhkûng eq maúhkung htoq mauhkûng pé lháng, Yhang lé a wó lhûng é nghut jáng, Yhâng é matú noqkuq yhûm ó yùq wó saí râ lhú? Yhâng é hí má myi nyhé hkungga nhông byi râ jowò saî é mai lai luî, ngò gi, ó wá nghut mù, Yhâng é matú noqkuq yhûm saí râ lhú?
7 Haû mù, Yudaq mau eq Yerusalem wà mó má ngò eq rahá nyi é, ngá wa Dawiq hkyin to byî é lòqmú kûng é byu pé eq rahá nyì râ matú, hîng, ngùn, gyi eq jòqtoq, nè noq noq é, zam zam ne é eq mauhkûng nyuì nyui é pán pé chung é má lòqmú bo é htoq agó, rago ge kyûng kâ é, lòqmú bo é byù rayùq ngo lé nhâng byi aq.
8 Hau htoq agó, Lebanon bùm mâ é kyám gâm sik, htángmó sik, alagum sik pé lé le dé kat byi aq; hkâsu mù gâ le, náng é byu pé gi, Lebanon bùm má sik ge yu é bang nghut é lé ngò sê lhê. 9 Sik myo myo wó yû râ matú, ngá é byu pé gi, náng é byu pé eq rahá mú zui râ nghut lhê; hkâsu mù gâ le, ngò saí râ noqkuq yhûm gi, kô lam é eq wú maú nhô zâ é yhûm dùt ra râ nghut lhê. 10 Ngò gi, sik yu é náng é duìnhâng zoshâng wuì lé, súngsô 1066000 joí, mùk-yó gùq 1066000 joí, tsibyiq wing 120000 chyóng eq tsanlun xû 120000 chyóng byi râ nghut lhê.” ga dang hun kat ri.
11 Haû mù, Turuq hkóhkâm Hiram gi, Sholumon lé,
“Haû Yhûmsîng Garai gi, Yhâng é byu pé lé chyitdàp mù, nang lé yhángmòq é hkóhkâm kut nhâng bê nghut ri.” ga laiká lhom taû kat ri.
12 Hau htoq agó, Hiram gi,
“Mauhkûng eq myigùng lé hpan é, Isira-elaq é Garai Gasang, haû Yhûmsîng Garai gi, hkungsô wó sháng gàq ô! Yhang gi, Hkóhkâm Dawiq lé hpàqchyî bo é yùqzo byi bê nghut mù, yhang lé, Yhûmsîng Garaî é matú noqkuq yhûm saí râ eq yhâng é matú hkóhkâm wâng saí râ u-nuq eq sê gam hkoq é myìt kat byi bê nghut ri.
13 Ngò gi, hpàqchyî bò mù, lòqmú bo dik é Huram Abi ga sû lé, náng chyáng nhang kat lhê. 14 Yhâng nu gi, Dan up mâ é nghut luî, yhâng wa gi, Turuq wà byù nghut ri. Yhang gi, hîng, ngùn, gyi eq jòqtoq, lùqgòk eq sik, nè noq noq é, mauhkûng nyuì nyui é eq zam zam ne é hkyîng eq nú nhâm é pán pé zui saí râ lòqmú mhoq yû bê sû nghut lhê. Hau htoq agó, yhang gi, adông dông kyûng é jung bànshoq eq byî é azòng haî lé le ge kyûng é lòqmú bò sû nghut lhê. Yhang gi, náng é lòqmú zui bang eq ngá é yhûmsîng nghut é náng wa Dawiq é lòqmú zui bang le mù, rahá chôm zui saí râ nghut lhê.
15 Haû mù, ngá é yhûmsîng gi, nàng danghtum htûm tô é eq rajung za, náng é duìnhâng zoshâng wuì lé, súngsô, mùk-yó gùq, tsanlun xû eq tsibyiq wing pé byi àq hkoi; 16 haû jáng, nàng râ é sik bànshoq lé, ngá-mòq Lebanon bùm mai yù mù, Yopa wà jé shoq wuì mai myhû gyó lô râ nghut lhê. Nàng gi, haú pé lé Yerusalem wà mó shut lé ge wàq yu lhê.” ga le kâ lhôm kat ri.