Sholumon Noqkuq Yhûm Saî É Hkyô
3
Sholumon gi, haû Yhûmsîng Garai mai yhâng wa Dawiq lé htoq shit é jang, Yerusalem wà mó mâ é Mori-a Bùm má, haû Yhûmsîng Garaî é noqkuq yhûm lé saî hî bê nghut ri; haû gi, Dawiq hen tô é jowò, Yebusi byù Arauna é chyârâng má nghut ri. 2 Sholumon gi, yhang hkóhkâm kut é myí zan zàn, lha-mó í hkyap hkyap, í nyí nyí má múzó haû hî bê nghut ri.3 Sholumon gi, Garai Gasâng é noqkuq yhum é a-pûn awang lé, kê é dúng axau lé chûng luî, hîng hpyang hkyuq xê dúng, làm hpyang í xê dúng kut hkyô ri. 4 Noqkuq yhûm hí mâ é laìshînhtâng gi, yhum é làm hpyang eq rajung za í xê dúng hîng mù, í xê dúng myhang ri.
Yhang gi, hau é ahkaû shut hîng gyíng shup tô ri. 5 Yhang gi, yhúmhkaû shut htángmó siklong tap pyám luî, hîng shup mù, byùm gàm lhô eq tuijâng lhô pé kyûng tap tô ri. 6 Yhang gi, noqkuq yhûm lé gù bo jung lungsêng pê èq mhôn tô ri; yháng chung é hîng gi, Pariwim mâ é hîng nghut ri. 7 Yhang gi, noqkuq yhûm mâ é hkyâng pé, hkum dúnlhum pé, xêwâm pé eq hkum pé lé hîng shup to mù, xêwâm pé má hkerubim lhô pé kyûng tap tô ri.
8 Yhang gi, Chyoiyúng Htâng é Jowò lé saî é nghut mù, noqkuq yhum é làm hpyang eq rajung za, hîng hpyang í xê dúng, làm hpyang í xê dúng kut luî, hau é ahkaû shut hîng gyíng 6600 joí èq shup tô ri. 9 Hîng zu pé lé chîn wú le, nyhit rûng kô kô bo ri. Ahtoq wàp pé má le hîng shup tô ri.
10 Yhang gi, Chyoiyúng Htâng é Jowò má hkerubim azòng razúm saî to nhâng mù, haú má hîng shup tô ri. 11 Hkerubim haû í dû é dùng pé gi, í xê dúng hing ri; hkerubim radû é dùng rahkyam shut gi, ngo dúng hîng mù, xêwâm má záng to luî, gódûng le ngo dúng hîng mù, hkerubim gódû é dùng má záng tô ri. 12 Haû eq rajung za, hkerubim gódû é radùng le ngo dúng hîng mù, noqkuq yhum é xêwâm má záng to luî, gódûng le, ngo dúng hîng mù, gódû é dùng má záng tô ri. 13 Hkerubim shî í du gi, dùng pé lé í xê dúng hîng shoq pyo to mù, yhúmhkaû shut hu yàp tô akô.
14 Yhang gi, mauhkûng nyuì nyui é, nè noq noq é eq zam zam ne é hkyîng eq nú nhâm é jihkyîng lé pán-gyang wòq mù, haú má hkerubim lhô htaû tap tô ri.
15 Yhang gi, noqkuq yhûm yhûmhkun má súm xe ngo dúng dúng hing é zîng mó í zîng saí mù, zìng hpyo hkangmó má ngo dúng dúng lhoqhtu tô ri. 16 Yhang gi, chyoiyúng jowò mâ é tuijâng sû é tuijâng saí mù, zìng mó haû í zîng mâ é zìng hpyo má lhâng to luî, lungshi rashô cham saî yù mù, tuijâng haú má lhâng tô ri. 17 Yhang gi, zîng mó haû í zîng lé, noqkuq yhûm yhûmhkun má, lòqyò hkyam shut razìng, lòqpaî hkyam shut razìng kut xuq tô ri; lòqyo hkyam shut mâ é zìng lé gi, Yahkin ga, lòqpaî hkyam shut mâ é zìng lé gi, Bu-aq ga myhîng ri.