Noqkuq Yhûm Mâ É Chûngzè Pé
4
Hau htoq agó, Sholumon gi, hîng hpyang í xê dúng, làm hpyang í xê dúng eq myhâng hpyang raxê dúng bo é gyi hkungga gyàp saî ri. 2 Gyi lànghkang mó le alíng mâ é saí mù, hé yâm shí yâm gyoro raxê dúng làm luî, ngo dúng nìk mù, ayàm lhînghkyùq sum xê dúng hing ri. 3 Lànghkang dúng tô é a-ô lhînghkyùq má gi, nohtó su dùt é alhô lé, radúng má raxê lhô lhô kut, í yán kyûng tap tô ri; lànghkang lé shup é hkûn, haú pé lé le jâng shup lhôm ri.4 Lànghkang mó haû lé gi, gyi nohtó raxe í dû é ahtoq má tsung tô é nghut mù, nohtó sûm du gi, mautsûng shut hû, sûm du gi, buìwàng shut hû, sûm du gi, maupyî shut hû, sûm du gi, buìhtoq shut hu tô é nghut luî, chûhtâng hkyúm dùt tô ri. 5 Lànghkang gi, lòqwa rahup htu ri; hau é adúng gi, gòm nhut su dùt mù, htupbó ban sû é mhôn tap tô ri. Haú má ûchyam 17500 chyóng kô wang ri.
6 Hau htâng, zè chi lànghkang zo raxê lhum saí mù, maupyî shut ngo lhum to luî, mautsûng shut ngo lhum tô tô ri. Haú pé má gi, myi nyhé hkungga pé eq sêng é zè pé lé chî ri; lànghkang mó kúm gi, hkyangjông pé gùng chi râ matú nghut ri.
7 Hau htâng, shit kyô tô é eq rajung za hîng myi-kok tsûngjang raxê lhum saí mù, noqkuq yhúmhkaû má, maupyî shut ngo lhum, mautsûng shut ngo lhum kut tsung tô ri.
8 Hau htâng, gyàp raxê lhum lé le saí mù, noqkuq yhúmhkaû má, maupyî shut ngo lhum, mautsûng shut ngo lhum kut tô tô luî, hîng hkoq mó rashô hkyap lé le saî tô ri.
9 Hau htoq agó, hkyangjông pê é wânghkaû, shinggan wânghkaû mó eq wâng hkum pé lé saí mù, wâng hkum pé má gyi shup tô ri. 10 Hau htâng, lànghkang haú lé le, maupyî buìhtoq hkyam achyûn má tô tô ri.
11 Hau htâng, au pé, gòt zè pé eq hkoq mó pé lé le saî tô ri.
Haû mù, Huram gi, Hkóhkâm Sholumon é matú, Garai Gasâng é noqkuq yhûm mâ é múzó ban saî to bê nghut ri. Hau pé gi,
12 zìng mó í zîng;
zìng haû í zing é ahpyo mâ é hkoq zông achyûn;
zìng haû í zing é ahpyo mâ é hkoq zông achyûn lé mhôn é tuijâng í jâng;
13 zìng haû í zing é ahpyo mâ é hkoq zông achyûn má mhôn é tuijâng í jáng má, rajàng í yán yán, rayán má rashô cham cham kut tap râ matú, lungshi myi shô cham;
14 lànghkang zo pé eq haú pé tsûng râ hkyî pé;
15 lànghkang mó eq hau é a-ô mâ é gyi nohtó raxe í du;
16 au pé, gòt zè pé, akó mâ é sho htau dun pé eq, haú pé eq sêng é chûngzè pé bànshoq nghut ri.
Lòqmú bo é Huram gi, Hkóhkâm Sholumon é matú, haû Yhûmsîng Garaî é noqkuq yhûm mâ é chûngzè pé bànshoq lé, chyut chyut é gyî èq chyat saî to byî ri. 17 Hkóhkâm hpó gi, zè haú pé lé, Yodan làng langhkaû mâ é Suhkut eq Zarehtana gyoro má tso nyhaq azòng saí mù shup yû nhang é nghut ri. 18 Sholumon gi, zè haú pé myo myo yhang saî htoq é nghut mù, gyi hkâ-myhó joí nghut é lé, ó le a ung lìk wú nghut ri.
19 Sholumon le, Garai Gasâng é noqkuq yhûm mâ é chûngzè bànshoq lé saî ri; haú pé gi, hîng hkungga gyàp; Tô Shit é Mùk kê é mùkgyàp pé; 20 târâ eq rajung za, ahtê pyâm sân-yúng jowò hí má nyhé râ matú, hîng gyíng myi-kok tsûngjang pé eq haú pê é myi-kok pé; 21 hîng gyíng pé lé chyat saî é myishi pé, myi-kok pé eq nyàp pé; 22 hîng gyíng lé saî é, nyàp pé, hkoq mó pé, gòmhtung pé eq namngón shôm nyhé myihkoq pé; noqkuq yhûm mâ é hîng hkum pé nghut é, Chyoiyúng Htâng é Jowò mâ é ahkaû hkum pé eq wàpdòq mó mâ é hkum pé nghut ri.