5
Sholumon gi, haû Yhûmsîng Garaî é noqkuq yhum é matú zui saî é múzó bànshoq ban saî é hkûn, yhâng wa Dawiq àp nhong tô é ngùn, hîng eq chûngzè bànshoq lé yu htoq mù, Garai Gasâng é noqkuq yhûm mâ é sùtdò má tsing kat tô ri.Noqkuq Yhûm Má Sàksé Dò Wàq Hâng É Hkyô
2 Haû mù, Sholumon gi, haû Yhûmsîng Garaî é dangshikaq sàksé dò lé, Zi-un nghut é Dawiq é Wà mai ê wàq dòq yù râ matú, Isira-elaq byu pê é sûwún wuî, a-myû up pé mâ é ushuq pé bànshoq eq Isira-elaq byu pê é yhûmhtu pé mâ é zau wuî lé, Yerusalem wà mó má ji tsîng yu ri. 3 Haû mù, Isira-elaq byù bànshoq bang gi, lha-mó nyhit hkyap hkyap má kut é poî má, hkóhkam chyáng lé chôm zùp zîng bum akô nghut ri.
4 Isira-elaq byu pê é sûwún wuî bànshoq bang lé jé kô é hkûn, Lewiq byu pé gi, sàksé dò lé wàq toq yû kômù, 5 sàksé dò lé le, zùphpong zúm lé le, zúm haú mâ é chyoiyúng chûngzè bànshoq lé le, wàq toq akô nghut ri. Haú pé lé, Lewiq byù nghut é hkyangjông pé mai wàq akô nghut ri. 6 Hkóhkâm Sholumon eq yhâng chyáng lé zîng bum é Isira-elaq byù hpúng gón gi, sàksé dò hí má nyi to kômù, a ung nghap loshoq nghut é sau pé eq no pé lé, hkungga nhông byî akô nghut ri.
7 Haú hkûn, hkyangjông pé gi, haû Yhûmsîng Garaî é dangshikaq sàksé dò lé, Chyoiyúng Htâng é Jowò nghut é, noqkuq yhûm mâ é ahtê pyâm sân-yúng jowò, hkerubim é dùng ô má wàq kat tô akô nghut ri. 8 Hkerubim haû í lhûm é dùng pé gi, sàksé dò hau é ahtoq má pyo tô é nghut mù, sàksé dò lé le, haú lé wàq é gán-yang pé lé le, nghop tô ri. 9 Gán-yang haú pé gi, lûm hîng mù, ahtâng lé ahtê pyâm sân-yúng jowò hí mai byu myang ri; nghut kôlhang, Chyoiyúng Jowò shinggan mai gi, haú lé a myàng nghut ri; haú pé gi, hkû-nyí jé shoq haû má jòq tô ri. 10 Sàksé dò haú má gi, Isira-elaq byu pé Egutuq ming mai htoq lo é htâng, haû Yhûmsîng Garai mai yhángmòq eq dangshikaq tô é jang, Horep bùm má Mosheq kat tô é lùqlong í long mai lai luî, gótû haî le a bò nghut ri.
11 Haû hkyangjông pé gi, Chyoiyúng Jowò mai htoq lô bekô. Haú má zîng tô é hkyangjông pé bànshoq bang gi, hká hpúng le a gâ é za, yhûmsing gùng lé lhoq sân-yúng yu to bekô nghut ri. 12 Mahkôn hpúng nghut é Lewiq byù, Asap, Heman, Yeduhtun, yhángmòq é yhang zo yùqzô pé eq gu-mang wuì, bànshoq bang gi, nú nhâm é ji mèbu wùt mù, chapchéng pé, tíng pé eq tíng góng pé bàt luî, hkungga gyàp é buìhtoq hkyam shut yàp tô bum akô; yhángmòq eq rahá, tut mùt é hkyangjong rasho í xê yùq le bo yàp tô bum ri. 13 Tut mùt é bang eq mahkôn hkon é bang gi, rahtê za kut luî, haû Yhûmsîng Garai lé jeju bun mù, hkya-on kúngton akô; hau htoq agó, tut mùt bang le, chapchéng bàt bang le, gótû bàt mùt jung chûng bang le, haû Yhûmsîng Garai lé hkya-ôn é má yhángmòq é htê lhoqmyhâng kôluî,
“Yhang gi, gè Sû nghut ri;
Yhâng é chyitdàp myìt gi, ahtum abyùq gîng nyi ri.” ga hkon akô nghut ri.