6
Haú hkûn, Sholumon gi, “Haû Yhûmsîng Garai gi, tîng tîng nòq é mhut hkaû má nyì râ nghut lhê ga taî é nghut ri; 2 nghut kôle, ngò kúm gi, Náng é matú, Nàng ahtum abyùq nyì râ nghut é maú nhô zâ é noqkuq yhûm lé saí bê nghut lhê.” ga taî ri.3 Isira-elaq byù hpúng gón gi, haú má yàp tô bum é u lé, hkóhkâm hpó gi, lhîng luî, yhángmòq lé shimân byî ri. 4 Hau htâng, yhang gi,
“Ngá wa Dawiq lé, Yhâng é nhut mai danghtum htûm to luî, Yhâng é lòq èq lhoqdìk byî é Sû, Isira-elaq byu pê é Garai Gasang, haû Yhûmsîng Garai gi, hkungsô wó nyî sháng gàq. Hkâsu mù gâ le, Yhang gi, 5 ‘Ngò, Ngá é byu pé lé Egutuq ming mai shuî htoq lo é hkûn mai, Ngá é Myìng jòq nyì râ matú, Isira-elaq a-myû up mâ é wà hká wâ má le noqkuq yhûm jòq râ matú a hkyin yu é htoq agó, Ngá é Isira-elaq byu pé lé ùp râ matú hká yùq lé le a hkyin yu é za, 6 ahkuî, Ngá é Myìng jòq nyì râ matú, Ngò, Yerusalem wà mó lé hkyin yù mù, Ngá é Isira-elaq byu pé lé ùp râ matú Dawiq lé hkyin yù bê nghut lhê.’ ga taî ri.
7 Ngá wa Dawiq gi, Isira-elaq é Garai Gasang, haû Yhûmsîng Garaî é Mying é matú noqkuq yhûm saí râ myìt bo é nghut lhê. 8 Nghut kôlhang, haû Yhûmsîng Garai gi, ngá wa Dawiq lé, ‘Nàng, Ngá é Mying é matú noqkuq yhûm saí râ myìt bo é hkyô gi, gyaí ge é nghut ri. 9 Nghut kôle, nàng gi, noqkuq yhûm saí râ sû a nghut; náng é suisho yhang nghut é nungzo shèq, Ngá é Mying é matú noqkuq yhûm saí râ sû nghut lhê.’ ga taî ri.
10 Haû Yhûmsîng Garai gi, Yhang danghtum htûm tô é lé lhoqdìk bê nghut ri. Ngò gi, ngá wa Dawiq é hkô má zùng mù, haû Yhûmsîng Garai danghtum htûm tô é eq rajung za, Isira-elaq é hkóhkâm tángmyhâng má zùng luî, Isira-elaq é Garai Gasang, haû Yhûmsîng Garaî é Mying é matú noqkuq yhûm saí bê nghut lhê. 11 Isira-elaq byu pé eq haû Yhûmsîng Garai tô tô é dangshikaq bo é sàksé dò lé, haú má kat to bê nghut lhê.” ga taî ri.
Sholumon É Ap Nhông Kyûdung Dang
12 Haû mù, Sholumon gi, Isira-elaq byù hpúng gón é hí mâ é, haû Yhûmsîng Garaî é hkungga gyàp hí má yàp to mù, yhâng é lòq lam kat ri. 13 Sholumon gi, hîng hpyang ngo dúng, làm hpyang ngo dúng eq myhâng hpyang sum dúng bo é gyi gyamzân saí mù, wâng agùng má tô tô é nghut ri. Yhang gi, gyamzân haú má yàp to mù, Isira-elaq byù hpúng gón é hí má hkyîhput htuq luî, yhâng é lòq mauhkûng shut tu lhâm to mù,
14 “Isira-elaq é Garai Gasang, Yhûmsîng Garai ê, mauhkûng eq myigùng htoq má Nàng su dùt é Garai Gasang a nyì; Nàng gi, i-myìt nhiklhum bànshoq èq Náng é hkyô châng é, Náng é duìnhâng zoshâng wuì lé, Náng é chyitdàp dangshikaq lhoqdìk byi Sû nghut ri. 15 Nàng gi, Náng é duìnhâng zoshâng ngá wa Dawiq lé danghtum htûm tô é eq rajung za lhoqdìk byi bê nghut ri; Nàng gi, Náng é nhut mai danghtum htûm to luî, Náng é lòq èq haú lé hkû-nyí lhoqdìk bê nghut ri.
16 Isira-elaq é Garai Gasang, Yhûmsîng Garai ê, Nàng gi, ‘Nàng, Ngá é târâ lé châng nyi é eq rajung za, náng é zodù wuì le Ngá é hí má rago za châng nyì kô é nghut jáng, Isira-elaq ming mâ é hkóhkâm tángmyhâng má, náng é awùt mâ é byù rayùq Ngá é hí má ayang zung nyì râ nghut lhê.’ ga, Náng é duìnhâng zoshâng ngá wa Dawiq lé danghtum htûm tô é eq rajung za lhoqdìk byi aq. 17 Isira-elaq é Garai Gasang, Yhûmsîng Garai ê, Náng é duìnhâng zoshâng Dawiq lé htûm tô é danghtum, ahkuî dìk byùq sháng gàq.
18 Nghut kôlhang, Garai Gasang gi, myìdàm htoq má byu pé eq gè gè yhang nyì râ nghut lhê lhú? Haû mauhkûng eq myhang htâng é mauhkûng lháng Nang lé a wó lhûng é nghut lhê. Haû jáng, ngò saî é noqkuq yhûm shî gi, Náng é matú hkâ-í yhang tiq râ nghut lhê! 19 Nghut kôlhang, ngá é Garai Gasang nghut é, Yhûmsîng Garai ê, Náng é duìnhâng zôshang é kyûdung dang eq shogyo nhikmyîn yù râ matú dûng tôngbán é dang lé tâm gyo byi laq. Náng é hí má, náng é duìnhâng zoshâng kyûdûng é dang eq wùt dûng ngau é dang lé gyo byi laq. 20 Náng é Myìng jòq nyî râ nghut lhê ga Nàng taî é jowò nghut é noqkuq yhûm shî lé, nyí myín Nàng wú nyî àq. Shí jowò shut hû mù Náng é duìnhâng zoshâng kyûdûng é dang lé, tâm gyo byi laq ô. 21 Náng é duìnhâng zoshâng eq Náng é Isira-elaq byu pé mai shí jowò shut hû mù, dûng tôngbán é dang lé gyo byi laq. Náng é nyì jowò nghut é mauhkûng mai gyo byi laq; Nàng gyo byî é hkûn, mara hkyut pyám byi laq ô.
22 Byù rayùq yùq, yhâng é yhûmkyochang lé shut pyám mù, dakâm râ hkyô htoq luî, noqkuq yhûm shî mâ é Náng é hkungga gyàp hí má lé dâkam é nghut jáng, 23 mauhkûng mai gyô yù byi mù, Náng é duìnhâng zoshâng wuì lé târâ jéyáng byi aq; shut é sû lé, yhâng é mara eq rajung za yhâng é ulhum má lató hpuq byi mù, díngmán é sû lé, díngmán é sû dông lhoqpyô byi luî, yhang díngmán é eq rajung za jeju byi aq.
24 Náng é Isira-elaq byu pé gi, Nang lé mara shut luî, gye pê é lòq má sûm byùq kômù, myìt lhing lò luî, Náng é myìng lé yín yû mù, noqkuq yhûm shî má Nang lé kyûdung luî, dûng tôngbán kô é nghut jáng, 25 mauhkûng mai gyo byi luî, Náng é Isira-elaq byu pê é mara hkyut pyám byi mù, Nàng mai yhángmòq eq yhángmòq é îchyí îwâ pé lé byî tô é mau má yhángmòq lé dum shuî taû lò àq.
26 Náng é byu pé, Nang lé mara kut shut kô é yánmai, mauhkûng myhî byùq luî, mau a wò dùt byùq é nghut mù, yhángmòq gi, shí jowò shut hû mù, kyûdung luî, Náng é myìng lé yín yû luî, Nàng, yhángmòq lé hpu zo nhang é yánmai, yhángmòq é mara mai lhing lò kô é nghut jáng, 27 mauhkûng mai gyo byi luî, Náng é Isira-elaq byù, Náng é duìnhâng zoshâng wuì lé mara hkyut pyám byi laq. Yhángmòq châng nyì râ ge é hkyô lé mhoq byi mù, silî wunlî dông Náng é byu pé lé Nàng byî tô é mau má, mau wô nhâng àq.
28 Haú mau má mùtmó gyó é, wúm gyó é, gùqsûn sun é, gùqji zô é, dinggám nê eq dinggám nyuî lo é nghut jáng le, yhángmòq é wà rawà wà lé gye pê èq lóm pyâm é nghut jáng le, byò dàn byò sho eq nòlì nòjàng haî jé é nghut jáng le, 29 Náng é Isira-elaq byù mâ é rayùq yùq, yhûmsîng hpu zô é hkyô eq no hpû é sé mù, noqkuq yhûm shí shut hû luî, yhâng lòq tû mù, kyûdûng tôngbán é nghut jáng le, 30 Náng é nyì jowò nghut é mauhkûng mai gyo byi laq. Nàng gi, byu é i-myìt lé sé sû nghut é yánmai, mara hkyut byi luî, yùq hkangmó kut é múzó bànshoq má cháng luî, taû kut byi aq. Byu é i-myìt lé sé sû gi, Nàng za nghut lhê. 31 Haú hkûn, yhángmòq gi, Nàng mai yhángmòq é îchyí îwâ pé lé byî tô é mau má chyungxe dui nyi é ahkyíng bànshoq má, Nang lé gyùq hkúngga luî, Náng é hkyô pé má wó châng nyì kôrâ nghut lhê.
32 Hau htoq agó, mau we mâ é byu pé gi, Náng é kô é mying é yánmai le, Náng é hpungwup a-tsam bo é lòq eq Nàng lhâm tô é lòqbú é yánmai le, Náng é Isira-elaq byù a nghut kôlhang, mau we mai lé mù, noqkuq yhûm shí shut hû luî, kyûdung kô é nghut jáng, 33 Náng é nyì jowò nghut é mauhkûng mai gyo byi mù, byù bíng haú bang dûng é bànshoq kut byi laq; haú hkûn, myìdàm htoq mâ é byù bànshoq bang gi, Náng é Isira-elaq byu pé su, Náng é myìng lé wó sé mù, Nang lé gyùq hkúngga luî, Náng myîng jòq nyi é, ngò saî é noqkuq yhûm shî lé wó sé kôrâ nghut lhê.
34 Náng é byu pé gi, yhángmòq é gye pé lé majan zan râ ga e ló kô é hkûn, Nàng yhángmòq lé hká shut nhang kat kôle, Nàng hkyin yu tô é wà mó shî eq Náng é Mying é matú ngò saî é noqkuq yhûm shí shut hû mù, Nang lé kyûdung kôjáng, 35 mauhkûng mai yhángmòq é kyûdung dang eq yhángmòq dûng tôngbán é dang lé gyo byi mù, yhángmòq lé ûngmyuq nhâng laq.
36 Byù hká yùq le, mara a kut shut é a nyi é yánmai, yhángmòq, Nang lé mara kut shut luî, Nàng, yhángmòq lé nhikjum yo mù, gye pê é lòq má àp byi luî, gye pé gi, wê é mau má nghut nghut, chyâng é mau má nghut nghut, yhángmòq lé shúm zûng nhang é hkûn, 37 yhángmòq gi, yhángmòq shúm zung nyi é mau má myìt lhîng mù, ‘Ngá-mòq gi, mara kut shut bê; ngá-mòq gi, agè ashop hkyô kut mù, shut bê nghut ri.’ ga yhángmòq shúm zung nyi é mau má dûng tôngbán kô é nghut jáng le, 38 yhángmòq gi, yhángmòq lé shuî jé ló é, yhángmòq shúm zung é mau má, yhángmòq é i-myìt nhiklhum bànshoq eq i-myìt sô bànshoq èq Náng chyáng lhing lò mù, yhángmòq é îchyí îwâ pé lé Nàng byî é mau, Nàng hkyin yu é wà mó eq Náng é Mying é matú ngò saî tô é noqkuq yhûm shut hû luî, kyûdung kô é nghut jáng le, 39 Nàng nyi é jowò nghut é mauhkûng mai, yhángmòq é kyûdung dang eq yhángmòq dûng tôngbán é dang lé gyo byi mù, yhángmòq lé ûngmyuq nhâng laq. Nang lé mara kut shut é Náng é byu pé lé mara hkyut pyám byi aq.
40 Ahkuî, ngá é Garai Gasang ê, Náng é myòq hpóng luî, shí jowò má kyûdûng é dang lé tâm gyo byi laq.
41 Ahkuî, Yhûmsîng Garai Gasang ê, toq mù, Nàng eq Náng é hpungwup a-tsam sàksé dò le,
Náng é bánno jowò má lé nyi nyì àq.
Yhûmsîng Garai Gasang ê, Náng é hkyangjông pé gi, hkyi yù hkyô nghu é mèbu wùt kó sháng gàq;
Náng é jujúm bang gi, Náng é jeju má gabú byam chyu kó sháng gàq.
42 Yhûmsîng Garai Gasang ê, Náng é namngón xû bùt hui sû lé hkâ he-ngìk pyám.
Náng é duìnhâng zoshâng Dawiq lé shit é chyitdàp myìt mó lé bun laq ô!” ga dûng ri.