Noqkuq Yhûm Lé Àp Nhong É Hkyô
7
Sholumon kyû ban dûng é hkûn, mauhkûng mai myi gyó lô mù, myi nyhé hkungga eq gótû hkungga pé lé nyé gyó pyám luî, haû Yhûmsîng Garaî é hpungwup shingkang le noqkuq yhûm má byíng zan to bê nghut ri. 2 Haû Yhûmsîng Garaî é hpungwup shingkang gi, Yhûmsîng Garaî é noqkuq yhûm má byíng zan tô é yánmai, hkyangjông pé gi, noqkuq yhûm haú má a wó wang ê kó nghut ri. 3 Isira-elaq byù bànshoq bang gi, myi gyó lo é eq noqkuq yhûm htoq má haû Yhûmsîng Garaî é hpungwup shingkang jòq tô é lé myàng kôjáng, lùqgòk hkâng tô é jang má myigùng jé shoq yhángmòq é myòqdong ngóm gòp kômù, haû Yhûmsîng Garai lé noqkuq luî,“Yhûmsîng Garai gi, ge ri;
Yhâng é chyitdàp myìt gi, ahtum abyùq gîng nyi ri.” ga jeju hkya-ôn akô nghut ri.
4 Hau htâng, hkóhkâm eq shiwa byù bànshoq bang gi, haû Yhûmsîng Garaî é hí má hkungga pé nhông byî akô nghut ri. 5 Hkóhkâm Sholumon gi, no 22000 eq sau bainám 120000 nhông byî ri. Haû mù, hkóhkâm eq shiwa byù bànshoq bang gi, Garai Gasâng é noqkuq yhûm lé àp nhông yhûmwàng wàng bekô nghut ri. 6 Haû hkyangjông pé gi, yhángmòq é jowò yu bum akô; haú u, Lewiq byu pé gi, Hkóhkâm Dawiq mai haû Yhûmsîng Garai lé hkya-on râ matú saí luî, “Yhâng é chyitdàp myìt gi, ahtum abyùq gîng nyi ri.” ga, yhang, jeju hkya-on dang taî é hkûn chung é, Yhûmsîng Garaî é mùt jung bàt jung lé chung bum akô. Hkyangjông pé gi, Lewiq byu pé eq myòqdong hkyúm tut mùt nyì kô é hkûn, Isira-elaq byù bànshoq bang gi, yàp tô bum akô nghut ri.
7 Sholumon gi, haû Yhûmsîng Garaî é noqkuq yhûm yhûmhkun agùng lé lhoq chyoiyúng mù, haú má myi nyhé hkungga pé eq zùmhkaû hkungga pê é xû lé nhông byî ri; hkâsu mù gâ le, yhang saî tô é gyi hkungga gyàp gi, myi nyhé hkungga pé, gùqzò hkungga pé eq xû pé lé tô le jowò a lùq nghut ri.
8 Haû mù, Sholumon gi, haú hkûn, Lebo Hamat wà mai Egutuq ming mâ é Wuìlàng jé shoq jowò hkangmó mai lé jé é Isira-elaq shiwa byù hpúng mó eq rahá, nyhit nyí yhang poî kut ri. 9 Shit nyí nyí má, yhángmòq chôm zùp zîng akô; hkâsu mù gâ le, yhángmòq gi, hkungga gyàp àp nhông poî nyhit nyí kut mù, poî nyhit nyí yhang xoq kut akô nghut ri. 10 Yhang gi, lha-mó nyhit hkyap hkyap í xe sum nyí nyí má shiwa byu pé lé yhángmòq é yhûm shut taû ló nhang é nghut luî, yhángmòq gi, Dawiq é matú le, Sholumon é matú le, Yhâng é Isira-elaq byu pê é matú le, haû Yhûmsîng Garai kut byî é jeju pê é yánmai, gabú nhik dìk é myìt mai yhûm taû ló bûm bekô nghut ri.
Sholumon Lé Yhûmsîng Garai Htoq Shit É Hkyô
11 Sholumon gi, haû Yhûmsîng Garaî é noqkuq yhûm eq hkóhkâm wâng lé ban saí mù, haû Yhûmsîng Garaî é noqkuq yhûm eq yhâng é hkóhkâm wâng má saí râ ga myìt má lúng tô é pé lé bànshoq ban saí jáng, 12 haû Yhûmsîng Garai gi, myín lé yhang lé htoq shit mù,
“Ngò gi, náng é kyûdung dang lé wó gyo mù, hkungga pé nhông byi râ noqkuq yhûm dông, Ngá é matú jowò shî lé hkyin yù bê nghut lhê.
13 Ngò gi, mau a wò râ matú mauhkûng myhî pyâm é nghut jáng le, shí mau lé lhoqhtên pyám râ matú dinggám pé lé hkunmó hkyô é nghut jáng le, Ngá é byu pê chyáng wúm nhang kat é nghut jáng le, 14 Ngá é myìng lé lâng é Ngá é byu pé gi, i-myìt lhoqnyhûm mù, kyûdung luî, Ngá é myòqdong lé hô mù, yhûmsing é agè ashop hkyô pé mai lhing lò kô é nghut jáng, Ngò gi, mauhkûng mai gyo byi luî, yhángmòq é mara lé hkyut pyám byi mù, yhángmòq é maumyî lé yâ gè byi râ nghut lhê. 15 Ahkuî, Ngò gi, myòq hpóng luî, shí jowò má kyûdûng é danghtê lé, Ngá é nohkyap èq tâm gyo byi râ nghut lhê. 16 Ngò gi, noqkuq yhûm shî má Ngá é Myìng ahtum abyùq jòq nyì râ matú, noqkuq yhûm shî lé hkyin yù luî, lhoq chyoiyúng to bê nghut lhê. Ngá é myòqjí eq Ngá é i-myìt nhiklhum gi, shí jowò má ayang jòq nyì râ nghut lhê.
17 Nàng gi, náng wa Dawiq kut é su, Ngá é hí má jujúm myìt mai sô nyì luî, Ngò hkunmó hkyô é bànshoq lé kut mù, Ngá é târâ wàng hkunmó pé eq târâ pé lé châng kut é nghut jàng, 18 Ngò gi, ‘Isira-elaq byu pé lé ùp nyì râ byù náng chyáng hkâ-nhám le nyi nyì râ nghut lhê.’ nghû náng wa Dawiq eq dangshikaq tô tô é eq rajung za, náng é hkóhkâm tángmyhâng lé lhoq gingtîng to râ nghut lhê.
19 Nghut kôlhang, núngmòq gi, lhing taû ló mù, târâ wàng hkunmó pé eq núngmòq lé Ngò byî tô é hkunmó pé lé tô pyám luî, gótû hparà pé lé ê dójaú mù, yhángmòq lé noqkuq kô é nghut jáng, 20 Ngò gi, Isira-elaq byu pé lé Ngò byî tô é Ngá é maumyî mai yhángmòq lé a-myìt eq roq nùt pyám râ nghut é htoq agó, Ngá Mying é matú, Ngò lhoq chyoiyúng tô é noqkuq yhûm shî lé le he-ngìk pyám râ nghut lhê. Ngò gi, haú lé, byù myû bànshoq bâng chyáng, gya dang taî kún hpo eq wuìzuì kut pyám nhâng râ nghut lhê. 21 Noqkuq yhûm shî gi, kô hkìk kôlhang, haú yâm mai laî ló é bang bànshoq gi, maú dan byùq kômù, ‘Haû Yhûmsîng Garai gi, shí mau eq noqkuq yhûm shî lé, haî mù shî su kut pyâm lhê lhâ?’ ga taí kôrâ nghut lhê. 22 Haú hkûn, byu pé gi, ‘Yhángmòq gi, yhángmòq lé Egutuq ming mai shuî htoq lo é Sû, yhángmòq é îchyí îwâ pê é Garai Gasang, haû Yhûmsîng Garai lé tô pyám kôluî, gótû hparà pé lé chôm po zìng kômù, haú pé lé noqkuq dójaú kô é yánmai, Yhang gi, yhángmòq chyáng shî sû é ihkyùp pé bànshoq jé nhang é nghut ri.’ ga taí kôrâ nghut lhê.” ga taî ri.