Sholumon Kut É Gótû Hkyô Pé
8
Sholumon gi, haû Yhûmsîng Garaî é noqkuq yhûm eq yhâng é hkóhkâm wâng lé, í xê zàn má shèq ban saí jáng, 2 yhang lé Hiram byî é wà pé lé dum saî xuq mù, wà haú pé má Isira-elaq byu pé lé tsing nyhi tô ri. 3 Hau htâng, Sholumon gi, Hamat Zoba wà lé ê zân ung yu ri. 4 Hau htoq agó, yhang gi, yòso má Tatmora wà eq Hamat mau má sùtzè tsîng to râ wà mó pé tsing saî xuq gingtîng tô ri. 5 Hau htoq agó, yhang gi, gingtíng wà mó pé dông, wàhkûm pé, hkum pé eq hkumkyáng pé bo é, ahtoq Bet Horon eq a-ô Bet Horon lé le saî saî ri; 6 Balat wà eq sùtzè tsîng tô é yhâng é wà mó pé bànshoq le, yhâng é gyèlhêng pé to râ wà pé eq yhâng é myang ji bâng é matú wà pé le nghut é, yhang saí nau é myìt bo é gû bànshoq lé le, Yerusalem wà mó, Lebanon mau eq yhang ùp é mau hkangmó má saî saî to bê nghut ri.7 Isira-elaq byù a nghut é, Hiti byu pé, Amori byu pé, Perizi byu pé, Hiwi byu pé eq Yebusi byu pé mai nyi myìt gyó tô é byù nyi bum ashî nghut ri. 8 Sholumon gi, yhâng é mau má Isira-elaq byu pê èq a lhoqhtûm pyám mù, nyi myìt tô é byù haú bang bànshoq é awùt ashîn pé lé, hkû-nyí jé shoq jùn kut nhang nyi ri. 9 Nghut kôlhang, Sholumon gi, Isira-elaq byu pé lé, yhâng é múzó má jùn a kut nhang é nghut mù, yhángmòq gi, sarhê pé, gyèzaû pé, gyè myanglhêng ji bang eq myang ji bâng é zau wuî nghut akô. 10 Haû mù, mingbyû wui é ahtoq má nyi é, Hkóhkâm Sholumon é zaugun sûwún wuî gi, í sho ngo xê yùq nghut ri.
11 Sholumon gi, Hpara-uq é yhang zo byìzo lé, Dawiq é Wà mai, yhâng é matú saî to byî é yhûm mó má shuî htòt yu ri; hkâsu mù gâ le, yhang gi, “Ngá é yhûmsîng myhí gi, Isira-elaq byu pê é Hkóhkâm Dawiq é hkóhkâm wâng má ge nyì râ a nghut; hkâsu mù gâ le, haû Yhûmsîng Garaî é sàksé dò jé wang é jowò pé gi, chyoiyúng ri.” ga taî ri.
12 Sholumon gi, laìshînhtâng hí má yhang saî tô é Yhûmsîng Garaî é hkungga gyàp htoq má, Yhûmsîng Garaî é matú myi nyhé hkungga pé nhông byî ri. 13 Haû gi, Mosheq mai, Bánno Buìnyì pé, Lhôxan Lhôsik poî pé, zàn wui lhê é poî nghut é, Múnchi a bo é Mùk Zo Poî, Nyhit bàt Poî eq Zúm Poî pê é matú hkunmó hkyô tô é, nyí wui é hkungga pé má cháng luî nhông byî é nghut ri. 14 Yhang gi, yhâng wa Dawiq tô tô é htûngli eq rajung za, hkyangjông pê é wò wùn wàq râ matú yhángmòq lé ahpúng hpúng kut le, nyí wuî âng é má cháng luî, hkyangjông pé lé htuqbáng râ eq hkya-on kúngton é lé shuî u râ matú, Lewiq byu pé lé ahpúng hpúng kut le, hkum pé má zúng râ matú, hkum zúng bang lé ahpúng hpúng kut le, wò tsing byî tô ri; hkâsu mù gâ le, haû gi, Garai Gasâng é byù Dawiq hkunmó hkyô tô é nghut ri. 15 Yhángmòq gi, hkóhkâm mai hkyangjông pé eq Lewiq pé lé, sùtdò pé eq gótû múzó eq séng luî hkunmó hkyô tô é mai lai mù, haî le a kut kó nghut ri.
16 Haû Yhûmsîng Garaî é noqkuq yhum é a-pûn awang hkyô é mai lhoqpân é buìnyì jé shoq, Sholumôn é múzó bànshoq lé lhoqpán bê nghut mù, haû Yhûmsîng Garaî é noqkuq yhûm gi, ban saí bê nghut ri.
17 Hau htâng, Sholumon gi, Edom mau mâ é wuimau yàm mâ é Ezi-on Gebera eq Elat wà má ê jé ri. 18 Haú hkûn, Hiram gi, wuimau hkyô sê é yhâng é lhaî hkâng bang eq rahá wuìsanghpo pé lé nhang kat byî é nghut mù, yhángmòq gi, Sholumon é duìnhâng zoshâng wuì eq rahá Ohpira jowò má jî ê kômù, hîng ngo hkyîng joí yu lò luî, Hkóhkâm Sholumon lé lo dé byî akô nghut ri.