Sholumon Lé Sheba Hkóhkâm Myhí Lé Huî É Hkyô
9
Sheba hkóhkâm myhí gi, Sholumon myìng hû é hkyô lé wó gyo jáng, yhang lé danglhîng dông chyam wú râ matú, yhâng htâng châng é ajùm ayò eq rahá, namngón jung, hîng myo myo eq lungsêng pé htô é gola-uk jûm le mù, Yerusalem wà mó má lé jé luî, yhâng é myìt má bo tô é bànshoq eq rajung za, Sholumon lé huî nyo ri. 2 Sholumon gi, Sheba hkóhkâm myhí myî lo é dang bànshoq lé tû taí byî ri; yhang myî lo é dang bànshoq lé a lûm wuî é za tû taî pyám byî ri. 3 Sheba hkóhkâm myhí gi, Sholumon é hpàqchyî byéng-yá lé myang é htoq agó, yhang saî tô é hkóhkâm wâng, 4 zanggyap htoq mâ é zoshuq, yhâng é zaugun wuì zung tô é hkyô, yhâng é duìnhâng zoshâng wuì mèbu wùt yúng tô é hkyô, tsibyiq wing jaú bang mèbu wùt tô é hkyô eq haû Yhûmsîng Garaî é noqkuq yhûm má yhang nhong é myi nyhé hkungga péa lé le myàng jáng, maú hong byùq bê nghut ri.5 Haû mù, yhang gi, hkóhkâm hpó lé, “Ngò, ngá é mîngdán má, nàng kut é múzó pé eq náng é hpàqchyî byéng-yá hkyô hû jé lo é lé wó gyô é gi, teng bê nghut ri. 6 Nghut kôlhang, ngò gi, lé jé mù, ngá myòq èq yhang wó myang é hkûn jé shoq, yhángmòq taî é dang lé a jíng é nghut lhê. Teng za ga jáng, náng é hpàqchyî byéng-yá hkyô rawuí lé lháng, yhángmòq ngo lé a taî kyo kó nhung; nàng gi, náng myîng hû lo é lé ngò wó gyô é htoq je gyaú ri myhî-nhung! 7 Náng é byu pé gi, hkungsô yhang wó akô nhung! Náng é hí má ayang yàp nyì mù, náng é hpàqchyî byéng-yá lé wó gyô é bang gi, hkungsô yhang wó akô nhung! 8 Nang lé myìt nguì ô naù luî, náng é Garai Gasang nghut é, haû Yhûmsîng Garaî é matú hkóhkâm dông Yhâng é tángmyhâng má nang lé zùng nhang tô é, náng é Garai Gasang nghut é, haû Yhûmsîng Garai gi, hkungsô wó nyi ri. Náng é Garai Gasang gi, Isira-elaq byu pé lé chyitdàp luî, ahtum abyùq lhoq gingtîng to nau é yánmai, díngmán é eq târâ ràp-rá é dông yhángmòq lé up nyì râ matú, nang lé hkóhkâm kut nhang to bê nghut ri.” ga taî ri.
9 Haû mù, yhang gi, hkóhkâm hpó lé, hîng rahkying súm sho í xê joí, namngón jung myo myo eq lungsêng pé byî ri. Sheba hkóhkâm myhí mai Sholumon lé byî é myhó myô é namngón jung gi, hkâ-nhám le dum a jòq wú é nghut lhê.
10 Hiram é duìnhâng zoshâng wuì eq Sholumon é duìnhâng zoshâng wuì gi, Ohpira mai hîng htô lò kô é htoq agó, alagum sik gê eq lungsêng pé lé le htô lò byî akô nghut ri. 11 Hkóhkâm hpó gi, alagum sik lé, haû Yhûmsîng Garaî é noqkuq yhûm mâ é zùmhtâng pê é matú le, hkóhkâm wang é matú le, mahkôn hpúng bâng é matú, tíng eq tíng góng pé saí râ matú le chung ri. Haû sû é pé lé, Yudaq ming má hkâ-nhám le a myang wú wú é nghut lhê.
12 Hkóhkâm Sholumon gi, Sheba hkóhkâm myhí lé, yhang ô nau é eq dûng é pé bànshoq lé byi mù, yhang yu lé byî é htoq myo shoq chyûnghuq byî kat ri. Hau htâng, hkóhkâm myhí gi, yhâng htâng cháng bang eq rahá, yhâng é mau shut taû ló bê nghut ri.
Sholumon É Hkìkhkâm Hkyô
13 Sholumon zàn wuì myang hàp yu é hîng gi, 7726 joí nghut ri; 14 hau htoq agó, ung zo ung shuq bang eq wuìloq kut bang le yu lé byî ashi kô nghut ri. Arabi-a hkóhkam pé bànshoq bang eq ming zau wuì le, Sholumon chyáng hîng eq ngùnhtung pé yu lé byî akô nghut ri.
15 Hkóhkâm Sholumon gi, hîng lé, gòlong mó í shô long bàt htoq ri; gòlong ralong gi, hîng í joí èq hkyuq rûng rûng bo ri. 16 Hau htoq agó, yhang gi, hîng lé, gòlong zo sum shô long le bàt htoq ri; gòlong zo haû ralong gi, hîng rajoí èq hkyuq rûng rûng bo ri. Hkóhkâm hpó gi, haú pé lé, Lebanon yòso mâ é Hkóhkâm Yhûm má kat tô ri.
17 Hau htoq agó, hkóhkâm hpó gi, xâng zuì lé hkóhkâm tángmyhâng saí mù, hîng gyíng èq shup tô ri. 18 Hkóhkâm tángmyhang é matú zùmhtâng hkyuq mhak bò mù, haú má tap tô é hkyî nang jang gi, hîng lé saî tô ri; zung é í yâm má gi, lòq ke jang ralhum lhum dàp mù, rayàm shut hkanghkyi lhô radu du tsung tô ri. 19 Zùmhtâng mhak hkangmó mâ é í htâng shut hkanghkyi radu du shap tô é nghut mù, hkyuq mhak mâ é hkanghkyi raxe í du shap tô ri. Gótû hká mîngdán le haû su kut a saî wú kó nghut ri. 20 Hkóhkâm Sholumon é gòm bànshoq gi, hîng chyat nghut ri; Lebanon yòso mâ é Hkóhkâm Yhum é chûngzè bànshoq gi, hîng gyíng chyat nghut ri. Sholumon é pyàt má, ngùn gi, gù a bo é yánmai, ngùn lé saî é haî lháng a bò nghut ri. 21 Hkóhkâm hpó gi, Hiram é duìnhâng zoshâng wuì kôn é wuìloq kut é wuìsanghpo pé wó ri. Haú pé gi, hîng, ngùn, xângzuì, myùq mó pé eq û-tóng pé hto mù, sum zân má radàm taû lo ri.
22 Hkóhkâm Sholumon gi, myìdàm htoq mâ é gótû hkóhkâm pé bànshoq htoq má sùtzè je wó é eq hpàqchyî byéng-yá je bò sû nghut ri. 23 Myìdàm htoq mâ é hkóhkam pé bànshoq bang gi, Garai Gasâng èq Sholumon é i-myìt nhiklhum má kat byî é hpàqchyî lé wó gyô yù râ matú, yhâng chyáng lé bum akô nghut ri. 24 Razàn htâng razàn, chyûnghuq yu lé byî é bang gi, ngùn eq hîng zèhkoq pé, mèbu pé, shâm lhâm pé, namngón jung pé, myang pé eq loze pé lé yu lé byî akô nghut ri.
25 Sholumon gi, myang pé eq gyèlhêng pê é matú, hkup myi hkyîng eq, gyèzô pé jî é myang ramûn í hkyîng wó é nghut mù, haú pé lé, lhêng tô é wà mó pé eq Yerusalem wà mó má tô tô bum ri. 26 Yhang gi, Uhprat Wuìlàng mai Hpilisiti mau jé, haú mai Egutuq maukyo jé shoq mâ é hkóhkam pé bànshoq lé ùp ri. 27 Hkóhkâm gi, Yerusalem wà mó má, ngùn lé lùqgòk pé su, kyám gâm sikhtung lé pá pé mâ é hkohúm gâm pé su lhoqmyô yu ri. 28 Sholumon é myang pé gi, Egutuq ming eq gótû mîngdán pé bànshoq mai wui hâng yu é nghut ri.
Sholumon Shi Byùq É Hkyô
29 Sholumon ùp é gótû hkyô pé awang mai ahpyo hpyot lé gi, myìqhtoi Nahtan labaû gôn é laiká má le, Shilo wà byù Ahiya é myìqhtoi dang eq, Nebat é yhang zo Yerobo-am eq sêng é, myìqhtoi Ido é shing-rán laiká má le kâ tô lhê, a nghut lhú? 30 Sholumon gi, Yerusalem wà mó mai Isira-elaq byù bànshoq bang lé myi xê zàn yhang ùp ri. 31 Hau htâng, yhang gi, yhâng é îchyí îwâ pê chyáng ló bo bánnô byùq bê nghut mù, yhâng wa Dawiq é Wà má myhup yhûm pyâm é hui bê nghut ri. Yhang zo Rehobo-am gi, yhâng é hkóhkâm hkô má zùng bê nghut ri.