Noqkuq Yhûm Saí Râ Matú Dawiq Byî É Chyûnghuq Pé
29
Hau htâng, Hkóhkâm Dawiq gi, shiwa byù hpúng gón lé, “Garai Gasang hkyin yu é, ngá zo Sholumon gi, chyungxe zànwut tiq ashî mù, gyai yhang mhoq yû râ ashî. Múzó shî gi, byu é matú a nghut, Yhûmsîng Garai Gasâng é matú shèq nghut é yánmai, gyai yhang kô é múzó nghut ri. 2 Ngò gi, ngá é Garai Gasâng é noqkuq yhum é matú, ngá é sùtzè bànshoq mai, hîng múzó é matú hîng, ngùn múzó é matú ngùn, gyi múzó é matú gyi, jòqtoq múzó é matú jòqtoq, sik múzó é matú sik, kyung râ matú nyhaú myòqjí su dùt jung lungsêng pé, mhan haq nyuî su dùt jung lungsêng pé, isâm ajung jung bo é lùqgòk pé, hpaudap lùqhtân pé eq lùqhpyû pé ajung jung lé, myo myo yhang hkong to byi bê nghut lhê. 3 Hau htoq agó, ngá é Garai Gasâng é noqkuq yhûm lé ngò myìt tuî nyi é nghut mù, ahkuî, ngò, ngá é Garai Gasâng é noqkuq yhum é matú, ngá é hîng, ngùn pé lé byi bê nghut é htoq má, chyoiyúng yhûm shi é matú ngò yhang hen to byî é gi, 4 yhûm pé mâ é xêwâm pé má shup râ matú Ohpira hîng 33000 joí eq ngùn gyíng 77000 joí nghut lhê. 5 Hîng eq sêng é múzó, ngùn eq sêng é múzó eq gótû múzó pé bànshoq lé gi, lòqmú kung bâng èq saí ra râ nghut lhê. Haû mù, ahkuî, haû Yhûmsîng Garai lé yhûmsing é zè ó kâm àp nhông byi râ lhú?” ga taî ri.6 Haú hkûn, yhûmhtu pê é ushuq pé, Isira-elaq a-myû up pê é zaugun wuì, rahkyîng ùp gyèzaû pé, rashô ùp gyèzaû pé eq hkóhkam é múzó lé wú gôn é bang gi, byí nau é myìt mai chyûnghuq byî akô nghut ri. 7 Garai Gasâng é noqkuq yhûm saí râ matú yhángmòq byî é gi, hîng 55028 joí, ngùn 110000 joí, gyi 198000 joí eq jòqtoq 1130000 joí nghut ri. 8 Lungsêng wó é bang le, Gerishon byù Yehi-ela é lòq mai, haû Yhûmsîng Garaî é noqkuq yhûm mâ é sùtdò má lé kat akô nghut ri. 9 Haû mù, shiwa byu pé gi, i-myìt nhiklhum bànshoq eq yhûmsîng byí nau é myìt mai haû Yhûmsîng Garai lé byi bekô nghut é yánmai, gabú byam chyû bum akô nghut ri. Hkóhkâm Dawiq le gyai yhang gabú bê nghut ri.
Dawiq Kyûdûng É Dang
10 Haû mù, Dawiq, shiwa byù hpúng gón é hí má, haû Yhûmsîng Garai lé hkya-on kúngton é gi,
“Ngá-mòq é îchyí îwa Isira-elaq é Garai Gasang,
Yhûmsîng Garai ê,
Nàng gi, pyàt dedu ahtum abyùq hkya-on wàq toq é huî nyì sháng gàq ô!
11 Yhûmsîng Garai ê, kô hkìk é hkyô, wum-o a-tsam,
hpungwup shingkang, kô làm hkyô eq hkìkhkâm hkyô gi, Náng é chyat nghut ri;
mauhkûng eq myigùng má jòq é lhúnglháng gi, Náng é chyat nghut ri.
Yhûmsîng Garai ê, haû mîngdán gi, Náng é mîngdán nghut ri;
Nàng gi, nyì mî-nyî, jòq mîjòq é ahtoq má wàq toq tô é hui sû nghut ri.
12 Sùtzè eq xânghpoq nge wó hkyô gi, Náng chyáng mai lo é nghut ri;
Nàng gi, lhúnglháng lé ùp sû nghut ri.
Wum-o eq hpungwup a-tsam gi, Náng é lòq má nghut mù,
Nàng gi, bànshoq lé hkya-on wàq toq mù, wum-o a-tsam byî ri.
13 Ngá-mòq é Garai Gasang ê, ahkuî, Nang lé ngá-mòq jeju hkya-on luî,
Náng é hpungwup bo é myìng lé hkya-on kúngton lhê.
14 Nghut kôlhang, ngò gi, ó nghut mù, ngá é byu pé gi, ó nghut luî, shî í yhang chyitdàp myìt mai wó àp nhong é nghut lhê lhú? Jung hkangmó gi, Náng chyáng mai lo é nghut mù, ngá-mòq gi, Náng é lòq mai lo é zè pé lé za Nang lé byî é nghut lhê. 15 Ngá-mòq gi, Náng é myòq hí má, ngá-mòq é îchyí îwâ pé bànshoq bang su, mau we byu pé eq byù bíng nghut lhê. Myìdàm htoq mâ é ngá-mòq é buìnyì pé gi, wùpzo su nghut mù, myìt myòqbyù jang a jòq nghut ri. 16 Ngá-mòq é Garai Gasang nghut é, Yhûmsîng Garai ê, Náng é chyoiyúng mying é matú yhûm saí râ nghû ngá-mòq hen lajang byî é agùn agó é zè shí pé gi, Náng é lòq mâ é chyat nghut mù, lhúnglháng lé gi, Nàng sing é chyat nghut ri. 17 Ngá é Garai Gasang ê, Nàng gi, i-myìt nhiklhum lé chyam lìk wú mù, i-myìt díng é lé myìt nguì ô naù sû nghut é lé, ngo sê lhê. Ngò gi, byí nau é i-myìt eq díngmán é myìt mai shí pé bànshoq lé byî é nghut lhê; hau htoq agó, ahkuî, ngò gi, shî má nyi é Náng é byu pé, Nang lé byí nau é myìt mai byi bekô nghut é lé, gabú myìt mai myàng bê nghut lhê. 18 Ngá-mòq é îchyí îwa Abraham, Isak eq Isira-elaq é Garai Gasang nghut é, Yhûmsîng Garai ê, Náng é byu pê é i-myìt nhiklhum hkaû pé má shîrong é myìt shî lé ahtum abyùq kat to byi mù, Nang lé yhángmòq é i-myìt mai jujúm nhang nyì àq. 19 Hau htoq agó, ngá zo Sholumon lé le, Náng é hkunmó pé, cháng ra târâ pé eq târâ wàng hkunmó pé cháng râ eq, ngò hen lajâng to byî é yhûm bànshoq lé wó saî pán râ matú, i-myìt nhiklhum bànshoq èq wó àp nhông râ myìt kat byi aq.” gâ ri.
20 Hau htâng, Dawiq gi, shiwa byù hpúng gón lé, “Núngmòq é Garai Gasang nghut é, haû Yhûmsîng Garai lé hkya-on kúngtôn keq.” ga taî ri. Haû mù, yhángmòq bànshoq bang gi, yhángmòq é îchyí îwâ pê é Garai Gasang nghut é, haû Yhûmsîng Garai lé hkya-on kúngtôn kômù, haû Yhûmsîng Garai eq hkóhkam é hí má ngóm gòp noqkuq akô nghut ri.
Sholumon Lé Hkóhkâm Ayá Byî É Hkyô
21 Htang nyí, yhángmòq gi, haû Yhûmsîng Garai lé hkungga pé nhông byi kô é nghut mù, Yhang lé, myi nyhé hkungga pé nghut é, nohtó rahkyîng du, saulo rahkyîng du, saulo zo rahkyîng du eq rahá, yhángmòq é shuq jung hkungga pé eq Isira-elaq byù bànshoq é matú gótû hkungga pé agùn agó nhông byî akô nghut ri. 22 Haú nyí, yhángmòq gi, haû Yhûmsîng Garaî é hí má gabú dik é myìt mai zo shuq akô nghut ri.
Hau htâng, yhángmòq gi, Dawiq é yhang zo Sholumon lé hkóhkâm wò radàm dum hûn kômù, haû Yhûmsîng Garaî é hí má zau kut râ matú yhang lé namngón xû bùt byî akô; Zadok lé le, hkyangjong wò hun akô nghut ri. 23 Haû mù, Sholumon gi, yhâng wa Dawiq é gùnglik dông, hkóhkâm kut luî, haû Yhûmsîng Garaî é hkóhkâm tángmyhâng má zùng bê nghut ri. Yhang gi, hkyô hkangmó má kô lam é nghut mù, Isira-elaq byù bànshoq bang gi, yhâng é jì-no gyô akô nghut ri. 24 Zaugun wuì bànshoq, sarhê mó pé eq Hkóhkâm Dawiq é yhang zo yùqzô pé bànshoq gi, Hkóhkâm Sholumon ùp é a-ô má nyi nyì râ matú dâkam akô nghut ri.
25 Haû Yhûmsîng Garai gi, Isira-elaq byù bànshoq bâng é hí má Sholumon lé gyai yhang wàq toq to luî, yhâng é hí mâ é Isira-elaq hkóhkam pé a myang hkam yu wú é hkóhkam é hkìkhkâm hkyô, yhang lé byi bê nghut ri.
Dawiq Shi Byùq É Hkyô
26 Yese é yhang zo Dawiq gi, Isira-elaq byù bànshoq bang lé ùp é hkóhkâm nghut ri. 27 Yhang gi, Isira-elaq byu pé lé zànwut myi xê zàn ùp é nghut mù, Hebron má nyhit zân up luî, Yerusalem wà mó má súm xe sum zân ùp é nghut ri. 28 Yhang gi, nyì ngón yùqyò mù, agùn agó é sùtzè wó é eq xânghpoq nge wó luî, uhpyû zuì nè jáng, shi ló byùq bê nghut ri; yhang zo Sholumon gi, yhâng é hkóhkâm hkô má zung ri.
29-30 Hkóhkâm Dawiq kut é hkyô awang mai ahpyo hpyot nghut é, ùp é hkyô, hpungwup a-tsam hkyô eq yhâng é awui ayàm má haî dut é hkyô eq rahá, Isira-elaq mîngdán eq gó-mau mâ é mîngdán pé bànshoq má dùt é hkyô pé lé gi, myìqhtoi Samu-elaq é laiká, myìqhtoi Nahtan é laiká eq myìqhtoi Gat é laiká pé má kâ tô bum é nghut lhê.