Noqkuq Yhûm Saí Râ Matú Dawiq Múzó Htung É Hkyô
28
Dawiq gi, Isira-elaq byu pê é zaugun wuì nghut é, a-myû up pê é zaugun wuî, hkóhkâm lé dójaú nyi é gyè hpúng pê é gyèzaû pé, rahkyîng ùp gyèzaû pé, rashô ùp gyèzaû pé, hkóhkâm eq yhang zô pê é shigu gaunyhaú pé eq sùtzè bànshoq lé wú gôn é zaugun wuì, hkóhkâm wâng mâ é zaugun wuì, a-tsam mó bo é bang eq a gyùq a wàm dùt é sarhê pé bànshoq lé, Yerusalem wà mó má zùp zíng nhang ri.2 Haú hkûn, Hkóhkâm Dawiq toq yàp mù, “Ngá é gu-mang wuì eq ngá é byu pé ê, ngá é dang lé gyo keq. Ngò gi, haû Yhûmsîng Garaî é dangshikaq sàksé dò to râ eq ngá-nhûng é Garai Gasâng é hkyî nang jang kut râ matú, yhûm saí râ myìt toq nyî mù, yhûm saí râ múzó htung to bê nghut lhê. 3 Nghut kôlhang, Garai Gasang gi, ngo lé, ‘Nàng gi, sarhê hpó rayùq nghut é htoq agó, byù sui lhoqshun pyám bê nghut mù, Ngá Mying é matú yhûm saí râ sû a nghut.’ ga taî ri.
4 Nghut kôle, Isira-elaq é Garai Gasang, haû Yhûmsîng Garai gi, Isira-elaq byu pê é hkóhkâm ahtum abyùq dùt nyì râ matú, ngá é yhûmbyù wuì bànshoq mai ngo lé hkyin yù bê nghut ri. Yhang gi, ushuq kut râ matú, Yudaq up lé hkyin yù mù, Yudaq up mai ngá é yhûmbyù wuì lé hkyin yù luî, ngá wâ é yhang zô pé mai, ngo lé, Isira-elaq byù bànshoq bâng é hkóhkâm kut nhâng râ matú myìt nguì ô nau é nghut ri. 5 Haû Yhûmsîng Garai gi, ngo lé yùqzo myo myo byi kôlhang, Isira-elaq byu pé lé ùp nhâng râ ga, haû Yhûmsîng Garaî é mîngdán é hkóhkâm tángmyhâng má zùng râ matú, ngá zo Sholumon lé za hkyin yu ri. 6 Haú hkûn, Yhang gi, ngo lé, ‘Nungzo Sholumon gi, Ngá é yhûm eq Ngá é wânghkaû lé saí râ nghut lhê; hkâsu mù gâ le, Ngò gi, yhang lé, Ngá zo kut râ matú hkyin yù bê nghut mù, Ngò gi, yhâng wa dùt râ nghut lhê. 7 Yhang gi, Ngá é hkunmó pé eq târâ pé lé, hkû-nyí kut é su, ayang châng kut nyi é nghut jáng, Ngò gi, yhâng é mîngdán lé ahtum abyùq lhoq gingtîng to byi râ nghut lhê.’ gâ ri.
8 Haû mù, maumyî gè shî lé núngmòq wó sîng mù, silî wunlî dông núngmòq é awùt ashîn pé lé pyàt pyàt zaí zaí wó lhai byî gyó ló râ matú, haû Yhûmsîng Garaî é shiwa hpúng nghu é, Isira-elaq byù bànshoq é hí má le, ngá-nhûng é Garai Gasang gyô tô é má le, núngmòq é Garai Gasang nghut é, haû Yhûmsîng Garaî é hkunmó bànshoq lé rago cháng keq nghû, ngò, núngmòq lé dangmó hkyô lhê ô.
9 Ahkuî, ngá zo Sholumon ê, nàng gi, náng wâ é Garai Gasang lé sé mù, i-myìt nhiklhum bànshoq eq myìt nguì myìt ngón é èq Yhang lé dójaú nyî àq; hkâsu mù gâ le, haû Yhûmsîng Garai gi, i-myìt nhiklhum bànshoq lé gôn wú mù, myìt é hkyô lhúnglháng lé sé byî é nghut ri. Nàng gi, Yhang lé ho é nghut jáng, myang hô râ nghut lhê; nghut kôlhang, nàng, Yhang lé tô pyâm é nghut jáng, Yhang gi, nang lé ahtum abyùq he-ngìk pyám râ nghut lhê. 10 Rago myìt tû wú aq; hkâsu mù gâ le, haû Yhûmsîng Garai gi, sân-yúng jowò ralhum dông yhûm saí râ matú, nang lé hkyin yù bê nghut ri. Wum-o lhoqkíng mù, múzó saî e ló aq.” ga taî ri.
11 Hau htâng, Dawiq gi, yhang zo Sholumon lé, yhang htung tô é múzó nghut é, noqkuq yhum é laìshînhtâng saí hkyô pé, noqkuq yhum é azòng pé, noqkuq yhum é sùtdò pé, noqkuq yhum é ahtoq pyâm pé, wàp pé eq mara hkô htaí hkungga nhông jang pé àp byî ri. 12 Hau htoq agó, yhang gi, haû Yhûmsîng Garaî é yhûmwàng pé eq lhînghkyùq mâ é wàp pé lé le, Garai Gasâng é noqkuq yhûm mâ é sùtdò pé lé le, àp nhong tô é zè pé kat râ sùtdò pé lé le, haû Sô mai yhâng é myìt má kat byî é bànshoq, yhang lé tûn shit ri. 13 Hau htoq agó, yhang gi, hkyangjông pé eq Lewiq pé byù hpúng gam é hkyô eq séng luî le, haû Yhûmsîng Garaî é noqkuq yhûm má dójaú é múzó bànshoq eq séng luî le, haú má dójaú é hkûn chung é zèhkoq pé bànshoq eq séng luî le, mhoq kyô ri. 14 Dójaú é hkyô hkangmó má chûng râ é hîng zèhkoq pé bànshoq é matú, yhang lìk nhang tô é hîng eq dójaú é hkyô hkangmó má chûng râ é ngùn zèhkoq pé bànshoq é matú, yhang lìk nhang tô é ngùn gi, 15 hîng myi-kok tsûngjang pé eq haú pê é myi-kok pé lé ralhum lhum kut chîn é hîng; ngùn myi-kok tsûngjang eq haú pê é myi-kok pé lé, myi-kok tsûngjang chung é má cháng luî, chîn é ngùn; 16 ting é mùk kê é mùkgyàp é matú chîn é hîng; ngùn mùkgyàp pê é matú chîn é ngùn; 17 akó mâ é sho htau dun pé, hkoq mó pé eq gòm pê é matú chîn é hîng gyíng; hîng hkoq hkangmó é matú chîn é hîng; ngùn hkoq hkangmó é matú chîn é ngùn; 18 namngón jung nyhê é hkungga gyàp é matú chîn é hîng gyíng pé nghut ri. Hau htoq agó, yhang gi, dùng pyô mù, haû Yhûmsîng Garaî é dangshikaq sàksé dò má shum nghop tô é hîng hkerubim lheng é matú htung tô é lòqmú lé le, yhang lé byî ri.
19 Haú hkûn, Dawiq gi, “Htung tô é múzó shî bànshoq lé, ngò, ngá chyáng jòq nyi é Yhûmsîng Garaî é lòq èq kâ tô é nghut mù, haú pê é jíhkúm nùqgùq lé, Yhang, ngo lé sê gyo nhang é nghut lhê.” ga taî ri.
20 Hau htâng, Dawiq gi, yhang zo Sholumon lé le, “Wum-o lhoqkíng mù, myìt wum lhoqhtân luî, múzó zui saí aq. Hkâgyùq, myìt wum le hkâgyui; hkâsu mù gâ le, ngá é Garai Gasang nghut é, haû Yhûmsîng Garai Gasang gi, nàng eq nghut nyi ri. Yhang gi, haû Yhûmsîng Garaî é noqkuq yhûm saí múzó ban é jé shoq, nang lé a he-ngìk pyám râ nghut é htoq agó, nang lé a tô pyám râ nghut lhê. 21 Hkyangjong byù hpúng pé eq Lewiq byù hpúng pé gi, Garai Gasâng é noqkuq yhûm má dójaú râ múzó bànshoq é matú nyi to bê nghut ri; lòqmú kûng é byù gi, múzó bànshoq má nang lé kâm garúm râ nghut lhê. Zaugun wuì eq shiwa byù bànshoq bang gi, náng é hkunmó bànshoq lé cháng kôrâ nghut lhê.” ga taî ri.