2 HKÓHKÂM
Laiká
(2 Kings)
Ahazi-a Lé Yhûmsîng Garai Târâ Jéyáng É Hkyô
1
Ahap shi é htâng, Moba byu pé gi, Isira-elaq lé gumlau toq bekô nghut ri. 2 Ahkuî, Ahazi-a gi, Samariq wà má jòq é ahtoq wàp mâ é hkohot mai byìt gyó luî, no nyi ri. Haû mù, yhang gi, lagyô pé lé ji yù luî, “Ê mù, Ekron wà mâ é hparà Balaq Zebup chyáng, ngò, ngá é nò shî mai dum wó gê râ, a dum wó gê râ hkyô lé, ê myî wú keq.” ga nhang kat ri.3 Nghut kôlhang, haû Yhûmsîng Garaî é maumang lagyo gi, Tishibi byù Eliya lé, “Dòq ê mù, Samariq hkóhkam é lagyô pé lé ê hui luî, ‘Goì ê, Isira-elaq mau má Garai Gasang a nyi é yánmai, núngmòq gi, Ekron wà mâ é hparà Balaq Zebup lé ê myi râ dùt kô é lhú?’ nghû yhángmòq lé myi aq. 4 Haû mù, haû Yhûmsîng Garai shî su ga taî ri, ‘Nàng gi, nàng lèq tô é yhup hpyang mai wó toq râ a nghut lo. Nàng gi, teng za yhang shî râ nghut lhê.’ gâ ri.” ga taî ri. Haû mù, Eliya gi, ê bê nghut ri.
5 Lagyo haú bang hkóhkam chyáng dum taû jé lô jáng, hkóhkâm gi, yhángmòq lé, “Núngmòq, haî mù taû lo akô lhú?” ga lhom myî ri.
6 Yhángmòq gi, “Byù rayùq, ngá-mòq lé lé hui mù, yhang gi, ‘Núngmòq lé nhang kat é hkóhkam chyáng taû ló luî, “Haû Yhûmsîng Garai shî su ga taî ri; goì ê, Isira-elaq mau má Garai Gasang a nyi é yánmai, nàng gi, Ekron wà mâ é hparà Balaq Zebup lé myi râ matú lagyô pé nhâng râ dùt é lhú? Haû mù, nàng gi, nàng lèq tô é yhuphpyang mai wó toq râ a nghut lo. Nàng gi, teng za yhang shî râ nghut lhê.” gâ ri.’ nghû taí keq.” ga tû taî akô nghut ri.
7 Haú hkûn, hkóhkâm gi, yhángmòq lé, “Núngmòq lé lé hui mù, shí hkyô lé taî kyô é sû gi, hkâsû é byù nghut ri lhú?” ga myî ri.
8 Yhángmòq gi, “Haú yùq gi, sho-maú gyai yùq mù, yhâng é hpyidum má sho-kuq hpyihit hit tô ri.” ga tû taî akô.
Hkóhkâm gi, “Haú yùq gi, Tishibi byù Eliya nghut ri.” ga taî ri.
9 Hau htâng, hkóhkâm gi, gyèzau rayùq lé, yhâng é gyè hpúng gyèzo ngo xê yùq eq rahá, Eliya chyáng nhang kat ri. Gyèzau hpó haû gi, kong htoq má zung tô é Eliya chyáng dòq ê mù, yhang lé, “Garai Gasâng é byù ê, ‘Gyó lô àq!’ ga hkóhkâm taî ri.” ga taî ri.
10 Haú jáng, Eliya gi, gyèzau hpó lé, “Ngò gi, Garai Gasâng é byù têng é nghut jáng, mauhkûng mai myi gyó lô mù, nàng eq náng é byù ngo xê yùq lé nyhê hkyô pyám sháng gàq!” ga tû taî ri. Haú hkûn, mauhkûng mai myi gyó lô mù, gyèzau hpó eq yhâng é byu pé lé nyhê hkyô pyám bê nghut ri.
11 Haû nghut mù, hkóhkâm gi, gótû gyèzau hpó rayùq lé, yhâng é byù ngo xê yùq eq rahá, Eliya chyáng dum nhang kat ri. Gyèzau hpó haû gi, Eliya lé, “Garai Gasâng é byù ê, hkóhkâm gi, ‘Radá dâm gyó lé lô àq!’ gâ ri” ga taî ri.
12 Eliya gi, “Ngò gi, Garai Gasâng é byù têng é nghut jáng, mauhkûng mai myi gyó lô mù, nàng eq náng é byù ngo xê yùq lé nyhê hkyô pyám sháng gàq!” ga tû taî ri. Haú hkûn, mauhkûng mai Garai Gasâng é myi gyó lô mù, yhang eq yhâng é byu pé lé nyhê hkyô pyám bê nghut ri.
13 Haû mù, hkóhkâm gi, sum yuq nghû râ gyèzau hpó lé, yhâng é byù ngo xê yùq eq rahá dum nhang kat ri. Sum yuq nghû râ gyèzau hpó haû gi, dòq ê mù, Eliya é hí má hkyîhput htuq luî, “Garai Gasâng é byù ê, ngá é chyungxe eq náng é duìnhâng zoshâng wuì shí bang ngo xê yùq é chyungxe lé hpautap byi laq! 14 Wú aq; mauhkûng mai myi gyó mù, hí lhê é gyèzau í yùq eq yhángnhik é byu bànshoq bang lé nyhê hkyô pyám bê nghut ri. Nghut kôlhang, ahkuî, ngá é chyungxe lé hpautap gù to byi laq!” ga dûng tôngbán ri.
15 Haú hkûn, haû Yhûmsîng Garaî é maumang lagyo gi, Eliya lé, “Yhang eq rahá bo gyó ló aq; yhang lé hkâgyùq.” ga taî ri. Haû mù, Eliya gi, toq luî, yhang eq rahá hkóhkâm chyáng bo gyó ló bê nghut ri.
16 Eliya gi, hkóhkâm lé, “Haû Yhûmsîng Garai shî su ga taî ri; Isira-elaq mau má myi râ Garai Gasang a nyi é yánmai, nàng gi, Ekron wà mâ é hparà Balaq Zebup lé ê myi râ lagyô pé nhâng râ dùt é lhú? Nàng gi, shí hkyô kut bê nghut é yánmai, nàng lèq tô é yhuphpyang mai wó toq râ a nghut lo. Nàng gi, teng za yhang shî râ nghut lhê.” ga taî ri. 17 Haû mù, yhang gi, Eliya taî é, haû Yhûmsîng Garaî é dang eq rajung za shi byùq bê nghut ri.
Ahazi-a gi, yùqzo a wó é yánmai, yhang gu Yoram gi, Yudaq hkóhkâm Yehoshahpat é yhang zo Yehoram hkóhkâm kut é í zan zàn má, yhâng é hkóhkâm hkô má zùng bê nghut ri. 18 Ahazi-a ùp é gótû hkyô pé bànshoq lé le, yhang kut laî lo é hkyô lé le, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí?